شخبطة ع الحيطة

اتنيل ...."حوار شخصى"

2012-01-26T20:59:00.004+02:00

وجالك أوان تكتب وماحدش يقرا..

مع إن الناس لسه بتقرا..

حتى اما بتكتب عن بُكره

الناس تنساك..

مع إن إمبارح كنت بتكتب

والناس تستناك..

مش عارف ..

مين الغلطان ؟

إنت ؟ .. هما ؟

مش فارق..

مين الخسران ؟

إنت ؟ .. هما ؟

مش فاضل حاجة..

غير قلمك..

وزراير مستنية تتكتك تحت صوابعك..

امسك قلمك .. شخبط وامسح

وكى بوردك اهريه بتكتكتك

كبر مخك وحياة والدك وبلاش احباط

اكتب على ورقة..

ف ملف الوورد..

شخبط ع الحيط..

حد هيقرا.. ماحدش عايز

سيبك منهم.. وارمى وَرَاك

اكتب وخلاص..

وماتتلككش

مش عايز تكتب

ماتصدعناش

اكتب ..هتعيش

واما تموت.. تفضل عايش

اسكت...برضه هتعيش

بس اما تموت ..الناس تنساك

ببساطة كده

2011-12-31T16:42:00.000+02:00

ببساطة كده بتنتهى السنة، ببساطة وكأنها ماقلبتش الدنيا وسايباها من غير ماتتعدل، ببساطة وكأنها ماشيبتناش وكبرتنا أعمار ضعف اعمارنا، ببساطة وكأنها سنة عادية، ببساطة وكأنها ماعرفتناش إن البلد دى فيها ناس عايشة وخلاص وناس عايزة تعيش وخلاص، وناس تانية من اللى قال عنهم الخال "إحنا ولاد الكلب الشعب.. إحنا بتوع الأجمل وطريقه الصعب"، وكل دول عايشين مع ناس ميتة وإحنا فاكرينها عايشة.

ببساطة كده بتنتهى السنة وإحنا لسه بنفس الهبل اللى يخلينا نتلهى فى خلافاتنا الداخلية الصغيرة، واختلافاتنا وتفاصيلنا اللى الشخص اللى ماسك خيوط عرايس الماريونت بيخلينا نتلهى فيها ونتكعبل فى تفاصيلها عشان ننسى إن هو مشكلتنا الأهم، وإسقاطه ونزع الخيوط منه هى معركتنا الأوضح، حتى وإن تعامت عيوننا عن وضوحها.

ببساطة كده بتنتهى السنة وكأنها ناسية إن هى عرفت جيل كامل يدوق حلاوة طعم كلمة "ثورة"، وهى الحلاوة اللى لعبت "سيجا" فى أرواح كتير مننا وخلتنا ننسى نزعل على انكساراتنا الشخصية وسط انكسارات البلد، ونفرح لانتصاراتنا الخاصة لكن ننسى الفرحة دى مع أول فرحة تخص البلد "وهى بقت شحيحة اليومين دول".

ببساطة كده بتنتهى السنة وكأنها ما شيلتناش حمل تقيل مايلة بيه كتافنا لحد دلوقتى، حمل إسمه "الشهداء"، اللى مش لاقيين حد يشيل همهم غيرنا، واللى كل شوية بيزيدوا ويزيد الحمل على الشهدا اللى لسه ما اتقتلوش، واللى مش لاقيين حد فى البلد دى يجيب حقهم، من أول حق خالد سعيد، لحد حق "الخالدين دون أن ندرى هل هم سعداء أم لا".

ببساطة كده بتنتهى السنة وكأنها مش سايبة وسطنا بنى آدمين متصابين فى أجسامهم بيتلعب بيهم حاورينى يا كيكا ويتنسوا وسط زحمة الأخبار ودوشة العبث اليومى المعتاد.

ببساطة كده بتنتهى السنة وكأنها ماوجعتش أرواح وأجساد عيال من أحلى ورد فتح فى جناين مصر، وكأنها ما سابتش لحمهم وعرضهم يتخرطوا فى ألسنة ناس نسيت الإنسانية.

ببساطة كده بتنتهى السنة وكأنها ماعلمتناش الحزن بزيادة والقهرة بزيادة والخوف بزيادة والإحساس بالعجز بزيادة والإحساس بالذل بزيادة، وكانها ماشربتناش المر بزيادة.

ببساطة كده بتنتهى السنة وكأنها ماخلتش الكتابة غريبة وصعبة ومرة، وماخلتش الغُنا باطل ومهزوم وبطال، وكأنها ماخلتش الحلم ببكرة تقيل، وكأنها ماخلتش الكلام عن امبارح حزين ومهزوم.

ببساطة كده بتنتهى السنة وكأنها فاكرة إنها قدرت تغلبنا وتغلب قدرتنا على الحلم، وكأنها فاكرة إننا خلاص سلمنا ومش هنحلم ببكرة، وكأنها فاكرة إنها غلبتنا مع اللى غلبونا، وكأنها فاكرة إننا نسينا اللى راحوا ونسينا اللى إتداس عليهم ونسينا اللى اتشتموا.

ببساطة كده بتنتهى السنة وهى فاكرة إننا محبطين ومتخرتأين وموجوعين بس، مش واخدة بالها إننا شربنا العند ورضعنا الصبر واتعلمنا الكلام والصراخ، وبدأت حكايتنا ومش راجعين.

ببساطة كده بتنتهى السنة وهى فاكرة إننا مش هنقدر نقول ..كل سنة وانتم طيبين، بس إحنا بقى مطلعين لساننا وبنقول لبعض فى الميادين.. كل سنة وإحنا بنى آدمين عندنا دم وثوار وحقيقيين وطيبين.

حاشية: بتخلص السنة وبتخلص حكايات وبتبتدى حكايات وبتموت حكايات وبينطفى نور حكايات وبينداس على حكايات وبتتعرى حكايات وبيتخاض فى شرف حكايات.. بس برضة مش هتخلص الحكايات.

ماتكدَبش نفسك

2011-12-24T19:34:00.000+02:00

الكتابة العبثية، هذا هو شعار المرحلة، طالماً كان الوضع عبثياً لأبعد الحدود، طالما كانت التصريحات عبثية، والمؤتمرات عبثية، والبيانات عبثية، والتبريرات عبثية، وفض الاعتصامات عبثى، والمسئولين عبثيين، والضرب عبثى، والمؤامرات عبثية، والكذب عبثى، والغباء عبثى، طالما أن كل شىء عبثى لهذه الدرجة التى لا تصدق، فلا بد ان تخرج الكتابة عبثية لأقصى حد، لا معنى لها ولا جدوى.

ليس هذا يأس، ليس هذا خوف، ليس هذا ضياع للأمل، ليس هذا انتقاص من قيمة الكتابة وأهميتها، لكنه اعتراف بانحطاط قيمة كل الحروف والجمل حين تقارن بالدم، حين تقارن بالروح، حين تقارن بالشرف، حين تقارن بالبشر، حين تقارن بالعيون، حين تقارن بالكرامة، حين تقارن حتى بدموع طفل يبكى من هول ما يشاهده على الشاشة دون أن يملك حيلة تعينه على أن يفعل أى شىء.

"الكلام آخر المطاف هو الكلام..والدم دم".. هذه هى المأساة كما اقنعنا بها الخال، مهما بذلنا من جهد للكتابة، مهما حاولنا اتقان الصياغة، مهما اجتهدنا فى محاولة إقناع البشر الذين سيقرأون، مهما حاولنا إقناع البشر الذين قد يقتنعون، مهما حاولنا إظهار الحقائق لمن يريد أن يراها، مهما فعلنا.. سيموت الكلام بجانب المشاهد التى شاهدها الجميع، سيموت الكلام بجانب الصور المتاحة للجميع، سيموت الكلام بجانب الحقائق التى يقدر الجميع أن يعرفها "إن أراد".

وحتى إن كان دورنا هو إظهار الحقيقة للناس، تبقى الحقيقة أحياناً أوضح من أن توصف، تبقى الحقيقة حقيقية أكثر من الحروف التى ستصفها، واضحة أكثر من كل الصياغات التى ستحاول إيضاحها، فكيف يمكن أن تصف الدم المراق الذى تحنت به ملابسك حين حملت مصاب أو شهيد، كيف ستصف رائحة الموت التى تعودت عليها أنفك، كيف ستصف طعم المرارة الذى التصق بفمك، كيف ستشرح نظرة الرعب التى رأيتها فى عيون فتاة كانت بجوارك، كيف ستصف نظرة الذل التى رأيتها فى عين الشاب الذى كان بجوار تلك الفتاة، كيف ستصف دمعة تسقط من عين أم شهيد، كيف ستصف دمعة رفضت أن تنزل من عين أبيه؟

لا تصدقنى حين أخبرك بما رأيت، لا تصدق فيديو تراه بعينيك أنت، لا تصدق صورة تكاد تنطق أمامك، لا تتعاطف مع رواية من تم تعذيبه أو إهانته، لا تقتنع بكلام أى شخص فى التليفزيون أياً كان الجانب الذى يقف فيه، لا تقتنع بمقال فى أى جريدة، فقط قم من مقعدك وانزل إلى الشارع، شاهد بعينيك، اسمع باذنيك، حلل بعقلك، استفت قلبك، در بين الواقفين وشاهد وجوههم واحفظها، فلربما ترى واحد منهم بعد قليل على الشاشة موصوفاً بالبلطجة أو مكرم بلقب شهيد، وقتها ستعرف أنت حقيقته، فقط انزل إلى الشارع، وإن اكتشفت أن طرف من الطرفين على حق، فابق معه، أو على الأقل قل للقابعين فى بيوتهم أن يفعلوا مثلك.

حاشية: الكلام آخر المطاف هو الكلام.. والدم دم، القصيدة توصف الدم الذكى..ماتشيلش نقطة، توصف الأم اللى ماتت بنتها قدام عينيها، بس وصف، وصف جيد, وصف خايب، وصف صادق، وصف كاذب..كله وصف..كل شعر الوصف مايساويش ف سوق الحق صرخة.. والكلام عن كل ده شىء م التطاول..إنما لازم نحاول.

لا يا شيخ

2011-12-15T23:47:00.000+02:00

بدافع من الملل من كثرة الحلاقة، وبدافع من التعب من التهاب الجلد، امتنعت لفترة عن حلاقة ذقنى، فترة طالت دون أن أدرى، وبدأت أسمع تلميحات تطورت لتعليقات ثم طلبات مباشرة بان أحلق ذقنى، وكعادتى لم أهتم، فقد كان شكلها مختلفاً أكثر منه منفراً، وبعدين واحد شايل دقنه.. زعلانين ليه؟، لكن بعد فترة بدأت أجد تطوراً لم أكن اتوقعه، تطور يحدث كلما نزلت إلى الشارع، بدأ فى أحد ميكروباصات "دقى جيزة"، كنت أجلس على الحديدة الموجودة خلف السائق، أوصلت له أجرة راكبة، سألنى: أجرة مين دى يا شيخ؟..رددت: الآنسة..ثم أردفت: وأنا مش شيخ، انفهش قليلاً ورردها خلفى ولكن بصيغة تعجب: مش شيخ؟.. خوفاً من أن يشعر بأنى اتحداه بادرت بابتسامة لزجة يفهمها أمثالى وأمثاله ممن علمت فيهم شوارع البلد، ومعها خرجت منى "صباح الفل" بلهجة سيفهم منها أنى لا ولن ولم يمكن أن أكون شيخاً على الإطلاق، بل ربما وجد معى حبايتين لزوم الاصطباحة، لكن قبل الوصول للحبايتين عدت للشخص المحترم الذى كنته، ولكن بعدما أوصلت له الرسالة "ليس كل الملتحين شيوخاً"، ولم أهتم أن تصله الرسالة الثانية التى اعيش بها أن "معظم الملتحين فى زماننا أفاقون".

على مدار اسبوعين عشت مع لحيتى نتلقى كلمة "يا شيخ" فى الشوارع والمواصلات والمحلات وكأنى أحمل فى وجهى شهادة من الأزهر الشريف، وكلما مر الوقت وطالت لحيتى، زادت ملامح الإحتفاء بى والتبجيل، وبدأ عدد أكبر من الملتحين –أمثالى- فى إلقاء "السلام عليكم" سريعة حين يعبرون بجوارى، حتى أن أحدهم كان يتكلم فى هاتفه، ولما رآنى أدار وجهه ناحيتى سريعاً ونتعنى "السلام عليكم" بلا أى مشاعر أو معانى، لفظها كأنه يؤدى واجباً أُمر به دون أن يفهم حتى معنى الكلمة، ثم عاد لمن تركه على الهاتف مرة أخرى.

استلزم منى الأمر الكثير من التفهيم والتوضيح والشرح أنى لست شيخاً ولا نيلة، واستوجب الأمر أحياناً فاصل من السباب البذىء الذى أجيده حتى أقنع من أمامى أنى لست بأعلم منه، وفى كثير من الأحيان مع الأسف لم يفهم محدثى، بل اعتبرنى اتواضع أكثر، كما يعرف عن طبع الشيوخ.

لم يكن يستفزنى فى الموضوع تعامل الناس معى كعالم فقيه خبير فى شئون الدين، لكن كان أكثر ما يثير حنقى أن نظاماً عشنا فيه ومعه أعواماً طويلة استطاع بمساعدة متطرفين ومخبرين ومجانين أن يفرغ الدين من محتواه الفكرى والعقائدى، ليحوله للحية، كلما طالت واستطالت، كلما كانت علامة على الإيمان، دين صرنا نرصده من مظاهر معظمها كاذب وسهل تزييفه، دين نحبه ونعيش به، لكن غيرنا يحاول –إن لم يكن نجح- أن يجعله دين يعيش به هو على أقفية بسطاء هذا الشعب، دين عميق ورحب وطيب وسمح والاختلاف فيه رحمة، دين لا أخرج منه لمجرد أن أحمد الحلاق أخذ بموسه لحيتى.

حاشية: نحن مجتمع متدين، هذه هى أكبر كذبة يحقنوننا بها، فنحن حالياً شعب مخدوع، حتى وإن قالت الصناديق للدينيين نعم، فالأهم أن تقول صناديق القلوب للدين نفسه نعم، ولا تنخدع بمظاهر مزيفة تعلو الوجوه.

كلنا مجاريح

2011-12-10T20:03:00.000+02:00

كلنا مجاريح، قالها طيب الذكر جورج وسوف قبل سنوات ولم نلتفت لها كما ينبغى، ووحياة أبوك قبل ما تقلب وشك من جورج وسوف لكل الأسباب اللى أنا وانت عارفينها، ركز فى الكلمة نفسها، كلنا مجاريح، كلنا.. أنا وانت واللى قاعد جنبك دلوقتى واللى بيتمشى جنبى واللى مايعرفكش وكل الناس التانية اللى عايشة فى البلد اللطيف اللى احنا حصلنا الشرف واتولدنا فيه، كلنا متنيلين على عين اللى جابونا مجاريح، المسلم أبو دقن اللى بيقول على نفسه سلفى، والمسلم التانى أبو دقن أخف شوية اللى بيقول على نفسه إخوان، والمسلم التالت بقى اللى من غير دقن اللى مش بيقول على نفسه حاجة، والمسيحى المتشدد، والمسيحى اللى مش متشدد، والعيال اللى ضاربين برشامتين بخمسة جنيه، ولا مخمسين ف سوجارة، والعيال التانيين ولاد الناس اللى لافين سجايرهم بإيد فرطة ومهدرين، اللى بيشرب كليوباترا واللى بيشرب دانهل واللى بيلف تبغ كابتن بلاك، اللى راكبين عربيات 2012 واللى راكبين تكاتك واللى راكبين رجليهم، اللى فاكرين نفسهم مثقفين واللى عارفين إنهم لسه قدامهم كتير عشان يبقوا مثقفين، ولاد الناس وولاد الكلب، اللى فخورين بكونهم مصريين، واللى بيلعنوا اليوم اللى اتولدوا فيه مصريين، اللى فرحانين بالثورة واللى بيسبوا ملة ودين للى فكر فى الثورة، اللى بيعيط من قلبه لما يفتكر الشهداء، واللى مصمم إنهم مش شهداء، كلنا مجاريح.. كلنا عايشين فى بلد لا يهتم لأمر إنسان ولا لكرامته إلا فى حالة أن يكون ذا منصب أو مال، وهما معرضان للزوال وساعتها بيطلع عين أمه، أو أن يكون ماسك على السادة المسئولين ذلة، وساعتها مسيرهم هيطلعوا عين أمه، كلنا نعيش فى بلد حتى الثوار فيه يتأففون من الثوار "اللوكال" الذين يشاركونهم ثورتهم، رغم أن هؤلاء اللوكال هم دوماً من تتزين قوائم الشهداء باسمائهم، كلنا نعيش فى بلد مسروق منهوب مخوخ اقتصاديا ومنفلت أمنياً ومضعضع اجتماعياً ومشوه دينياً ومقتول نفسياً ومنحط أخلاقياً ومنهار بدنياً، كلنا نعيش فى بلد يتحكم فى موارده حفنه ممن يعيشون على أرضه، وهم أنفسهم من يريدون التحكم فى سياساته، ولهذا يصرون على إلهائنا ببعضنا البعض حتى لا نلتفت لهم ولما يصنعون، كلنا مجاريح مذبوحين مضروبين مقتولين "على أسفلت الشارع شهدا على أسفلت الزنازين مساجين"، كلنا ماشيين وبنسأل ليه ..فى إيه ف العمر هنبكى عليه؟ وبعد كل ده تيجى تقولى جورج وسوف مين اللى باستشهد بيه؟!، يا عم اتلهى، مابقتش فارقة سينا من سونيا، كلنا مختومين على قفانا.. بختم النسر.

عرس الديمقراطية

2011-12-06T13:39:00.002+02:00

الحمد لله يا جدعان، وألف مبروك ودايماً عامر، انطلق مطلع هذا الأسبوع عرس الديمقراطية، وهو العرس الذى سيستمر لثلاثة مراحل بلياليهم، وطبعاً كلكم مدعوون لحضور هذا العرس، وكعادة الأعراس سيحضر البعض ويمتنع عن الحضور البعض الآخر، ولأننا نعتز بتقاليدنا وعاداتنا، حتى وإن كانت سيئة، فقد كان هذا العرس بـ"دُخلة بلدى" استلزمت أن يرى الجميع دماء العروس حتى يطمئنوا لاحتفاظها بشرفها، فتابعنا جميعاً أطهر دماء فى مصر وهى تسيل على منديل ميدان التحرير، لنعرف أن بلدنا رغم محاولات كل من حاولوا اغتصابها سابقا وعلى مدار السنين، ظلت بكراً عفية، محافظة على أغلى ما فيها ومن فيها.

ما يلفت الأنظار بحق فى عرس الديمقراطية الذى عشناه، أنه كان فرصة ذهبية لنتأكد من صدق من قال أن الشعب المصرى غير مؤهل للديمقراطية، لم يكن الرجل محقا تماماً، لكنه أصاب كبد الحقيقة وكلاويها، فالشعب المصرى كشعب وكافراد مؤهل للديمقراطية، لكنه يعيش مع مسئولين محقونين بالبيروقراطية وكل المساوىء الإدارية التى نعرف لها تعريفاً والتى لا نعرف، فكل أخطاء العملية الانتخابية كانت من وجهة نظر السادة المسئولين مبررة، وعادية، ولا يجب الوقوف عندها، إعمالاً لمبدأ "هو أكل وبحلقة ؟"، فكل السادة المسئولين الذين عايرونا بجهودهم المستميتة لمنح هذا الشعب رفاهية –يرونها تفضلاً منهم- الانتخاب، لم يكلفوا أنفسهم مثلاً وضع قواعد قانونية مؤكدة وسهلة يعرفها الجميع حين يريدون الانتخاب، فباتت مصر ليلة الانتخابات وهى تسأل "هو ينفع اتنين فئات ولا لأ؟"، واستمر السادة إياهم فى الخروج كلٌ برأىٍ مختلف يزيد تشتت المعازيم ولخبطتهم، وهو ما تكرر فى كثير من التفاصيل الأخرى، التى تثبت أن الدولة المصرية بموظفيها وساستها هى من ليست مؤهلة للديمقراطية بعد وليس الشعب.

وبذكر الشعب الذى ذهب ليختار مجلسه، نرجو أن يكون الشعب عنده من طول البال ما يسمح له بمراقبة ومتابعة هذا المجلس ونوابه، وألا يكون قد استسهل أن ينتخب ليجد من يتكلم بدلاً منه حتى ينام هو مطمئناً أن للبيت رب يحميه، وأن يقف لنوابه على الواحدة حين يراهم قد نسوا دماء الشهداء، وحين يجدهم قد تناسوا من أسال هذه الدماء فتركوه يتسرسب من بين أيادى حماة الوطن، مثلما تسرسب الشناوى "جدع يا باشا" إلى خارج البلاد بعدما كان متحفظاً عليه، هذا إن كان خرج من البلاد فعلاً.

عموماً وحتى لا نفسد فرحة الفرحين، وحتى لا نكون مثل عواجيز الفرح الذين يتفرغون لسيرة الناس، ندعوكم أن تستمتعوا بما تعتقدون أنه الديمقراطية، وأن تنشكحوا بالتصويت، وأن تحتاروا بين المرشحين، وأن تتلهفوا فى انتظار النتائج، وأن تنسوا تماماً أن النواب أنفسهم لا يعرفون كيف ستشكل الجمعية التأسيسة للدستور، وهى أهم مهامهم وأولها، وأنهم لن يشكلوا الحكومة، وأن تتذكروا أخيراً.. أنها كانت انتخابات برلمان.. ولم تكن استفتاء على شرعية الحكم العسكرى.

حاشية: لا تظن ان الانتخابات هى منتهى الديمقراطية، فهى فى الحقيقة مبتدأها، وأول ما فيها، ومازال هناك الكثير لنتعرف على المعنى الحقيقى لها، الذى حرمونا من التعرف عليه منذ تعرفت مصر على البدلة الكاكى.

1

2011-11-22T17:55:00.000+02:00

غريب فعل الكتابة وصعب حين تعرف أن الثوانى التى تستغرقها فى الكتابة تساوى روح شهيد أو نور عين بطل، أنت تكتب وهم يفعلون، ولكن طالما وزع الخالق الأدوار ، فعلينا أن نفعل ما يجعلنا نشكره على نعمه.

سيدى القارىء المبجل، حين تجد نفسك مستغرباً منطق هذا الشباب المندفع الذى يرفض كل محاولات التهدئة والتنويم والاستعباط التى تمارس حالياً من كثير من الساسة، إعلم حفظك الله أن الفتى الذى خلع قميصه ليرتدى قميصاً غارقاً بالدماء خلعه من على جسد صديقه العشرينى الذى تلقى رصاصة فى وجهه، وعاد بالقميص بعدما أوصل صديقه للمستشفى الميدانى ولفظ أنفاسه هناك بين يديه، هذا الفتى لن يفهم غثاء من يتكلمون عن ضبط النفس أو حسابات المكسب والخسارة، ولن يبقى فى عقله سوى رجاء لله أن يجعله يأخذ حق رفيقه الشهيد الصغير أو أن يلحق به، فهما لم يفترقا منذ سنوات.

سيدى، وأنت تقرأ هذه الكلمات جالساً فى مكتبك أو غرفتك أو سيارتك، اعلم رعاك الله أن هناك فتية يمارسون فعل الحياة الصعب بين رصاصات وغازات وحجارة، جميعها تذهب إليهم بحقد وغل وقسوة وغباء لتحصد أرواحهم، فيستقبلونها بلهفة وشوق وجنون خال من الخوف، شباب حين تشتد الهجمة عليهم كل بضعة دقائق يهتفون بصدق وحب "هيييه.. هنموت".

سيدى، وأنت تمشى بعينيك على السطور، هناك شباب يقفون أمام مدرعات وبنادق وقناصة مدربون، شباب هاج عليهم الرصاص فجأة، فبدأوا فى الجرى هرباً، واحد منهم وهو يجرى كان يهتف "إثبااااااااااات" علّ باقى الشباب يستمدون من هتافه الشجاعة فيقفون طالما هو غير قادر على ذلك، وعاد بعدما اكتشف ما هو فيه، عاد ضاحكاً مبتسماً ليقف فى الصف الأول حينما اكتشف أن الشجاعة الموجودة بداخله تعينه على الوقوف فى وجه كل الجبناء المستترين خلف جنود يموتون ليعيشوا هم.

سيدى المتسائل، من أين يصرف هؤلاء الشباب وكيف يقدرون على البقاء كل هذه الأيام دون أن يكونوا مأجورين مدفوع لهم، اعلم أعزك الله أن شابين على خط المواجهة الأمامى قال أحدهما للآخر وهو يتراجع قليلاً "يا عم أنا ماكلتش بقالى يومين.. ماليش دعوة أنا رايح آكل"، فرد عليه رفيقه "أكل إيه دلوقتى يابن الكلب.. إحنا لازم نرجع دلوقتى عشان مايدخلوش".. وأرجوك أن تعلم أنهما عادا، دون طعام، وحتى تكتمل الصورة عند حضرتك إعلم أن شاباً دخل الميدان يوزع ساندويتشات فول وطعمية اشتراها بنصف النقود التى سيعيش بها هو وزوجته لباقى الشهر، وحين أخرج لفافة بها "1 فول و 1 طعمية" ليعطيها لشاب كان يبدو عليه الإرهاق الشديد مع ساعات الفجر، رفض هذا المرهق بعزة تليق بملك، وأمام إصرار الموزع، أخذ "الواحد فول" وأصر على إعادة "الواحد طعمية" لأن هناك غيره من يحتاجه أكثر منه من وجهة نظره.

سيدى المهتم بالسياسة المتابع لها على شاشات التليفزيون، إعلم وقاك الله شر الفتن، أن أى طرح سياسى يرضيك للخروج من الأزمة "وهم كثر"، لن يستمد شرعيته إلا إن كان خارجاً من بين الكتلة البشرية المرابطة فى ميادين التحرير، وأن أى سياسى يخرج عليك من الشاشة ببدلته الأنيقة وشعره المصفف لن يفهم ما يريد أهل ميادين التحرير إلا حين تتعفر ثيابه معهم، وتدمع عيناه من غاز الأعصاب مثلهم، ويجرى بينهم حين يهجم الغاشمون.

سيدى الرافض للنزول، إن كان رفضك عن قناعة شخصية، فحاول أن تمنطق الأمور مرة أخرى قبل أن تقول لهم "الميدان مش هيطير..روحوا دلوقتى ولو ماعملوش اللى انتم عايزينه ارجعوا تانى" فهم لن يذهبوا هذه المرة إلا منتصرين، بعدما خُدعوا بمثل هذا الكلام مرة سابقة، وتأكد أن ما بين من فى ميادين التحرير وبين من فى سراديب السلطة حالياً هو الدم، ودعنى أضم للكلام الآن صديقك الممتنع عن النزول تنفيذاً لأوامر شيخ أو أمير أو مرشد، واذكركما هداكما الله أن "الشَّهْرُ الْحَرَامُ بِالشَّهْرِ الْحَرَامِ وَالْحُرُمَاتُ قِصَاصٌ فَمَنِ اعْتَدَى عَلَيْكُمْ فَاعْتَدُواْ عَلَيْهِ بِمِثْلِ مَا اعْتَدَى عَلَيْكُمْ وَاتَّقُواْ اللّهَ وَاعْلَمُواْ أَنَّ اللّهَ مَعَ الْمُتَّقِين" 149سورة البقرة، وفى شهرنا الحرام هذا، وبعد الاعتداء على حرماتنا وبناتنا ونساءنا وأرواحنا وبيوتنا، فنحن نطلب القصاص "السريع"، والعين بالعين والسن بالسن، والبادى أظلم، البادى أظلم، البادى أظلم، وهذا أهم من رأى من أمرك، أو من تتبعه لاغياً عقلك.. استفت قلبك واسأل عن دماء الشهداء ونور عيون الشباب وعرض البنات وحرمة الجثث الطاهرة، وتعلم من ماضيك وانظر لمستقبلك وأعد التفكير.

سيدى القارئ، فى الوقت الذى استغرقته لقراءة ما كتب هنا، صعدت أرواح شهداء للسماء، وفقدت عيون بريقها، وزاد عددنا اضعافا، واقتربنا من النصر خطوات، فافرغ من القراءة واختر مكانك.. فى الميدان.. أو فى خانة الصمت القاتلة التى تساعدهم علينا.
حياك الله

حتحتة الأسبوع

2011-10-30T03:25:00.001+02:00

- - فى انتخابات البرلمان المقبل، بودى لو استطعت التصويت لكل المرشحين الشباب، حتى الفلول منهم، فمن حقنا أن نخرج من المتحف الذى عشنا فيه، حتى لو كنا سنذهب لجنينة الأسماك.

- - المشكلة الحقيقية ليست فى أعضاء الحزب الوطنى، بل فى أعضاء الأحزاب الأخرى الذين كانوا يقبلون بالتمثيل فى مسرحيات الحزب الوطنى.

- - من حقك أن تعترض على طريقة قتل القذافى والتمثيل بجثته، لكن كى تلوم من فعل ذلك، دعنى أقتل أخاك وأغتصب أختك وأدمر منزلك وأضع جثة أبيك فى ثلاجة عشرين عاماً، وقل لى كيف ستقتلنى بعد ذلك.

- - الغلطة الوحيدة التى يرتكبها من يموتون عظاماً، هى أنهم لا يقولون لنا قبل رحيلهم من هم أصدقائهم الحقيقيين، فيتركوننا لكل من هب ودب يتكلم عنهم وباسمهم، دون أن يعودوا ليكذبوه.

- - رغم حزنى على رحيل أيقونات حياتنا، لكنى متأكد أن جيلنا به أيقونات أكثر ستكون يوماً ما علامات فى كتاب تاريخ مصر.

- - لو كنت ستتكلم فى مشكلة يتكلم فيها الجميع، أرجوك حاول أن تجد لها حلاً، بدلاً من أن تكون لتاتة جديدة فى قعدة النسوان.

- - لو أردت منى أن اتكلم عن بكرة، أرجوك أن تغلق كل حوارات الأمس التى مازالت مفتوحة، وهى لن تُغلق بلا حلول واضحة تساعدنى على فهم أسلوبك الذى ستعاملنى به بكرة.

- - حين يقول الرجل الكبير فى السن أن "تويتر" هو أرض الضلال، لن ألوم عليه، بل ألوم على من تركه يتكلم فيما لا يفهم فيه.

- - أشفق على من يصر على استضافة العواجيز ليتكلموا عن المستقبل، وكأنه يمنحهم سبباً لتشويه المستقبل كما شوهوا الماضى، ولكن فى الوقت ذاته لا أقبل أن أطلب منه أن يستضيف الشباب، فأنا أعلم حدود شجاعته، وهى لا تحتمل حدود شجاعتهم.

- - بقدر الألم من أن الدماء التى سالت لم تجد من ينتصر لها بالقانون، بقدر سعادتى أنهم لم يتعلموا من درس من سبقهم، وتركوا الدماء تملأ نفوسنا، ليقينى من أننا سنمتلىء وننفجر مرة أخرى.

- - معظم من يتكلمون بصفتهم عمالقة الثورة، هم بساريات فى بحر الحقيقة، فالحيتان بطبعها قليلة الكلام.

- - سؤال محشور فى زورى بقاله أسبوعين، هو لما صفوت حجازى يبقى أمين الثورة، عم محمد هاشم يبقى إيه.. رئيس مجلس الإدارة؟

- - "بلدى مهما هتتضيع مش هتضيع" خالنا عبد الرحمن الأبنودى.. ربنا يديك الصحة ويباركلك بحق كل الحاجات الحلوة اللى زرعتها فينا.

- - وككل عام تمر ذكرى وفاة نجيب سرور فى صمت يليق بعظمته، فلا كرامة لنبى فى وطنه.

حاشية: الموسيقى والقراءة والمشى فى الشوارع الصديقة، كلهم رفقائى، وكلهم معى يحبونكِ ويحبون وجودكِ فى حياتى ووجودى فى حياتِك، واستنادك على كتفى هو ما يمنحه القوة، ورفقتك هى ما تجعلنى أستمر فى حب نفسى.. وحب مصر.

خليها تاكله

2011-10-22T20:32:00.003+02:00

من أسبوعين كتبت مقال فى الجرنال عن "شيخ شقة العجوزة" ونزل السوق مع أحداث ماسبيرو، نسيته وتعمدت ما انشروش عشان مش ماشى مع الأحداث..
اليومين دول ومع ظاهرة "الحوينى.vs جمعة" افتكرته
اعتقد المغزى واحد.. واللى أفلم فيلم شقة العجوزة هو اللى بيافلم فيلم الحوينى..
ماتيجو نشوف المقال.
......................................................................................................................................

صباح الفل، سؤال سريع.. لو وإنت ماشى فى الشارع لقيت واحد هدومه مقطعة وشكله "رايحة منه" خالص، وواقف يشتم فى خلق الله بدون سبب وساعات كمان يحدفهم بالطوب أو يضرب حد ولاً يشد هدوم حد.. هتستغرب من تصرفه ده؟ ماعتقدش.. ببساطة هتقول فى سرك "مش هعمل عقلى بعقل واحد مفوت".. طيب.. لو لقيت واحد بقى ُكبارة كده ومتأيف ومتأنتك وشكله متزن وواعى ومسئول.. بس برضه عمال يشتم فى خلق الله ويشدهم من هدومهم ويحدفهم بالطوب، هتعمل إيه بقى؟.. ممكن تمسكه تضربه.. وممكن تجرب تتكلم معاه، يمكن عنده مشكلة لحظية أو جنون مفاجىء مؤقت تحاول تساعده على عبوره، تمام قوى، عملت كده(ضربته أو اتفاهمت معاه) والراجل إعتذر عن غلطته وتأسف للناس وعاد لعقله وثاب لرشده، وانت كملت مشيك وسنكحتك، تانى يوم وانت رايح مشوار مهم جداً ولازم تلحقه، فى نفس المكان لقيت وياللعجب نفس الراجل يمارس نفس الأفعال الشاذة، ولكن هذه المرة وجدت بصحبته عصبة تحميه وتساعده وتؤكد إنه عنده حق فيما يفعله، بل وتجدهم يؤكدون أن الناس فى الشارع تستاهل اللى الراجل بيعمله فيهم، ساعتها بقى هيبقى فى كلام تانى.. ممكن تحاول تضربهم كلهم، ولما تلاقى ده صعب تحاول تجمع عدد من أبناء منطقتك للتصدى للرجل وعصبته، سواء بضربهم أو بالتفاهم معهم ولكن وأنتم عصبة تماثلهم وتتفوق عليهم، بس ثوانى.. إفتكر يا معلم إنك عندك مشوار مهم جداً هيحدد مصير حاجات كتير فى مستقبلك إنت وأبناء منطقتك، هنا بقى يبقى فى كلام تالت، تشوف بقى مين الأهم، التصدى للراجل ولا اللحاق بالمشوار.

لوز العنب، إحنا دلوقتى عندنا مشوار صغير كده لحد المستقبل، عندنا مواعيد مهمة كتير لازم نلحق نستعد لها، نجهز نفسنا لانتخابات،وننزل الشارع والقرى والنجوع نكلم الناس عن الواقع وعما نحلم به لنا ولهم، ونشرحلهم كدب الكدابين ونفنده، ونقنعهم إن العمدة هجاص وشيخ الغفر هجاص، وكمان شيخ الجامع هجاص ومفاتيح الجنة مش معاه، نسيب بقى كل المشاوير المهمة دى عشان الأخ اللى واقف يحدف الناس بالطوب ويقولك مش عارف مين راح شقة فين ومين ربنا خده فداء للثورة، ونجيب الرجالة ونتخانق معاه وننتفله دقنه العيرة علشان نكشفه على حقيقته قدام نفسه، وإحنا متاكدين إن اللى ماشيين وراه مسلمينله دقنهم ولو قالهم إرموا نفسكم فى البحر هيرموا، ولا نستنصح ونفكر إن البرنس بيلاعبنا حاورينى يا كيكا وبيلهينا ويجيب اللى فيه فينا، لذلك لازم نطلع أنصح منه ومن لعبته الخايبة ونركز إحنا فى مشوارنا ونسيبه يمارس طق الحنك هو واللى وراه، وم الآخر.. نخليها تاكله، وجهة نظرى البسيطة إننا نخليها تاكله.. إنت إيه رأيك؟

حاشية: الراجل بينفذ المطلوب منه، يبقى سيبك منه، وشوف مين اللى عايزه يعمل كده.. وليه، ساعتها هتكتشف إنه غلبان ومش أكتر من عروسة ماريونيت.. بس ليها دقن.. لذلك..خليها تاكله.

إغضبى يا دنيا

2011-10-20T16:14:00.000+02:00

يأسك وصبرك بين إيديك وانت حر.. تيأس ما تيأس الحياة راح تمر.. أنا دقت مندا ومندا عجبى لقيت.. الصبر مر.. وبرضك اليأس مر.. عجبى.

ما هو صلاح جاهين ما بقاش صلاح جاهين من شوية، وإحنا كمان ما بقيناش إحنا من شوية، إحنا اللى كل الناس الكبار اللى حوالينا بيحاولوا يوصلولنا إننا مش فاهمين ملاعيب السياسة، وهم نفسهم فى نفس ذات الوقت مش عايزين يعترفوا إنهم عاشوا عمرهم مش فاهمينها، ولا كانوا قادرين يغيروا فيها حاجة، كانت بتلعب بيهم.. من تحت.. لفوق، والنهاردة.. النهاردة، جى تقول إنسى الآهات.. جى تقولى يلا بينا مش عارف إيه فات؟ بقى ده إسمه كلام؟ طيب إيه رأيكم بقى إن انتم جيل خواف وعايز يخوفنا، وإحنا جيل برنسات وسنعيش ونمارس البرنسة، وسنزداد برنسة على برنستنا.
لمعة الغضب والضحك للحرية اللى اتحفروا على وشوشنا فى شوارع البلد دى يوم 28 يناير مش هيتمسحوا، لا بسهولة ولا بصعوبة، مش هيتمسحوا، هنعدلها، عافية ذوق هنعدلها، صحيح هيطلع عين اللى جابونا لحد ما ننضف أمخاخ الناس اللى سبتوها تتعصر فى مفرمة الغباوة أكتر من 30 سنة، بس زى ما كنسنا الميدان ونظمنا المرور، هنعرف ننضف العقول، تصدقونا ماتصدقوناش، تشاركونا ماتشاركوناش، تحبطونا ولا تساندونا، هناخد دورنا بالعافية، الحرية مش ببلاش، وإحنا متاكدين من كده، كلنا بننزل ندفع التمن، واللى بيرجع مننا بينزل تانى يدفع التمن، واللى راحوا مننا هيتفوا فى وشنا لو ماكملناش.
إحنا على فكرة مش واخدينها عند، ولا بنكابر وخلاص، إحنا بناخد فرصتنا بايدينا، فرصتنا اللى كتير من اللى قافشين البلد مش عايزينا ناخدها، علشان خايفين على أماكنهم، كلهم، النضيف والوسخ، الثورجى والمستقر، الطيب والشرس والقبيح، اللى علينا واللى معانا، كلهم عايزين يتكلموا وينظروا وطظ فينا، بس كلهم من جواهم عارفين إن يومينهم بيخلصوا، والفورة هتخلص، والدومينو هتقفل وكله هيعد ورقه وهيطلعوا هم الغلطانين.

صحيح اليأس إبن الكلب ساعات بيقدر يدّحلب ويتسرسب فى شرايينا، بس كرات الثورة البيضا بعد شوية بتلطشله وترميه برة، صحيح إحنا كلنا لسه مدفونين لحد دلوقتى، بس اللى احيانا فى يناير قادر يعرفكم إننا لسة عايشين.

الكلام ده لازمته إيه تانى دلوقتى.. الكلام ده بنقوله لبعض عشان نفكر بعض، أصل إحنا كل شوية لما بتتغفلق علينا بنتعب وننّخ، ولما بنشوف الدم على الأرض خريطة بتكبر، ساعات بنئن وروحنا بتعجز، بس بنرجع نفتكر إن الخريطة مشتاقة ليوم الحرية ، ويوميها الدنيا هتغضب ويا الغاضبين، عشان الدما ع الأرض رمز العاشقين، اللى راحوا علشان نعيش إحنا، وهنعيش إحنا، حتى لو قررتوا تخلصوا علينا، اللى هيفضل مننا هيعيش، إحنا اللى هنكمل باللى بقيوا، واللى مش مصدقنا دلوقتى، بكرة هيضرب كف بكف، لما يشوفنا طالعين بننادى بالقبض على القبضة.. وتقديم الكف، وبنرقص رقصة "الأحزان العادية".

حاشية: محدش فينا عنده استعداد إن خالد سعيد وسيد بلال ومينا دانيال وهما قاعدين مع بعض يزعلوا مننا، لازم نكمل، علشان لسه "صوت الشهيد مسموع" ولسه "قلب البلد موجوع".

تاريخ الرسم

2011-10-06T05:33:00.001+02:00

زمان فى حصة الرسم لما كان المدرس بيقولنا نرسم عن حرب أكتوبر، كنا عادة بنرسم شوية مية زرقا معتبرينهم قناة السويس، وشوية رمل بنى معتبرينهم خط بارليف، ودبابة معتبرينها دبابة، وعسكرى أو كام عسكرى لابسين بنى مرقع (وهو مفهومنا عن المموه) معتبرينهم جنود مصر فى الحرب (بيكونوا فى خيالنا شبه محمود ياسين فى "الرصاصة لا تزال فى جيبى")، وعلم مصر الصارى بتاعه طويل جداً، ودايماً كان النسر الأصفر بيبقى أكبر حاجة فيه، وممكن بقى حد يضيف عسكرى لابس أخضر معتبره إسرائيلى، وكان فى ناس كتير بترسم طيارة فى سقف الرسمة متأثرة بكمية الطيارات اللى بنشوفها فى فيديوهات وأفلام العبور.

فى الوقت ده ما كناش بنركز فى الأسامى، لا مبارك بقى ولا جمسى ولا أحمد إسماعيل، ولا حتى سادات، يمكن كان أشهر واحد عندنا هو عساف ياجورى اللى اتعكش من قفا أمه، كان البطل بالنسبة لنا هو العسكرى المصرى الشجاع اللى كان بينام تحت الدبابة وهى ماشية فوقيه ويلزق فيها القنبلة، والعسكرى التانى اللى بيفتح الدبابة ويرمى القنبلة جواها، والعسكرى التالت اللى بيرفع العلم وينضرب رصاصة ويفضل ماسك العلم لحد ما زميله ييجى يكمل مهمته المقدسة، ومعاهم طبعاً عبدالعاطى اللى بيشيل الـ"أر بى جيه" ويصطاد الدبابات زى ما احنا بنصطاد العصافير بالبندقية الرش.

المشكلة الحقيقية إن كل العساكر اللى كانوا أبطال فى خيالنا دول عدى التاريخ عليهم من غير ما يقف كتير، لأن التاريخ دايماً بيكتبه ناس اختاروا إنهم يكونوا مع الرصين، اختاروا إنهم يكتبوا زى اللى سايق ما عايز، اختاروا إنهم يربطوا البطولة مطرح ما صاحبها يحب، اختاروا إنهم يشوهوا التاريخ فى رؤوسنا وخيالنا وكتبنا وأفلامنا، كتبوه زى ما إتملوه مش زى ما شافوه وسمعوه وقرأوه، لذلك قرروا أن ينسبوا الحرب لأشخاص يلخصوا الجيش المصرى فيهم وفى حكمتهم ورؤيتهم وقراراتهم وإلهامهم.

لكن الجميل إن إحنا من طفولتنا متمردين على أنصاف الآلهة اللى حاول كُتاب التاريخ حقننا بيهم، الجميل إننا من بداياتنا.. حبنا وتعلقنا وفخرنا كانوا متوجهين صح، فطرتنا البريئة وقتها كانت منحازة للأبطال الحقيقيين اللى رووا بارواحهم ودماهم وقلوبهم تراب بلدنا، بعيداً عمّن حاول الناس اللى رووا التاريخ أن يجعلوهم أبطالاً بالعافية فى رواياتهم.

أطفال بدأوا حياتهم بهذا الشكل، وجيل نجا معظم أفراده –بصورة أو بأخرى- من منظومة التشويه المتعمد، اللى دخلها لابس مريلة زرايرها من ورا، وكاد أن يخرج منها بقميص المجانين ( اللى للصدفة العجيبة برضه زرايره من ورا)، هل كنتم تتوقعون منهم أن يحصروا الجيش المصرى فى شخص أو مجموعة أشخاص يعتلونه؟!.. تبقى المشكلة إنكم ما اخدتوش بالكم من كراسات الرسم بتاعتنا زمان، ولسه مصرين تتجاهلوا الحاضر اللى بنرسمه فى كراسة الوطن حالياً.

حاشية:حاولنا وإحنا صغيرين نوصل صوتنا وخطوطنا، رفضتوهم، دلوقتى قررنا نوصلهم حتى لو رفضتم، لذلك إنسوا كراسات الرسم، الامتحان خلص، وانتوا ما قدرتوش تنجحوا فيه، خلاص .. الدرس انتهى.. لموا الكراريس.

أكبر منك بيوم

2011-10-03T18:59:00.000+02:00

ليس كل ما يلمع ذهباً، وليسوا جميعاً أنبياء، وليسوا جميعاً فاهمين للتيتة وما فيها، ليس كل المنظّرين يدركون حقاً ما هم بصدده، وليس كل من يتصدى للفتوى فاهم لحقيقة وروح ما يتصدى له، بل أن بعضهم "فتاى" بطبعه، ليس كل من سبقنا فى شىء لم يكن له يد فيه، ألا وهو أن يتزوج السيد والسيدة والده ووالدته لينجباه قبلنا، ليس له ميزة تجعله أفهم أو أعقل أو أعلم أو أكبرمنا، فالسن لم ولن يكن أبداً مقياسا، لفهم ولا عقل ولا علم ولا رجاحة ولا كان دليل تفوق، ولا هو لو تعلمون إشارة على وجود قدرة زائدة أو شجاعة أكثر مما لدينا، ولكنهم فقط تعودوا على أن يحقنوننا بمصل "عيب ده أكبر منك"، حتى يضمنون أن نبرأ مما يرونه مرضاً يسمى التمرد، كانوا دوماً يتفننون فى إخضاعنا وتحجيمنا، ولم يكونوا يتصورون أن ننجح فى الخلاص من كل ما حاولوا زرعه فينا، أو زرعنا فيه، لم يكونوا يتصورون أن نخرج من "قمقمنا" لنكتب حاضرنا الذى يرسم مستقبلنا الذى لا نريده أن يشبه ماضيهم، وحينما تفاجئوا بما فعلناه، إندهشوا قليلاً، لكنهم وبخبرة من تعود على القهر حتى استساغه، قرروا أن يتمردوا هم أنفسهم على دهشتهم بعد فترة قضوها وهم يتابعوننا نتحرك، ورأوا أن يعودوا للنغمة القديمة، لنعود نحن لسماع الكثير من "عيب .. ده أكبر منك".. لكن هيهات، ما عاد فينا من الصمت والصبر ما يسمح لنا بأن نستمر فى الدور الذى يحاولون جاهدين أن يضعوننا فيه.

إخوانى فى الجيل الذى فعل ما لم ينتظره أو يحلم به من ربوه، عيشوا تمردكم وجنونكم ونزقكم وإندفاعكم وتمردكم، عيشوا كما تريدون، ولا تتوقفوا كثيراً أمام محاولات تثبيط الهمم المنظمة التى يمارسونها علينا، لا تتوقفوا أمام كل من يحاولون جاهدين أن يثبتوا أن ما يجرى مؤامرة أكبر من أن ندركها نحن بعقولنا الصغيرة، فعقولنا تلك حتى إن كانت صغيرة، قد أبدعت ما عجزت عقولهم الكبيرة عن فعله، وإن كان بعض منهم وبعض مما قدموه قد بنى الكثير فى عقولنا وأرواحنا، فهذا لا يعنى أن ما يجرى عصىّ على فهمنا، وإن كانت هناك إحتمالية لذلك، فهناك إحتمالية تقابلها أن عقولهم هى التى لا تقدر على مجاراة الأحداث وفهمها وتحليلها وتوقعها.

لن ننكر ما بناه من قبلنا ولن نهدمه، لكن ليس منطقياً أن نعود لكراسينا لنتركهم يرسمون الحاضر، بعدما أخذنا بايادينا ودمائنا وأرواحنا فرصتنا فى رسم الـ"زمكان" الحالى، واللى مش عاجبه.. ما يلعبش معانا.

حاشية: لو بالسن.. كانت أى مومياء فى المتحف تبقى أحسن مننا كلنا، وأكبر منك بيوم.. مايفرقش عنك غير إن أبوه قابل مامته بدرى شوية.. لهذا.. العب وبوظ، واللى بيتكسر بيتصلح.

عِش أنت

2011-09-27T04:37:00.001+02:00

لا تفكر كثيراً حين تكتشف فجأة أنك أضعت الكثير من الوقت بلا فائدة تذكر، لا تكن غبياً لدرجة أن تبقى مكانك تبكى على ما ضيعت، بل كن قوياً بما يكفى لأن تنطلق لتعوض ما فات، ففى أيامنا هذه صار الندم رفاهية لا نمتلكها، لا تتوقف حين تكتشف أنك عرفت أناس لم يكونوا كما ظننتهم، بل ببساطة أسقطهم من حسابك وكأنهم ما كانوا، فمن الغباء أن تسمح لهم باحتلال مساحة من روحك حتى ولو كانت مساحة غضب أو حقد، لا تتوقف حين تكتشف أنك أضعت عمراً فى الأوهام، فالحقيقة تنتظر من يبحث عنها، لا تضيع وقتاً فى الكآبة وانت تفكر فى متاعب الفراق الذى سيقع قريباً، فمن الغباء أن تقضى لحظاتك الأخيرة مع من سيفارقك فى كآبة، عيشوها فى مرح حتى تأتى الكآبة فى موعدها، لا تمارس الدهشة لفترة أطول من اللازم حين تكتشف أن من صدقتهم وآمنت بهم كانوا "منفوخين فى السترة والبنطلون"، اندهش قليلاً ثم أمسك دبوسك الماسى وفجر "بلالينهم" الطائرة فى خيالك بنفسك، لا تمارس الغضب لمدة طويلة حين تكتشف أنك كنت تعيش عمراً كاملاً فى إنتظار ما لا يأتى ومن لا يأتون، فكونك قادراً على اكتشاف ذلك يعنى أن عمرك ما يزال به لحظات يمكنك أن تذهب فيها بنفسك لما ومن تقدر على الوصول إليه وإليهم، لا تكن غبياً لدرجة أن تمارس الحقد على البشر الذين يدوسون الأحلام فى طريقهم لأى شىء، ولا تكن غبياً لدرجة أن تعيش فى غرفة الغضب بسببهم وبسبب أفعالهم، فمن الحماقة أن تدع لهم فرصة لدهس عمرك ولحظاتك، لاتكن أحمقاً لدرجة أن تترك أحداً ما يعيث فساداً فى نفسيتك، أو يشوه ماضيك، أو يسخر من عيوبك، و يسفه تفاصيلك الصغيرة التى تبنى عليها حياتك الكبيرة، ولا تكن تافهاً لدرجة أن تترك أحداً يقنعك أن حياتك ليست كبيرة، فأنت محور الكون، وأنت جوكر الكوتشينة الذى سيقلب البولة كلها تماماً، أنت الهدف الذى سيأتى فى الوقت المناسب، وليس الوقت بدل الضائع، أنت فرس الرهان، أنت أنت بكل ما فيك وكل ما لك وما عليك، أنت تفاصيلك ولزماتك وأشياؤك وعثراتك وأخطاؤك وغباواتك وحماقاتك وأغنياتك وقراءاتك وكتاباتك، أنت بمن تعرفهم ومن تكرههم ومن تحبهم ومن تأتنس بهم، أنت رئيس جمهورية نفسك وواضع دستورها ومنفذ قانونها، أنت بكل أيامك "التى قد يعتبرها البعض قليلة فى حساب الزمن" تقدر على صناعة الحياة والأحلام، فرجاء.. كن إيجابياً وقوياً.. وتحقق.

حاشية:حياتك تعيشها أنت، وحياة الناس يعيشونها، فعش كما تحب، ودعهم يعيشوا كما يحبون، تدفأ بطاقتك الإيجابية، وإقلع الجزمة وإضرب أى حد هيشحنك طاقة سلبية، وعيش وماتنتهيش.

تعيش انت

2011-09-16T13:46:00.000+02:00

هل تستطيع اللغة العربية أن تموت، هل يموت الحكى والقص والسرد، هل تموت الحكايات المبنية من لحم ودم، المكتوبة بعرق بشر وروائحهم ولفتاتهم ولزماتهم وتفاصيلهم الصغيرة وخبايا أنفسهم، هل تموت الشوارع والحوارى والأزقة والمنعطفات والقبور والغرز والمقاهى، هل تقدر القرى والنجوع والكفور والمدن والبلاد أن تموت، هل يقدر الموت أن ُيغيب الحضور والبراعة والمتعة والحلاوة، هل للموت سلطان على الأفكار والخيال والصدق والحقيقية والنباهة والرجاحة، هل تموت التفاصيل الصغيرة الموجودة فى نفوس وقلوب وصدور وعيون وعقول ودماء البشر، هل تقدر القصة المحكية بحنكة ومهارة وصدق ومتعة وعذاب أن تموت، هل تقدر الرواية الخارجة من القلب قبل الذاكرة كدفقة واحدة ملؤها الشوق والشجن والحب والألم والأمل أن تموت، هل يموت نهر الكتابة غير المتوقف، هل يموت نبع الحكى السلس السهل المتدفق الغزير، هل تموت الصورة الدرامية الصادقة المأخوذة بحرفية، المعشقة تفاصيلها فى بعضها كقطعة أرابيسك مخدومة ومنحوتة بيد صنايعى حريف ذى موهبة ربانية يعرف كيف ينتقى قطعة خشب أصيلة ليحولها لتحفة فنية بارعة بديعة تسر الناظرين، هل تموت الأساليب اللغوية المنتقاة بعناية من منجم سحرى لا يعرف مكانه سوى من وهب عمره للحكى، هل تموت المنحة الإلهية، هل تموت مصر بما فيها ومن فيها، هل يموت البشر وتموت الحيوانات وتموت المواقف ويموت التاريخ، هل تموت الذاكرة المملؤة بالتواريخ والأحداث والأشخاص، هل تموت السطور والجمل والكلمات الفريدة المتفردة، هل تموت العيون المملؤة بحب الناس وحب الحياة وحب العمل، هل يموت الماضى وهل يموت الحاضر وهل يموت المستقبل الملضومين بعناقيد النور المعلقين على برج البلابل، هل تموت المواجع وتموت الهيصة وتموت المنامات وتموت الصحراء ويموت الفرح ويموت اللؤلؤ ويموت النعناع، هل يموت البسطاء والمطحونون والمنسيون على أرض مصر وفى قلبها، هل تموت أحلامهم ومتاعبهم وأفراحهم المغزولة بالأحزان وأحزانهم المغسولة بالأفراح، هل يموت القلب الذى ينبض بالبشر وحكايات البشر وملامح البشر وتفاصيل البشر وخبايا أنفس البشر ونقاط ضعف البشر، هل تموت علاقات الناس بالناس وحاجة الناس للناس وترابط الناس مع الناس، هل تموت القراءة السهلة المتعبة، هل تموت الكتابة الصعبة البسيطة المدهشة المندفعة بغزارة المتدفقة بلا حساب وكأنما تروى عطش الناس جميعاً لحروف تكتبهم فيقرؤنها وهى فى الأصل تقرؤهم، هل تموت الحنكة والحرفة المتمكنة والتمكن المحترف، هل يموت من منح غيره فرصاً للفهم والوعى والعيش والتثقف والتدبر والتمتع والإحساس والتعلق بالوطن والخوف منه وعليه والتحصن به وبلغته وحكاياته؟
لو كان كل ما فات ممكناً.. وقتها تموت أنت..

أبونا خيرى شلبى .. تعيش إنت.

حاشية: ضحكت وسط البكا وابتسمت له وسط السكوت وأنا بكتب، الراجل اللى ملانى حكايات ومتعة من غير ما نتقابل، ووجعنى وهو فاكر نفسه هيغيب، وأتاريه غلطان، اللى كتب وأمتع وأدهش وربى أجيال ..ماماتش يا عم خيرى.

ماتعجزش

2011-09-16T13:41:00.001+02:00

ليلتك بتضحك، مش حاسس إنك محتاج تشترى كتاب جديد لحد من عتاولة الكتابة وتقعد تقراه ساعة عصرية على شط البحر أو على أقل تقدير فى بلكونة بيتكم اللى اكتشفت فجأة إنك ماروحتوش من زمان لدرجة إنك بقيت بتشك فى شكل بعض تفاصيله، طيب مش حاسس إنك فى عرض حتة مزيكا رايقة تتسرسب جوا روحك وتسحبك معاها حتة كنت بتروحها زمان، طيب بذمتك مش هافّة عليك غنوة كنت متعود تدندنها فى الشارع ومن كام يوم لما جيت تدندنها لقيت نفسك ناسى آخر كوبليه، مش مشتاق تمسك إيد حبيبتك وتتمشى معاها وتتكلموا فى حاجة بتاعتكم لوحدكم وماتخصش باقى الناس وتدوبوا فى الكلام لدرجة أنكم تنسوا المكان اللى ماشيين فيه، مش هافف عليك يوم مع أصحابك فى الشقة اللى كنتوا بتروحوها من كام سنة وتبيتوا فيها وكل شوية حد يقول "وطوا صوتكم"، مش طالبة معاك تنزل فى عز الليل وتطلع تسافر على أى حتة من غير ما تقول لحد، مش عايز تدخل السينما لوحدك زى زمان علشان فى فيلم عاجبك وماحدش من العيال عايز يدخله معاك، مش واحشاك رميتك فى حضن أمك وهى بتلعب فى شعرك وبتضحك وهى بتتريق على موقف عمله أبوك وانت بتضحك معاها، مش مشتاق لحضن من أبوك من اللى من غير ولا كلمة ده؟.. لو الحاجات دى كلها واحشاك واكتشفت انك ماعملتهاش ومحتاج تخطط علشان تعملها.. مبروك.. انت بتعجز.

هى دى طبيعة المرحلة العمرية، ولا ده بسبب الحاجات اللى بتحصل حوالينا واللى خلت الواحد اللى يفكر فى الحاجات اللى فاتت دى يقول لنفسه ويسمع من الناس كلمة "يا عم إحنا ف إيه ولا إيه"؟، لو كانت طبيعة المرحلة العمرية يبقى إحنا بنعجز بفعل الزمن ومرور الوقت، أما لو كانت الحاجات اللى حوالينا، يبقى إحنا بنتسرق مننا، والعمر بيتسرسب من غير ما ناخد بالنا، ومش معنى كده إن اللى حوالينا مش مهم، بس الحقيقة إن إحنا كمان مهمين، إحنا بكل تفاصيلنا وتفاهاتنا وضحكنا وبكانا وهزارنا وجنانا وعبطنا وفلسفتنا وخوفنا وجرأتنا وشططنا وحكاياتنا واصحابنا وناسنا وونسنا والأماكن المبنية جوانا من كتر ما اتزرعنا جواها.

مش كل شىء بيفوت فى عمرنا بيجرح، قلب الحياة مليان حاجات وبتفرح، وحياة أبوك يا شيخ إتشعبط فى أى حاجة منهم لو ماعرفتش تمسكهم كلهم، إقفش فى تفاصيلك وحاجاتك علشان تتمسك بحياتك، أرجوك ماتسيبهاش لحد، ولو جه يوم ولقيت نفسك بتقو "أنا وحشتنى"، ما تتكبرش على الشوق، خد أول نسمة هوا أو أول هفة شوق، واقعد مع نفسك، قبل ماتعجز بجد.. روحك تعجز.. حتى وانت شباب.

حاشية: فى وسط كل ما يجرى يبدو الحديث عن تفاصيلنا الخاصة شيئاً هامشياً، ولكن من قال أن الأشياء الهامشية ليست أشياء مهمة.. اكتشفت أنى كتبت هذا المقال وأنا انتهى منه، وحين انتهيت منه تأكدت أنى كبرت عاماً آخر.. واقتربت.. أو ابتعدت.

حلاوتك يا مولانا

2011-09-16T13:39:00.000+02:00

يااااه، ذكريات كتير قوى وحلوة قوى عدت فى بالى أول ما سمعت المقطع اللى لا يزيد على دقيقة وكام ثانية، افتكرتنا وإحنا بنجرى علشان نلحق نصلى فى حتة قريبة من المسجد، وافتكرتنا وإحنا بنلم بعض كل يوم علشان نروح نصلى التراويح، علشان اللى مش ناوى يروح يتشجع باللمة وييجى معانا، وافتكرتنا وإحنا فى الصلاة لما بنساعد الناس تلاقى مكان وتقدر تصلى وهى مرتاحة، وافتكرتنا وإحنا طالعين من الصلاة بنجرى نتسحر بسرعة عند "ألبان السويسرى".. أيامها، وده كان من كام سنة، كان بيجى فى بالى إن الراجل اللى بيجيبنا كلنا علشان حلاوة وعذوبة ورقة صوته ده أكيد ليه فى حساناتنا نصيب.

إفتكرت كل ده وزعلت واتقهرت وندمت، زعلت على إنى كنت باحب شيخ صوته حلو، من غير ما أعرف إن دماغه مش حلوة، وزعلت على كل الناس اللى لسه بتصلى وراه وهى عايشة الحالة اللى كنا إحنا عليها معاه، واتقهرت على شبابنا اللى بيسلموا أمخاخهم لأى حد يحشيها بأى حاجة، وندمت على كل الناس اللى حاولت فى وقت من الأوقات أقنعهم بحلاوة الصلاة وراء الشيخ حاتم فريد فى القائد إبراهيم على كورنيش أجمل مدينة فى الدنيا.

مش عارف هتحس بكل اللى أنا حسيته ده أو هيفرق معاك لما تسمع الشيخ حاتم وهو بيدعى مؤخراً فى صلاة التراويح هذا العام قائلاً "اللهم عليك بالعلمانيين والليبراليين" ولا مش هتفرق معاك الكلمة ؟، ومش عارف الشيخ حاتم نفسه إزاى جاله قلب يقول كده.. يا شيخ حاتم.. منك لله.. على كل الحاجات الحلوة اللى شوهتها.

يا شيخ حاتم..ارجوك إعمل حساب على الفيس بوك، وقتها هتستفيد وتتعلم درس كبير قوى ممكن تاخد منه فكرة تغير بيها طريقة تفكيرك اللى عمرى ما فكرت فيها وأنا ملهى فى حلاوة صوتك اللى ماشفتش منك أمارة غيره، ويمكن تدعى لمارك زوكربرج لما تلاقى وانت بتعمل حساب إن فيه خانتين منفصلتين، الأولى هى "religion" ومعناها الديانة أو الدين، والثانية هى "political views" ومعناها الاتجاهات السياسة، وساعتها ممكن تتعلم إن الدين حاجة، والسياسة حاجة تانية، العلوم السياسية منفصلة، حتى لو كنت عايز تطبق الشريعة الاسلامية، مين قالك إن الشريعة الاسلامية تتعارض مع العلمانية أو الليبرالية!، ومين اقنعك ووراك كل الحشود دى بتأمن على دعاك، تدعى على ناس يدينوا بدينك ولا يعادوه، يا شيخ حاتم ..روح منك لله.

أخيراً.. كلامى عن ومع الشيخ حاتم، لا يعنى إطلاقاً إنى ممكن أتكلم مع ياسر برهامى السلفى السكندرى اللى حرم الفيفا –اللعبة مش المنظمة- ..عشان للصبر وللأدب وللعقل وللجدال حدود.

حاشية: يارب: فى ناس بتكرهنا فى الدين وف رجل الدين، وتقربنا لسب الدين، وبيألفوا على مزاجهم يارب.. ارحمنا منهم، وسهلّنا.. وصعب عليهم وعلى كل اللى بيصعب الحياة على الناس والدين منه براء ..يارب.

ناس فى أسبوع

2011-08-24T21:35:00.000+02:00

- زيارة عائلية سريعة لمنزل خالى، قلبت لكلام سريع فى السياسة عندما دخلنا والنقاش مفتوح بين المتواجدين عن عمرو حمزاوى، المهم أن خالى يرى أن شباب الثورة هم السبب الذى سخره ربنا لقيام الثورة التى كان لا بد أن تقوم، وقال عنهم "يوضع سره فى أضعف خلقه" وأكمل كلامه، دون أن يدرى أنهم حتى وإن كانوا أضعف خلقه، فهم صاروا حالياً أجمد وأنظف وأطهر وأقوى خلقه، هذا برغم كيد الكائدين وكل ما يلاقونه من ويل وتنكيل وتشويه من كل من هب ودب، وأنهم من سيكملون ما بدأوه برغم كل ما ومن يحاول منعهم.

- سائق تاكسى اعتبرنى صيداً مناسباً حين كنت أعانى الصداع بصورة تمنعنى من الحديث، ليقنعنى أن كل ما يحدث فى سيناء هو بسبب الفلسطينيين، وأن من قتل الشهداء المصريين على الحدود هم فلسطينيون، وأنه لا يحبهم ولا يصدقهم، وجدت أن الصمت هو أبلغ رد على شخص نجح النظام السابق فى تشويهه بصورة تجعله يكره الفلسطينيين ولا يفكر فى الاسرائيليين بسوء.

- الثانية مساء فى شارع جامعة الدول العربية مع زوجتى، فجعنا صوت نسائى يخرج من ميكروفون أتى من خلفنا فجأة، عندما عبرت السيارة وجدت سيدة تهتف فى الميكروفون بما نصه "دقنا الذل ودقنا العار .. من بعدك يا مبارك يا طيار" وبجوارها زوجها يقود السيارة فى هدوء، الشارع الخالى وعدم وجود أشخاص يسمعون نداءاتها المتكررة ويلاحظون عنتريتها المهدرة، مكنانى من مشاهدة القابع فى المقعد الخلفى.. إبنك الشاب اللى كان ورا كان بيضحك عليكى على آخره يا مدام.

- باسنت اتصلت بواحد من الشيوخ الأزهريين لتسأله عن فضل ليلة القدر فى حوار سريع لا يستغرق أكثر من دقائق تليفونية من وقته، بعد اتصالات متكررة بلا مجيب ورسالة على هاتفه الخاص تعرفه بشخصها رد عليها قائلاً "يا نعم؟"، ولما أخبرته بسبب الاتصال طلب منها أن تتصل به على الخط الساخن "19 مش عارف كام" لتترك الأسئلة على أن يأتيها الرد عبر نفس الخدمة –المدفوعة- خلال فترة وجيزة.. فكرت كثيراً فى وجهة نظر الشيخ المعمم ذو العلم، فلم أجد ما أقوله سوى "حلاوتك يا مولانا".

- خبر منشور عما يجرى فى سيناء، كتب من شيره محذراً من الاندفاع وراء الحرب.. علق مايكل "واللى استشهدوا دول مش هنجيب حقهم؟" فرد صاحب الخبر " بعد إسلامك أولاً يا مايكل.. ربنا يهديك للاسلام".. مايكل ما شتموش.. ولا انا.. خليها تاكله.

حاشية: "العلم سلاح جبار بيحول ليلنا نهار بيحارب النور بالنور ويحارب النار بالنار".. مقطع من أغنية قديمة هف علىّ هذا الأسبوع .. لكنه لم يمنعنى من الفخر باحمد الشحات الذى يسفه البعض ما فعله.

مخمضة

2011-08-18T15:59:00.000+02:00

غفلقة وعوء وتربنة وقرف وترقب وقلق وحاجات تانية ماينفعش تتكتب لخروجها عن الآداب العامة، هى دى شوية الحاجات اللى الواحد بقى عايش معاها اليومين دول، وده برغم إننا فى شهر كريم وفضيل وأيام مفترجة، بس نقول إيه بقى، منهم لله اللى كانوا السبب، وهم كثر.. اللى خلونا نتمخمض نفسياً وإحنا شايفين برامج ومسلسلات "بتهس" فى أى حاجة، بس المهم كل واحد من صناع أى عمل منهم يلزق أى حاجة يتمحك بيها فى الثورة علشان يبقى مواكب للحدث وراكب الموجة، وشوية إعلانات تخلى الواحد يمتنع عن متابعة المدعوق التليفزيون قبل الإفطار لما له من آثار سلبية على اخلاق الصائم.

كل ده كوم والأمور السياسية وتطوراتها كوم تانى خالص، ما بين محاكمات يتفنن المتهمون بها فى الإبتسام والإشارة بعلامات النصر والنوم والاستهبال والاستنطاع فى مواجهة الكاميرات، كنوع من أنواع الحرب النفسية ضد أبناء هذا الوطن ليستكملوا ما بدأوه منذ أعوام بعيدة، وهو مخططهم بالقضاء علينا.. جمعاء.

ولو ربنا كرمك وتابعت أخبار المحاكمات العسكرية للمدنيين اللى بيحالوا للقضاء العسكرى بتهم تتراوح بين سب المشير والمجلس على تويتر، أو سبهم على الفيس بوك، أو سبهم فى المظاهرات، ساعتها ستكتشف أن السب أشد من القتل.. والمدنيين أقل درجة من العسكريين، وهو ما قد يجعلك "تتحصر" فى حال ما لم تكن "كاكى".

تطلع من مصر تلاقى الأخ بشار بيتكفل يومياً بحالة قرف وذل ومهانة تمر بنفوس وقلوب وصدور وعقول عدد مهول من المصريين، لا ينافسه فيها سوى صور المجاعة الصومالية، لنتأكد جميعاً أن بشار ورجاله هم كارثة طبيعية حلت بالعالم العربى، وليس نظاماً كباقى الأنظمة.

يمكنك أن تتوقف عن متابعة كل ما يجرى على كافة الأصعدة وتقرر النزول للشارع، وساعتها سيتكفل عدد كبير من المصريين بتكدير مزاجك العام الخاص بأفعال لو حللتها تحليلاً موضوعياً ستعترف بقدرة النظام السابق على تدمير وتشويه نفسية وأخلاق المصريين بما يثبت أنهم كانوا يعرفون ماذا يفعلون.

هل يكفيك كل ما فات من طاقة سلبية، هل غضبت وقرفت وشعرت أننا لن نرى النور ولو بعد حين، هل جال بخاطر أحد منكم اننا "قدامنا 100 سنة عشان نبقى أى حاجة".

طب تصدق بإيه، وحق من خلاك تقرا الكلام ده ومن خلانى أكتبه.. كل اللى فات ده هيعدى، كله هيتمسح بأستيكة، والبلد دى هتشوف النور، وهيتعدل حالها وهتبقى دولة بجد، وحياة كل الدم الطاهر اللى حنا شوارعها، وكل العيال اللى يقولوا للشمس ماتطلعيش وإحنا نورنا كفاية، وكل البنات اللى يقولوا للقمر قوم ونقعد مطرحك.. وغلاوتك انت عندى الحال هيروق ويحلو.. ولو سألتنى بأمارة إيه ؟ هقولك.. لو من تسع شهور قلتلك إنك هتشوف مبارك نايم فى قفص.. كنت هتصدق ؟

حاشية: وحياة اللى بينا يا معلم، ماتتقفلش من أول شوية كلام.. كمل للآخر، علشان إحنا لو كنا اتقفلنا من أول عشرة خمستاشر سنة عشناهم فى البلد دى، ماكناش وصلنا للى إحنا فيه دلوقتى، وحياة كل لحظة حلوة عدت فى عمرك.. تفاءل.

تكيلم .. تكيلم

2011-08-12T01:41:00.000+02:00

الحمد لله إن الواحد بليد فى الحساب، لذلك لا أواجه مشكلة عندما أكتشف أنى غير قادر على إحصاء عدد المسلسلات الدرامية والكوميدية والثورية والتاريخية، ومعها السيت كومات بالطبع، كما تساعدنى بلادتى فى عدم القدرة على إحصاء عدد البرامج الحوارية والسياسية والمقالبية والكاميرا خفية والكلامية والدينية والأكلية والاستظرافية والاستلطاخية، والتى يتنافس فى تقديمها عدد لا نهائى من مذيعين وصحفيين وأفاقين وممثلين ومغنواتية ومطبلاتية وكفتجية تتباين مؤهلاتهم وثقافاتهم وخلفياتهم السياسية الثورية منها والفلولية، تلك البرامج التى يتناوب على الظهور بها عدد من الممثلين والسياسيين والصحفيين ولاعبى الكرة ولاعبى البيضة والحجر واللى على كل لون يا باطيستا، وبالطبع يبقى للبلادة الحسابية التى يعانى منها العبد لله فائدة أخرى تتمثل فى عدم قدرتى على الإلمام بعدد الاعلانات التجارية الجديدة التى تعلن عن بطاطس ومياة غازية ومشروبات مش روحية ومنتجعات سياحية وسمن وعسل وسكر وأجهزة منزلية وجمعيات خيرية وخيريات جمعية... وأندر ويرات.

لكن مع الأسف الأسيف والحزن الحصيف تبقى فى رأسى منطقة بعيدة عن البلادة الحسابية، وهى المنطقة المنطقية، التى اكتشفت أنها تزخر بالعديد من الشتائم التى يعاقب عليها القانون والعود والدربكة، والتى أحاول بقدر الإمكان عدم استخدامها فى ساعات الصيام الطويلة، مما يسبب حالة من الانتفاخ السبابى بعد الإفطار حين أظل أكيل الشتائم لكل من فتح بكابورت الكلام يوماً ما ليحدثنا عن تأثير الثورة السلبى على عجلة الانتاج، التى اوقفها شوية العيال الفاضيين اللى كانوا قاعدين فى ميدان التحرير الذى هو واحد من أكثر من 10 ميادين كبيرة تتضمنهم العاصمة، بخلاف عشرات الميادين الأخرى الواقعة فى باقى محافظات مصر المحروسة، ورغم أنه ميدان واحد وحيد، إلا أن المعتصمون به استطاعوا أن يوقفوا عجلة الانتاج فى جميع مدن مصر بالصلاة على كامل النور، وكأنهم قد استأثروا بالجادون هم ومن لف لفهم.

بالعقل والمنطق والحساب والعلوم والجغرافيا والتاريخ أرجو من كل من يمتلك عقلاً يستخدمه فى هذه البلد –لأن هناك من يمتلكون عقولاً يتكاسلون عن استخدامها ويستسهلون ترديد كلام يسمعونه- أن يقل لى هل كل البرامج التى يحصل ضيوفها على مبالغ نظير ظهورهم فيها، بخلاف تكاليفها الانتاجية، وهل كل المسلسلات الرخوة والخروية المقدمة على شاشاتنا والتى تتفاوت ميزانياتها، وهل كل المنتجات الجديدة وكل المنتجعات الجديدة وكل الكافيهات الجديدة وكل الخيام الرمضانية الجديدة.. هل كلها لا تدخل ضمن اسم النبى حارسها وضامنها وصاينها بسكلتة الانتاج المتوقفة بسبب المتنيلة على عينها الثورة.. ولا هى البسكلتة واقفة فى المصانع بس، وبتاخد لفة فى الهايفة.

حاشية: كان عندنا ثورة، وكان عندنا عجلة، وكان عندنا شعب، ويبدو أن الشعب نزل ولم يجد العجلة أمام المنزل، فاتهم الثورة بانها أخدتها لفة.. بينما الحقيقة أن العجلة هناك من يلف بها .. فى سكة البلحة المقمعة.

للذكرى

2011-08-06T21:40:00.001+02:00

كان فى شاب إسمه خالد سعيد، وكان فى شاب تانى أكبر فى السن شوية إسمه سيد بلال، الأول كان بيسمع مزيكا وبيلعب مزيكا وبيحب الميتال، وممكن يكون كان بيشرب سجاير، والتانى كان ملتزم ومربى دقنه وبيلبس جلابية بيضا، الأول كان ولد وحيد عايش مع والدته وأخته، والتانى كان متجوز ومخلف، الاتنين كانوا اسكندرانية، وده أول شىء مشترك بينهما، أما الشىء الثانى الذى إشتركا فيه فهو كيفية الوفاة، أو لنكن أكثر تحديداً.. من قتلهما، فالذى قتل خالد وسيد هو الغباء،غباء البشر الذين يتبعون ويمثلون نظاماً غبياً بدوره، الذين قتلوا خالد هم الذين قتلوا سيد وإن اختلفت الأسماء، الذين قتلوا خالد هم الذين قتلوا سيد حتى وإن اختلفت الدوافع والتفاصيل والملابسات، أما الشىء الأخير المشترك بين خالد سعيد وسيد بلال أنه بعد وفاتهما، خرج بعض الشباب المتشحين بالسواد يقفون حدادا عليهما على شط بحر الاسكندرية، نفس الشباب ونفس الوجوه، بنفس الحزن ونفس الغضب ونفس الرغبة فى الثأر والرغبة الأقوى فى الفهم.

نعم كانوا يريدون أن يفهموا.. بأى ذنب قتلا، كانوا يريدون أن يفهموا.. ما هى قيمة الإنسان فى بلدنا، كانوا يريدون أن يفهموا.. لماذا لا يشاركهم فى وقفتهم باقى المصريين بلحاهم وجلابيبهم وقمصانهم وبنطلوناتهم وبانتاكوراتهم وشنباتهم وطرحهم وباديهاتهم، كانوا يريدون أن يفهموا.. لماذا يتناسى المصريون ما حدث مع خالد وسيد والاف سبقوهما والاف سيتبعونهما؟، كانوا يريدون أن يفهموا لماذا تستمر جحافل الغناء والبرامج والمسلسلات والمنتجات والمقاهى والمصايف والمصانع والمتاجر والمنتجعات فى ممارسة الهجوم على عقول وقلوب المصريين –أو بعضهم بالأحرى- دون أن تتوقف الحياة فى بلدنا ولو لدقيقة حزناً وغضباً وكمداً، كانوا يريدون أن يفهموا لماذا لا يوجد غيرهم أحد يعى "فكأنما قتل الناس جميعاً"؟، كانوا يريدون أن يفهموا.. إلى متى نستمر فى هواننا وذلنا وخنوعنا؟.

الكلام الآن صار أسهل وأبسط، والرفض صار أعلى صوتاً، والوقفات صارت مليونيات، وتغيرت الوجوه، وخرجت وجوه من مكامنها وجحورها وعلا صوتها واستأسدت، ودارت الدنيا دورتها وذهب خالد وسيد إلى المكان ذاته فى مؤخرة ذاكرة شعب سمكى الذاكرة، وذهب معهما بشر كثيرون كانوا الشاهد الحقيقى على هشاشة نظام وغباوته، ودون أن ندرى تسرسبوا من بين أيدينا ومن عيوننا ولم نعد نذكرهم، صرنا نتجادل ونتناحر فيما بيننا على المكان الأوضح فى الصورة، حتى لو كلفنا ذلك أن نمحى باقى الموجودين معنا فى إطارها، وتماهينا فى الخلاف لدرجة لم تسمح لنا بأن ندرك أن من قتلوا سيد وخالد.. مازالوا بيننا، وبيننا أيضاً كل من صمتوا على موتهما.

حاشية: الحناجر اللى رفضت الغباوة من قبل ما النظام يسقط تعبت من الصراخ والهتاف، وذلك سمح بصعود حناجر أخرى كانت تجيد الصمت والانبطاح، ولكن سيبقى "المجد للشيطان.. معبود الرياح.. من قال لا فى وجه من قالوا نعم".

لا تكن فسفس

2011-07-28T03:47:00.000+02:00

كنت ع القهوة فى التحرير بعد انتهاء موقعة العباسية، قعد واحد ثورجى صاحب الناس اللى أنا معاهم، الكلام اتفتح عن أحداث المنطقة الشمالية العسكرية فى اسكندرية قبلها بيوم، الأخ اللى قعد أدلى بدلوه إن كبار مشايخ السلفية كانوا طالعين ماسكين سيوف وبيهاجموا الثوار مع البلطجية، طبعاً ما عديتهاش وقلتله ما حصلش، ودخلنا فى نقاش انتهى بأنه ساب القعدة وقام وهو حانق وغضبان.

واحد معرفة تانى لقيته مشير فيديو على الفيس بوك من موقعة العباسية لواحدة ممن ينتمون للثوار وهى بتشتم الجيش بالفاظ منيلة بستين نيلة، والأخ المعرفة كاتب تعليق على الفيديو معناه إن الجيش كان لازم يديها بالجزمة هى واللى يتشددلها، وبصراحة أنا ما سألتوش لو كان هو بينضرب من بلطجية أو حتى من "مواطنين شرفاء" كان هيقول إيه ؟

الأخ الأخير ده بقى فكرنى بواحد تالت معرفة فيس بوك، كل دوره فى الحياة إنه يشتم فى ولاد الكلب اللى فى التحرير ويسبهم ويقول للجيش يروح يدوس عليهم ويحرقهم، وبالمرة يشتم البرادعى فى الرايحة والجاية، وطبعاً يسب كل ما يمكن أن يُسب للثورة التى يسميها هو ثورة حرامية.

كل دول وغيرهم طبعاً ناس تانية كتير خلونى متأكد إن المشكلة مش فى إتخاذ موقف والوقوف فى جانب معين من قضية ما، المشكلة الحقيقية تكمن فى استسهالنا وتعودنا أن نلجأ لمصدر واحد يتفق مع رؤيتنا لنستقى منه الأخبار والتحليلات، يعنى ببساطة بنشوف مين واقف معانا فى نفس الجهة ونسلمه دقننا ونشترى منه وإحنا مغمضين.

بنستسهل حتى نشغل مخنا ونتعب نفسنا ونروح ندور على أوجه تانية لما حدث، بنكسل نسمع الرأى المغاير، ولو سمعناه بنسمعه بنية تسفيهه وإيجاد أخطاء فيه، مش بنية تدويره فى الجزء الموجود داخل جماجمنا ويسمى مخ ويختص بالفهم والتحليل.

وبالمرة كمان بنتكسف نقول على حد من اللى معانا فى نفس الجانب إنه غلطان، حتى لو كنا متأكدين إنه غلطان، ساعتها بنبعد كلامنا عنه، أو نحاول نطلع غلطات للناس اللى واقفين فى الجانب المواجه لنا تمكنا من أننا نقلب الترابيزة.

الإخوة المواطنون، ونحن فى هذا الظرف الدقيق واجب على كل منا أن يلجأ لما كانوا ينهوننا عنه سابقاً، ألا وهو تشغيل المخ، واجب على كل مواطن شريف أن يعتز بمخه، أو على أقل تقدير أن يخشى عليه من الصدأ بفعل التوقف عن العمل بعد 30 سنة مروا كان النظام يرغب فيها فى أن نتربس عقولنا ونتركها تزنخ ليفكر هو "من أجلك أنت"، وأتارى البعيد مخه "فسفس".

حاشية:

إن كان البعض يخشى على مصر من المخططات الأجنبية التى تحاك بغرض وقوعنا تحت نير الإستعمار، فالخطر الحقيقى الذى يجب أن نخشاه هو أن نترك أنفسنا نقع فريسة للاستحمار، وساعتها لن يجد أحد صعوبة فى أن يركبنا.. ويدلدل.

صوت الجيل

2011-07-21T17:15:00.001+02:00

مش بيفهموا غير أسلوب الضغط، بصريح العبارة يعنى الأدب والصوت الواطى والاحترام طلعوا مش نافعين، وقبل ما تقولى "عيب اتلم"، خلينى اقولك إنى لا اقصد عدم الاحترام بمعنى الشتيمة وطولة اللسان، وإنما اقصد عدم الاحترام بمعنى التباتة والرزالة والتمسك بالحق والقفش والعناد وكل الخصال اللى ممكن تبان غتتة وهى ساعات بتكون الحل الوحيد، يعنى ببساطة يا اخوانا إحنا جربنا الحنية والطيبة والصوت الواطى، فشر العروسة المكسوفة ليلة فرحها، بس لا مؤاخذة طلع مش نافع، وبعدين مش طول عمر الناس الكبار واللى عاملين نفسهم كبار واللى فاكرين نفسهم كبار بيعايرونا ويقولولنا اننا جيل صوته عالى ومندفع وقليل الأدب "ده على اعتبار إنهم وهم فى سننا ما اتقالش عليهم كده"، خلاص.. إحنا بقى هنوريهم كل الحاجات دى ونخليهم يفخروا بنفسهم لما يحسوا إن نظرتهم كانت فى محلها ويتبسطوا إننا ما خذلناهمش.

من الآخر كده إحنا مش هنقول إننا أجدع جيل ولا أشجع جيل ولا الجيل اللى ما حصلش ولا هيحصل، لأ.. إحنا جيل عادى، بس طلعلنا صوت، وواضح إن صوتنا بقى مسموع بعد سنين خرس عشناها لما شفنا اللى قبلنا عايشينها وراضيين، وهو ده الفرق بقى بينا وبينهم، إحنا مش راضيين، مش راضيين بانصاف الحلول، مش راضيين بالضحك على الدقون، مش راضيين بالأسامى هى هى والوشوش اتغيرت، مش راضيين بدولة العواجيز، مش راضيين بنص العمى ولا العمى كله، مش راضيين بعيش جبان تموت مستور، مش راضيين نسيب الميدان، مش راضيين نسيب دم الشهداء اللى فى ناس بتقول عليهم بلطجية، مش راضيين ننسى وشوش الناس اللى قتلوهم واترقوا.. والحجة.. دفاع عن القسم.. ويعملوها ويخيلوا، وضربنى وبكى وسبقنى واشتكى، لأ.. كفاية بقى تدليع وتمييع وهشتكة.

يا اخوانا يا اللى فوق.. مش هنقولكم ما تبصوا ع اللى تحت، لأ.. هنقولكم احنا هنطلع فوق..فوق قوى، فوق أكتر ما تتصوروا، يا اخوانا يا مطبلاتية.. إحنا اللى بدعنا الطبل والزمر، لو مش عاجبينكم ورونا شطارتكم، اللى بيقول علينا عيال يورينا مرجلته، اللى بيقول علينا قابضين يفضيلنا جيوبه، واحنا مش هنعمل زيكم.. مش هنخون حد ولا هنرمى حد فى النار، بس إحنا جيل أول حصة خدها فى مدرسة الشارع كانت "إعرف صاحبك وعلم عليه"، وإحنا علمنا على ناس كتير.. وخلاص.. كل شىء انكشف وبان، وكل إناء ينضح بما فيه، وكل واحد بقى يتكلم بملء فيه، يعنى م الآخر.. عايزينا نسكت.. إعملوا الصح، والصح صح ومش محتاج شرح، كل واحد عارف عليه إيه، قشطة ؟

الزاتونة يا حلوين إننا فى مركب واحدة، وإحنا مش عايزين نغرقها زى ما بتقولوا، ومش هينفع تانى نلصمها، إحنا كده كده واقفين فى مينا، يبقى نطول شوية فى الوقفة بس نطلع متأمنين، بدل ما نطلع متصربعين ونرجع نغنى ظلموه.

حاشية: ممكن بدل ما تقولولنا"اسمعوا الكلام"، تجربوا مرة تسمعوا انتم الكلام؟ جربوا ومش هتخسروا حاجة.. وافتكروا إنكم قبل كده كنتم خسرانين كل حاجة.. وساكتين وبتسمعوا الكلام.

بلاش معاندة

2011-07-14T01:43:00.000+02:00

مساء الجمال، تخيل حضرتك معايا كده، طفل أبوه عندى جداً، عندى لدرجة إن الطفل لما يعيط علشان عايز حاجة، أبوه يطنش، لأ والأكادة إنه يزيد فى العناد ويعمل حاجة عكس اللى الواد عايزها بالظبط، يكبر الواد شوية ويكبر عناد الأب معاه، الواد عايز ينزل، الأب يقوله مفيش نزول ويقفل باب الشقة بالمفتاح، الواد عايز يروح يصيف مع اصحابه، يقوله لأ، انت لازم تبقى راجل وتشتغل فى الإجازة علشان تتعلم الاعتماد على النفس، الصيف اللى بعده الواد يقول لأبوه إنه هيشتغل فى الإجازة دى كمان، الأب يقوله لأ إحنا هنروح نصيف كلنا، عناد عناد يعنى مش أى كلام، المهم من هنا لهنا والواد يكبر ويقرر يتمرد على سلطة الأب العندى ويسيبله البيت ويروح يدرس فى جامعة فى بلد تانية، ربنا يرزقه بدكتور من عينة أبوه، شارب العناد فى الرضعة وهو صغير، الواد يعمل مشروع، الدكتور اللى فاكر إنه أعند وفى نفس الوقت أفهم أهل الأرض يقوله لأ المشروع ده فاشل، غيره، مرة واتنين وتلاتة، الواد جاب جاز، اتخانق مع الدكتور، ولأول مرة فى تاريخ الجامعة بتاعته قدر إنه يمشى الدكتور من القسم بعد مباراة عناد معتبرة الكلية كلها تابعتها وهى مش مصدقة إن الواد المفعوص ده يطلع منه العناد ده كله، مشى الدكتور وجه واحد تانى مخضوض شوية من الواد اللى شال أعند دكتور مر فى تاريخ الكلية من يوم ما اتفتحت، الدكتور الجديد كان يبان طيب وحلو وحنين، فهم الواد إنه بيخاف على مصلحته وإنه أهم حاجة عنده إن الواد يتعلم كويس ويفهم كل اللى يتقاله، لأ والزيادة اللى من عنده إنه هيشركه معاه فى وضع سياسات الدراسة بحكم إنه أحد أطراف العملية التعليمية وله دور وعليه مسئولية زيه زى الدكتور بالظبط، الواد صدقه وإداله الأمان وبدأ يعمل تصورات لتطوير التعليم العقيم فى الكلية، وبعدين بدأ العوء، الواد يقدم تصور، الدكتور يعمل عكسه تماماً ويقوله أصلك مش فاهم فى التعليم قدى، يبلعها الواد ويقول مش مشكلة ويقدم تصور تانى، يتكرر الموقف، وأتارى الدكتور ده بيدحلب علشان يعمل اللى هو عايزة، والأكادة إنه يكون بيفكر إزاى يرد هيبة الدكاترة اللى اتهزت لما الواد المفعوص ده شال الدكتور الأولانى، وتبدأ مباراة جديدة فى العناد بين الدكتور الجديد والواد المفعوص، بس الدكتور مش واخد باله إن الواد ده إتربى على العناد من صغره، وشربه شرب خلاه قدر يشيل الأعند، يبقى الدكتور هيعافر معاه، بس برضه هيخسر.

إحنا جيل اتعلم العند من اللى ربوه، وجه الوقت اللى نردلهم تربيتهم، يبقى بلاش يخوفونا ويفتكروا إنهم هيقدروا يقهرونا تانى، إحنا جيل محترم وقوى وبيحب بلده وعنده أفكار وأحلام وكلام، إحنا جيل هيعمل مستقبل أحسن، إحنا "بدأت حكايتنا ومش راجعين".

حاشية: مشكلة كبار هذه البلد أنهم يراهنون على الوقت، ويعتقدون أنه سيحقنا بالملل، ونسوا أن هذا الجيل كسر حاجز الملل، ولون الحياة بألوان الأمل.

تكتكة زراير

2011-07-02T03:10:00.001+02:00

الحياة أبعد من تكتكة الزراير، هناك أناس غيرنا يعيشون فى مصر، وصدقونى نحن لا نعرف عنهم الكثير، بل الحقيقة أننا لا نعرف عنهم شيئاً، أناس لن يهتموا بمعاركنا طالما نحن لا نهتم بمعاركهم، أناس لا يقرأون ما نكتبه، لأننا لا نكتب ما يريدون قراءته، أناس لن يقفوا فى صفنا، طالما نحن لا نقف فى صفهم، ومن الغباء أن ننعتهم بالمغيبين، فى الوقت الذى يبدو فيه أننا نحن المغيبون، حتى وإن كنا نحن على حق، فالحقيقة أنهم هم ملح الأرض ومياهها وترابها، هم الأرض نفسها لو تعلمون.

الحياة أبعد من تكتكة الزراير، هناك أناس يحاولون أن ينبهوا المطحونين فى بر مصر ويذكرونهم بحقوقهم، لكن الخطأ الأكبر أن تظهر للآخر أنك أفهم وأعلم منه وأنك تحاول مساعدته على الفهم، إن كنت أكثر منه علماً حقاً، فهو لن يسمح لك بتفهيمه وتعليمه طالما لم يعترف هو بذلك، وطالما كنت لا تهتم بما يدور فى باله وما يؤرقه، فهو لن يعترف لك بشىء، وهذا حقه، شاركه فيما عنده ليشاركك فيما تريد.

الحياة أبعد من تكتكة الزراير، هناك أناس يخافون مما نتحدث عنه فى مقالات وبرامج وحوارات يقرأونها ويسمعونها ويشاهدونها، ثم يقومون لينصرفوا لأعمالهم التى تؤرقهم كل تفاصيلها الصغيرة، وتشغلهم عن كل تفاصيلنا التى نراها كبيرة، فينغمسون فيها وفى ما فيها وينسون كل ما سمعوا وكل ما شاهدوا وكل ما قرأوا.

الحياة أبعد من تكتكة الزراير، هناك أناس عاشوا مع عمدتهم ثلاثين سنة، تعودوا عليه وعلى كل مافيه وكل من حوله، تعودوا على شيخ غفره وطبيب وحدته وخولى عزبته، ومن فرط تعودهم لا يصدقون حتى اللحظة أن عمدتهم ترك العمودية، والأهم أنهم لن يصدقوا طالما لم يروا عمدة جديداً فى الدوار، وعلينا أن نتفهم أنهم سيتعاملون مع العمدة الجديد كما تعاملوا مع العمدة القديم، حتى يثبت لهم أنه غيره، هذا إن كان غيره.

الحياة أبعد من تكتكة الزراير، هناك أناس لم ولن يلتفتوا لبوستاتنا وتويتاتنا لأنها لم ولن تكن موجهة لهم، وعلينا ألا نلومهم على هذا، اللوم من نصيبنا.

الحياة أبعد من تكتكة الزراير، هناك أناس لو نزلنا وركبنا ميكروباصاتهم وأتوبيساتهم وقطاراتهم، وهى للعلم تختلف تماماً عن ميكروباصاتنا وأتوبيساتنا وقطاراتنا، ولا تتشابه فى شىء مع سياراتنا وطائراتنا، فلو تعاملنا معها، ربما نفهم بعضاً مما يؤرقهم ويدور فى أذهانهم، وربما نعرف ما يشغلهم، وهو للعلم ما يشغلهم عنا، وعما يشغلنا.

الحياة أبعد من تكتكة الزراير، فدعونا نتخلى عن زرايرنا وكيبورداتنا وكيباداتنا وتاتشاتنا، وننزل لنلمس بأصابعنا الأجزاء الواقعية من الحياة التى يعيش فيها أناس يشاركوننا فى الوطن، ولكننا فى الحقيقة لا نشاركهم الحياة.

نقط سياسة

2011-06-23T03:38:00.001+02:00

- ماتيجى نتخانق، صار هذا هو المعنى المتعارف عليه حين يدخل شخصان فى مناقشة، النقاش لم يعد حالة حوار بغية تقريب وجهات النظر، بل صار حالة جدل بغرض فرض وجهة نظر.

- كلما فكرت فى محاولة استعياب وجهة نظر أى من المتحدثين السلفيين، يخرج على واحد منهم بتصريح ينسف محاولتى، وكلما حاولت أن أسامح صاحب التصريح، يخرج نفس الواحد لينفى ويبرر ويقول أنه كان يمزح، فيزداد اقتناعى بخطأه.

- الدستور أولاً أم الانتخابات أولاً ؟ .. أعتقد أن الأمن أولاً.. وبعدها يمكننى أن أفكر، وهذا لا يلغى تحيزى للدستور أولاً.

- لأنى أريد رئيساً يمارس بنا ومعنا وفينا الديمقراطية، لأنى أريد رئيساً يعزز فكرة دولة المؤسسات، لأنى أريد رئيساً ذو تفكير غير اعتيادى ولا بيروقراطى، لأنى أريد رئيساً لم يخش أن يلقى كلمة "التغيير" فى مياه بحيرة السياسة الراكدة، لأنى أريد رئيساً يهتم بالبناء ويمتلك أفكاراً له، لأنى أريد رئيساً منفتح العقل ومستعد للتشارك مع غيره، اعتقد أنى اجبت على سؤالى لنفسى .. لماذا أنت منحاز للبرادعى؟.

- لا يهمنى طول لحية الرئيس القادم، ولا يهمنى درجة تدينه، كل مايهمنى أن يأتى رئيس يعى من الدين الحديث الشريف "الدين المعاملة"، أما باقى دينه، فبينه وبين ربه.

- أمنيتى حالياً أن يأتى أسبوع يقوم فيه كل مقدمى البرامج التليفزيونية ومعدوها بالتوقف عن استضافة الأسماء الشهيرة والمتعارف عليها، وأن يقوموا بدلاً من ذلك باستضافة مواطنين عاديين يختارونهم عشوائياً من شوارع مصر، وقتها يمكنهم أن يقولوا أنهم فعلاً ينقلون لنا نبض الشارع.

- أن تكون سليط اللسان، لا يكفى لأن تكون ناشط سياسى.

- لا تستخف بمنطق أى مواطن يتكلم عن مشكلة ما، وإلا تحمل أن يستخف كثيرين بمنطقك وألا يلتفت أحد لمشكلتك.. ما تراه أنت أس البلاء، يراه غيرك.. قضا أخف من قضا.

- ياريت أى وكل ناشط سياسى ومثقف وسياسى ينزل الشارع على رجله ويركب ميكروباص (فيصل –إمبابة مثلاً) وتانى يوم يسافر قرية فى محافظة دلتاوية، وياريت يسافر مواصلات مش بعربيته، وتالت يوم يطلع على بلد فى الصعيد، ويرجع بعدها يشترى عيش من أى فرن بلدى، ويجيب خضار بنفسه من أى سوق شعبى، أخيراً يقعد على قهوة بلدى فى أى حتة شعبية بجد فى القاهرة أو اسكندرية او السويس أو المحلة، 3 ساعات بس ع القهوة، وبعد كده يكلمنا عن مشكلات الشعب المصرى وحياته.. ويفك الكرافتة شوية علشان نصدقه.

- انت مصرى، واللى مختلف معاك فى الرأى مصرى.. قشطة ؟.. واحدة واحدة بقى فى الكلام، أصل بلدنا بتتقدم بينا.. بجد مش هزار.

- ماتكفرنيش.. وأنا ما اشتمكش.

- سؤال الأسبوع .. أذكر أحلى حاجة فى الثورة.

حاشية: السياسة ليها ناسها، بس الناس ليها سياستها، وإن كانت "السياسة مهلكة بوجه عام"، يبقى علشان الناس هتاكل أى سياسى يحاول يضحك عليهم.

إنزل بقى

2011-06-17T17:45:00.000+02:00

تفتكر فى كام كاتب مقال فى مصر؟، يومى وأسبوعى وشهرى وبظروفها، فى صحف يومية وأخرى أسبوعية وغير ذلك من دوريات، طيب ولما نضيف لهم كل التدوينات اللامعدودة على المدونات المختلفة، حلو قوى، زود بقى كمان كل البوستات الفيس بوكية، ويمكنك إن شئت أن تضمن الحساب بعض الاستاتيوسات التى تدخل تحت بند الطلقات السريعة، تتشابه فى ذلك مع "نص كلمة" للعظيم أحمد رجب مثلاً، وقطعاً يمكن إضافة كل التحليلات التى تظهر على كل الشاشات والفضائيات والراديوهات، كفاية كدة، كل الحاجات السابق ذكرها قطعاً لا يقوم بها موهوبون فى جميع الأحوال، فى موهوبين و فى نحيتة، والناس بتفرز، اعتبر إن الناس فرزت وشالت نصف ما جمعناه، النصف المتبقى سيظل عدد فوق الحصر، وهو فى حد ذاته شىء جيد يدل على ان مصر ولادة، ولكن السؤال: من لديه القدرة على متابعة كل ذلك وتحليله وفهمه والاستنارة به؟، بلاش السؤال ده.. خد سؤال تانى، لما كله عايز يضرب.. طيب مين اللى هينضرب ؟.. يعنى لما كل دول فاهمين وبيتكلموا وبينظروا.. مين بقى اللى كل دول بيكلموه؟، هتقولى المواطن الغلبان اللى مش فاهم الاعيب وملاعيب ودهاليز وبهاريز السياسة والكتابة والصحافة والحياة، جميل جداً.. هو مين بقى من كل الناس الموهوبة دى بيسمع من المواطن الغلبان ده؟، مين بيتكلم معاه.. مش عنه، مين بيناقش قضايا المواطن التى تؤرقه فعلياً، وليس القضايا التى يرى كاتب المقال أنها يجب أن تشغل بال المواطن حتى وإن كان المواطن غير منتبه لذلك.

هل معنى هذه الأسئلة المستفزة أن يمتنع الكتيبة عن الكتابة، والمحللاتية عن التحليل، قطعاً لا.. ولكن كل المقصود هو أن ينزل هؤلاء للشارع بأسفلته الساخن ورصيفه المتسخ ومجاريه الطافحة ومطباته السمجة وزحامه اللاإنسانى وقسوته الغشيمة، يجب أن ينزلوا للنجوع والكفور، يجب أن ينزلوا ليقضوا يوماً فى العشوائيات، يعيشوا أسبوعاً فى عمق الصعيد، يجربوا الحياة فى إحدى قرى الدلتا المطحونة ولو لأيام، ووقت أن يفعلوا ذلك، يعودوا سالمين غانمين إلى مكاتبهم واستديوهاتهم ليكلموا الناس وقد شاركوهم حياتهم، فعلاً لا قولاً، ساعتها ربما تجد أكبر مناهضى المطالب الفئوية وقد أصبح فئوياً حتى النخاع، وربما تجد كل من يطالب بإنهاء سطوة إمبراطورية الميكروباصات، قد أرهق نفسه قليلاً بعدما رأى كيف يعيش المستفيدين من تلك الإمبراطورية، فبدل طلبه ليصبح ضم أبنائها فى نقابة ما أو هيئة ما تتبع الدولة.

الحقيقة لها وجوه عديدة يا سادة، وإن كان الموهوبون والنخبة –الحقيقيين منهم على الأقل- يحاولون الوقوف مع الحق والحقيقة ونقل نبض الشارع وتبسيط الأمور حتى يفهمها من هم فى الشارع، فربما يجب على هؤلاء الموهوبين والنخبة أن يعودوا لينزلوا الشارع بأنفسهم، فسيكتشفوا وقتها أن الحقيقة أمّر مما اعتقدوا وتصوروا.

حاشية: اللى يتكلم عن معاناة الناس، لازم ينزل يقف وسط الناس، واللى يحاول يفهم الناس، لازم الأول الناس تفهمه، واللى عايز يكسب الناس، لازم الأول الناس تكسبه.

شعبين

2011-06-09T13:51:00.001+02:00

"احنا شعبين شعبين شعبين..شوف الأول فين والتانى فين".. هذه الجملة التقريرية التى كتبها الأبنودى فى إحدى قصائده هى الأصدق فى وصف حالنا، سابقاً وحالياً وأخشى أنها ستكون كذلك مستقبلاً، نحن نعيش حالياً فى جزر معزولة تفصل بين الواحدة والأخرى أميال، جزر يتعامل أبناء كل واحدة منها مع أبناء الأخرى باعتبارهم ضيوف على البلد، فتجد نفسك ضيفاً من وجهة نظر مواطن مصرى آخر، بينما تراه أنت ضيفاً على وطنك، يتكلم مواطنى الفيس بوك وتويترعن مصر وكأنها هى فقط الواقع الذى يرونه من عالمهم الافتراضى، أو الذى يحتك به بعضهم فى الشوارع ويعود لينقله فى بوستات ولينكات وإيفينتات، بينما يتكلم مواطنو الشارع عن بلد لا وجود فيه لـ"like" أو "share" أو "tweet"، بلد يسير فوق أسفلت الشارع، وينام فوقه أحياناً، بلد يقف فى لجان التفتيش الليلية وربما تنتهك كرامته فيها، بلد يعانى ويعافر وهو يعبر الشارع المزدحم ولا يعانى أبداً من إنقطاع النت أو حتى عدم تشغيل الـ"wireless"، بلد يركض خلف سيارة أنابيب البوتاجاز بينما لا يهتم إطلاقاً بعجلة الانتاج –وإن كان هذا البلد هو المحرك الرئيسى لتلك العجلة- التى يسمع عنها فى نشرات الأخبار وبرامج التوك شو، وياللغرابة، فهذا البلد الأول يظهر شعبه فى برامج التوك شو وفى نشرات الأخبار ليتكلم باسم البلد الثانى، الشعب الأول يظهر فى التليفزيون بينما يتابعه الشعب الثانى، هذا إن كنت مقتنعاً أنهما شعبان وليس أكثر من ذلك.

إن كنت ممن يتأففون من البقاء وسط أناس يهفهفون برائحة العرق، ويتكلمون بلغة قوية صادمة وصوت عال ومفردات غير منمقة، فاعلم أن هناك من يتعجبون من البشر الذين لم تخربشهم الدنيا، واعلم أيضاً أن هؤلاء البشر لو منحهم القدر ومنحهم البلد فرصة للحموم والعلام والتهذيب الحقيقى، لربما صاروا يقفون فى نفس الجهة التى تقف فيها سيادتك، واعلم أيضاً أن الأبنودى قال فى موضع آخر "لو مش نازلين للناس فبلاش"، وتأكد أن من سار فى الشوارع فى نهايات يناير 2011 وهتف بسقوط النظام، كان يقصد تحسين حياة البشر، كل البشر، مثقفهم وعديم الثقافة، بل كان يهتم أكثر بتثقيف غير المثقف، وتشبيع الجوعان ومنح العدل للمظلوم ومسح الدموع من عيون كل الأطفال، سواء الذى يبكى لأن "آى فونه" إنكسر و"بابى" يرفض أن يشترى له آخر جديد، أو الذى يبكى لأن والده المسجون لم يخرج ضمن المعفو عنهم فى العيد الكبير، خاصة وأن هذا يعنى أنه سيضطر لمعاودة الحشر مع والدته فى الميكروباصات للوصول لسجن وادى النطرون.

أيها السادة الذين يسكنون فى الوطن الأعلى، رجاء أن تنزلوا بأنفسكم وأجسادكم للوطن الأدنى وتفهموا حياته، وقتها ربما يمكنكم حقاً أن تنهضوا بالوطن بشقيه، فيصير وطناً واحداً نتساوى فيه، فنحبه بالقدر نفسه وبالطريقة ذاتها.

كلام الناس

2011-06-02T14:14:00.000+02:00

خلاص، كفاية كده بقى ع الإخوان المسلمين ونسقطهم من حساباتنا شوية، الناس عملوا الواجب وزيادة ووضحوا للكل إن اهدافهم غير اهدافنا –إحنا المصريين العاديين- وتكفلوا مشكورين بحسم كل نقاط الشك اللى كنا واقفين فيها وإحنا مش عارفين هل إحنا ظالمينهم فعلاً وهم كويسين بس إحنا مش واخدين بالنا ؟ ولا هم زى ما إحنا شايفين وحاسين وفاهمين ومذاكرين تاريخ وحساب.

الجمعة اللى فاتت كانت كفيلة بإخراج الجماعة من حساباتنا تماماً، ولكن الجمعة نفسها كانت دليل على اننا لازم نزود علاقتنا بالشارع العادى، الشارع اللى مش بيعدى فى الفيس بوك ولا بيقف فى محطة مترو تويتر، الشارع اللى الناس فيه عايزة تعرف رغيف العيش هيغلى ولا لأ؟، ومش فارق معاهم يعرفوا الانتخابات البرلمانية هتبقى بالقائمة ولا من غير قائمة، حتى لو كانوا الناس دول غلطانين، مش لازم نروح نقولهم فى وشهم إنتم غلطانين، ممكن نروح نتكلم معاهم فى رغيف العيش، وبعدين نخلى الكلام يتسرسرب على الانتخابات والدستور.

فعلاً مشكلتنا الحقيقية حالياً هى توعية البشر العاديين العايشين اليوم بيومه، الناس اللى بتصدق كلام ناس بتضحك عليهم علشان بس بيكلموهم بحنية، الناس اللى بيسمعوا كلام الحكومة علشان موروثهم الشعبى والتراثى والسياسى كله علمهم
إن الحكومة دى قدر هم لا يملكون تغييره، وعلشان كمان الناس دول بعد كام شهر من الثورة حاسين إن الحال رجع زى الأول، وريما رجعت لعادتها القديمة، واللى افتكروه ملاك طلع .. طلع مش ملاك.

المثير للشك والريبة والحزن والأسى والضحك والمغص حالياً هو السباق السياسى اللى اشتغل ويتنافس فيه السادة مطلقى الأحزاب، اللى كلهم حريصين على لبس البدلة وربط الكرافتة معنوياً، كلهم حريصين على الطلوع مش النزول، الطلوع على أى شاشة وكل شاشة، الطلوع على كراسى أى استديو يقابلهم فى أى قناة، لكن مش مستعدين ينزلوا يتكلموا مع الناس فى أى حتة المجارى بتضرب فيها بما يسمح بتصييف المواطنين طول السنة، مش مستعدين يقعدوا يسمعوا كلام الناس علشان مقتنعين إن جورج وسوف كان عنده حق لما قال إنه لا بيقدم ولا يأخر، وناسيين إن الناس دول فى سياسيين غيرهم بيطبطبوا عليهم ويدلعوهم ويقنعوهم إنهم بيسمعوا كلامهم، برغم إننا كلنا عرفنا خلاص إنهم مش بيسمعوا كلام حد غير الكبير بتاعهم اللى بيبوسوا إيده، اللى مانعرفش هل هو بيبوس إيد حد ولا لأ.

يا جدعان "لو مش نازلين للناس فبلاش .. بيتك بيتك"، الناس ماعادتش مستحملة لت وعجن ورغى وتنظير، الناس اتعودت إنها لو ف بلد بتعبد الطور.. تحش وترميله، ومش هيصدقوا حد يقولهم إنه هيدبح الطور غير لما الطور يندبح فعلاً، الناس مش حمل مغامرات.

كفاية بقى حوار وطنى وأمن وطنى وبنى وطنى، وخدوا العبرة من الحزب اللى كان وطنى.

حاشية:

هل حقاً قامت الثورة ونجحت ؟ أنا عرفت أنها قامت حين استندت على كتفى، لكنى لن أقتنع بنجاحها إلا حين أرى شهادتها خالية من الكحك، وهو كثير الآن لو تعلمون.

بكرة الوطن

2011-05-19T04:10:00.002+02:00

بكرة خيط متلعبكة ومتكعبلة وكل خيوطها لافة حوالين بعضها ومش باينلها أول من آخر، هو ده وضع بلدنا الغير جميل والجميلة (الوضع والبلد على الترتيب) واللى أصبح كفيل بزرع الإحباط داخل نفوسنا بدرجة تمنعنا من امتلاك القدرة على فك وحل كل لفلفات وكعبلات الخيوط المتشابكة أمامنا والتى تحجب الصورة عن عيوننا المرهقة بفعل كل ما شهدناه من تحولات وتغيرات وتحركات تمت فى 4 أشهر حتى الآن وهى تحولات لم نعتد أن نعيشها أو نتعلم أو حتى نحلم أن نتعايش معها طوال ما يزيد على خمسين عاماً بدأت مع حركة ضباط يوليو واستمرت حتى 11 فبراير 2011.

طيب، كيف نستطيع أن نتعامل مع هذا الموقف المغفلق تعاملاً يجعلنا نعبره أو على أقل تقدير نتجنب جزءاً كبيراً من آثاره السلبية، لن أرتدى عباءة الحكمة وأمارس التنظير، علشان المشرحة مش ناقصة قتلى، ولكن سأبدأ فى حل الخيوط المتلعبكة فى حياتى التى لا تخلو هى الأخرى من الكعبلة، سأحاول أن أمسك خيطاً أراه هو الأكثر خطورة وأهمية وطولاً ولعبكة وكعبلة، وأبقى معه حتى "أنسله" من البكرة وأضعه أمامى على الترابيزة سالكاً من غير سوء، علّى أستطيع أن أرقع به أى حتة منتوشة فى ثوبى الجديد، أو على أقل تقدير ألفه على بكرة خالية فى علبة الخيوط النحاسية القديمة، وبعدها أعود للبكرة المتلعبكة، لأبحث عن الخيط الذى يليه، وقطعاً لا مانع إن وجدت خيطين متلازمين متلاصقين يأبى احدهما أن يتخلى عن الآخر أن أبذل مجهوداً مضاعفاً مستعيناً بالمزيد من التركيز كى أخرجهما معاً، ولا مانع أيضاً أن أعترف بتواضع قدراتى فى فن الحياكة، وهو الإعتراف الذى سيكون تمهيداً للإستعانة بمعاونة خياط صنايعى من اللى إيدهم تتلف فى حرير ليساعدنى فى فك لعبكاتى الخاصة وله وقتها كل الشكر، مع مراعاة أنه إن لم يستطع فليس هذا سبباً لأن أضربه باللى ف رجلى، إذا كنت أنا مش قادر على خيوطى، ألوم ليه غيرى إنه مش قادر على خيوط لا تخصه؟

ببساطة، لماذا نتمسك باصرار غريب ومريب فى بعض الأحيان بأن الخيوط والمشاكل جميعها يجب أن تخرج من بكرة الوطن المتكعبلة فى وقت واحد، ونتمادى فى التطلب بأن يكون هذا الوقت هو الآن الآن وليس غداً، لماذا لا ننظر لأهم خيوطنا وأخطرها، وهو من وجهة نظرى المتواضعة الفراغ الأمنى الذى لا يخلو من تعمد أو على أقل تقدير إستسهال، فينبرى سياسيو هذه البلد وقادتها لحله وتسليكه حتى يعود الشرطى إلى الشارع ممارساً دوره المفترض وليس متمنظراً علينا ومنتظراً منا أن نعتذر له عن أخطاء يراها ونحن مقتنعون أنها ليست أخطاء، هذا الخيط يجب أن يخرج من البكرة، حتى لو لم يشأ مكعبلوه، وبالتوازى معه على السادة الموجودين فى سدة الحكم أن يمنحونا أماناً نفسياً بزيادة سرعة خطوات العدالة البطيئة بعض الشىء، وأن يجعلونا نتعرف على القانون الحقيقى القاطع الذى لا يعرف الكبار، ولا يطبطب عليهم فى الوقت الذى يلتف فيه هول اعناق الصغار وأعمارهم، وقتها وحين يعود للقانون هيبته فى عيوننا ونفوسنا نحن المصريين جميعاً سنقدر على فكفكة باقى خيوطنا المتكعبلة والتى تبدو الآن غير قابلة للحل.

إمبابة

2011-05-12T06:07:00.000+02:00

كل اللى ماركبش عربيات إمبابة من غير مايلاقى مكان يقعد وفضل متشعبط ع الباب وكل شوية ينزل عشان فيه واحد هيركب ويتحشر جوا، كل اللى ماشافش سواق الميكروباص وهو بيتخانق مع بتاع الكارتة عشان ما يدفعش الدور ده، كل اللى ما وسعش عشان التوك توك مايخبطوش فى السوق علشان الواد اللى سايق التوك توك ماشى بسرعة وسايق بإيد واحدة ورجل واحدة والسوجارة ف بقه ومشغل التسجيل بصوت عالى علشان يظبط السنيورة اللى مركبها معاه، كل اللى ما شافش الشباب واقفين بيقضوا سوجارتين من ع الناصية وواقفين يشربوهم ع الناصية اللى بعدها والشيخ بيرمى عليهم سلام وهو نازل يصلى الفجر وبيردوه بكل أدب من غير ما يرموا السوجارة، كل اللى مانزلش يرمى الزبالة فى الجزيرة اللى ف النص ف الوحدة ولا ترعة السواحل ولا أى شارع تانى، كل اللى ماعداش عليه يوم ماعرفش ينام عشان "حمو" بيفتح محل تحت البيت وجايب سماعات وعامل هيصة، كل اللى ماراحش مستشفى إمبابة العام ولا أى مستوصف أهلى هناك سواء تعبان ولا واخد قزازتين حاجة ساقعة ف زيارة، كل اللى ما داسش ف المياه أو الطينة ف الشتا، كل اللى ما شافش الخناقة اللى على حق بتبقى إزاى، كل اللى ما اتخانقش على أنبوبة، كل اللى ما قعدش ع القهوة وسط الرجالة اللى متابعين المصارعة بس عندهم استعداد يقلبوها لو فيه فيلم سخن، كل اللى مانزلتش السوق وفاصلت على الطماطم وشتمت عيل صغير خبط فيها وجابت العيش ف سكتها وهى راجعة ولمت طرف عبايتها قبل ما تخش الحارة بتاعتهم، كل دول مش هيفهموا بسهولة إزاى اللى حصل ده حصل.

أيها السادة المتكلمين على كل المنابر الإعلامية، الحياة فى المجتمع من أسفل ُتشكل بشراً نفسياتهم مختلفة تماماً عن البشر الذين تتشكل نفسياتهم فى مناطق أخرى من المجتمع، فيا كل من تستعجب من قسوة وغباوة وغشامة التعامل بين الناس فى خلافاتهم الكبيرة، يجب أن تعرف أنه نفس اسلوبهم فى خلافاتهم الصغيرة، لكن كل المتكلمين لم يشاهدوا الواقع من زاويته الإمبابية أو الورديانية أو العزبهجانية أوالبولاقية أو الباكوسية، أو للأسف شاهده بعضهم قديماً ونساه.

إذا اردتم من البشر أن يكونوا أكثر وعياً وألطف روحاً وأنظف لساناً وأقل تطرفاً، فوفروا لهم مياه أنظف وطعام أطهر ومواصلات أكثر آدمية، إمنحوهم صحة وعلاجاً بشريين، إهتموا بالتعليم عندهم، فهم لم يعرفوا منه سوى التعليم ف الوش، كلموهم عن الدين الذى تركنا بعض المدعين يعرفونهم عليهن عودوا لهم واجلسوا بينهم بعدما تركتوهم لكل من أراد أن يستنصح عليهم، إفعلو هذا قبل أن تحاسبوهم على ما يقترفونه من ذنوب، وقبل أن تذهبوا، رجاء، إصطحبوا معكم القانون الرسمى العدل الحق، فهو لم يدخل هناك قبل ذلك.

حاشية:

من يرى الحياة من زاوية، يتعجب من تصرفات شخص آخر يراها من زاوية أخرى، لكن لو ذهب للزاوية الأخرى، فربما يزول العجب.

عن الكتابة والبشر

2011-04-30T19:23:00.001+02:00

- يدى مستقرة على "زراير" الكيبورد الذى أصبحت مؤخرأ أكتب عليه بعد سنين عشرة جمعتنى بالورق الأبيض والقلم، ثابت فى هذا الوضع منذ دقائق أحاول البحث عن بداية تدخلنى فى طريق المقال، شاقة هى الكتابة كما يعرف أصدقائها، متعتها تأتى من مشقتها، مثلما تأتى قوتها من بساطتها، ولحظتها الأصعب تبقى هى إصطياد الفكرة اللعوب التى تتمنع حتى تقبل أن تمنحك نفسها، وها أنا واقع فى الفخ ذاته ككل مرة، أشخاص كثيرين مروا فى ذهنى وأنا ابحث فى البشر الذين أثروا فى شخصيتى وساعدونى فى مراحل مختلفة من حياتى.

حقيقة لست أدرى لماذا تسيد واحد منهم الموقف الآن فى رأسى وسيطر على كل خلايا التفكير فى عقلى، حتى صار وجهه يقابلنى صورة مبروزة على كل "زراير" الكيبورد حال نظرى لها الآن، وصدقأ ليس هذا تشبيه، بل هو الحقيقة ولا شىء غيرها، ملامح وجهه المحفورة فى ذاكرتى تطالعنى الآن مبتسمة مرتاحة وكأنه يشاركنى لحظة صفاء إعتدنا أن نتشاركها قديماً، صوت ضحكته المجلجلة يجد مكانا فى ذاكرتى يتسلل منه إلى اذنى وكأنه موجود بجانبى الآن، رغم أننا لم نلتق منذ ما يزيد على 12 عاماً، لم أره منذ كنت مراهقاً فى الثانوية، كم تغيرت من وقتها، عشت ببلدان مختلفة وصاحبت بشراً لا أذكر عددهم، وانكسرت وانتصرت لمرات أكثر من أن أحصيها، عملت فى مهن عديدة حتى صرت فى المهنة التى كنت أرجوها، كل هذا وأكثر كان جزءاً من رحلة شخص صار أنا الآن، لكنه لا يزال يهتز نفسياً حين يصدح صوت الأبنودى وهو يقول "ألفين رحمة عليك يابا.. كنت دراع ينجد غرقان.. وأنا غرقان ف بحور الخوف وف عدم الصبر.. ولدك غرقان يابا محتاج كلمة.. حن عليه وإطلع م القبر" .. عبد الهادى زلط، أيا والدى الحبيب، أنظر من حيث أنت رحمك الله إلى ابنك الصغير الذى طالما حملته على كتفيك، والذى يكتب لك وكأنه يحمل الدنيا فوق كتفيه، لكنه يتبسم فى وجهك الآن وهو يقول لك بكل ما فيه .. وحشتنى.

- البشر هم كنزنا الحقيقى الذى نلقاه فى مشوار الحياة، البشر هم براويز الصور التى تجد لنفسها مكانا على حوائط العمر، البشر هم كل الضحكات والهمهمات والدموع وطبطبات الأيدى ودردشات القلوب التى تبقى منيرة فى أرواحنا، البشر هم كل الذكريات التى تنتصر على الزيف الذى يحاول أن يسكن نفوسنا، والبشر الحقيقيين هم الذين يقدرون أن يحتلوا أماكن اكتشفوها بأنفسهم فى قلوبنا المتعبة، ولكل البشر الحقيقيين الذين عرفتهم والذين تركوا فى روحى علامات تظهر فى تفاصيل حياتى وحروف كتابتى وخطوط تفكيرى وألفاظ حديثى، لهم جميعاً الشكر والمحبة والعرفان من شخصى المتواضع على ما قدموه وما فعلوه، خاصة اولئك الذين لا يعرفون انهم أثروا فىّ، حتى الذين أثروا سلباً، لهم منى شكر لأنهم منحونى الفرصة كى أعرف حلاوة الذين أثروا إيجاباً.

- "على قد فرحى الشديد.. على قد خوفى االشديد.. أحمل إيمانى الأكيد.. يحملنى شكى الأكيد.. وقد ما قريب يا بكرة قد ما انت بعيد" .."أنا كنت شىء وصبحت شىء ثم شىء.. شوف ربنا قادر على كل شىء.. هز الشجر شواشيه ووشوشنى قال.. لا بد ما يموت شىء علشان يحيا شىء.. عجبى" الأولى للخال الأبنودى والثانية لأبينا صلاح جاهين، وهما كل الحكاية.

- لو يدرى دهاة السياسة وصناعها كم نشتاق لوقفتنا فى الميدان وإحتمائنا فيه ببعضنا، لفكروا ألف مرة قبل أن يرتكبوا أى حماقة.

- لم أكن أدرى أنى أحبك لهذا الحد ولهذه الدرجة قبل هذا الأسبوع، لكن صدقينى، وهذا ليس كلاماً جميلاً أغازلك به، لقد أدركت كم أنتِ جميلة وكبيرة وقريبة ومهمة وفارقة، حبيبتى.. يا ألف حبيبتى.. حبى لعينيك أنا كبيرٌ.. وسوف يبقى دائماً كبيرا، زوجتى العزيزة، بحبك.. وحشتينى.

خيوط

2011-04-23T15:30:00.003+02:00

- كانت تخشى شيئاً ما لم تستطع تحديده، شعور مجهول كان يطاردها وهى سائرة بمفردها فى الشارع، نوع غريب من الخوف الغير مبرر، هاتفت والدتها واطمأنت عليها وعلى باقى الأسرة، إختارت شارعاً منيراً بدلاً من المظلم الذى كانت ستسلكه، باغتها هاتف من خطيبها يطمئن عليها بدون سبب وهو ماجعلها تمتن لنفسها أنها تحب شخصاً مثله، وهى تعبر الشارع زغللت الإضاءة المبهرة عينيها فلم تحدد المسافات جيداً، دهمتها سيارة مسرعة.

- كان عائداً لتوه من العمل، مرهقاً ولا يبغى شيئاً أكثر من حمام دافىء وسرير، بمجرد دخوله للمنزل جاءه هاتف من رقم غير مسجل، تأكد المتصل من هويته ثم أخبره أن والدته عندهم بالمستشفى بعد تعرضها لحادث بسيارتها، خرج من المنزل كالمجنون وقاد سيارته بسرعة، ظهرت أمامه فجأة فتاة مرتبكة اتخذت قراراً غبياً بعبور الشارع دون مراعاة لسرعته، لم يستطع أن يمنع السيارة من أن تدهمها، توقف وحملها للمستشفى

وصورة أمه لا تفارقه.

- وهو ذاهب لعمله المسائى كان تفكيره مشغولاً بترتيبات زواجه القريب المنتظر، فى السيارة كان يجرى حواراً مع "الدبدوب" الذى اشترته له خطيبته حين ركبت معه أول مرة بعد الخطوبة، توقف بغته بسبب قط كان يعبر أمام السيارة، أفاق بعد فترة ليكتشف أن سيارة صدمت سيارته من الخلف بقوة حين توقف فجأة، نزل ليجد سيارة الإسعاف تنقل قائدة السيارة التى اصطدمت به، كان سليماً، أخرج هاتفه واتصل بخطيبته التى لا يعرف لماذا خاف عليها فجأة حين فكر أنه كان من الممكن أن يصاب لو لم يربط حزام الأمان، إطمأن أنها بخير دون أن يخبرها بأمر الحادث.

- لم تتصل بها لتعلمها أنها قادمة، كانتا صديقتان وفيتان ليس لواحدة منهما أقرب من الأخرى، كان هذا حتى وقت قريب، اختلفت الأحوال مؤخراً حين شغلتها الدنيا ولم تعد تراها كثيراً، وهو ما آلمها بشدة وأشعرها بأنها أساءت لصاحبتها التى تعلم أنها أسيرة الوحدة وليس لها بعدها سوى قطتها ، قررت أن تذهب لرؤيتها دون أن تنبئها بقدومها، لم تنتظر عودة إبنها الوحيد من عمله، أخذت السيارة وقررت أن تهاتفه فى الطريق وتخبره بزيارتها للصديقة وأنها تركت له الغداء، وهى تبحث فى حقيبتها عن هاتفها تنبهت فجأة على توقف مفاجىء للسيارة التى أمامها، لم تستطع أن تمنع الاصطدام، ولم تشعر بشىء بعد ذلك.

- كانت تبكى بشدة وهى تخشى على قطتها التى خرجت من المنزل على غير العادة ورآها البواب آخر مرة وهى تسير فى إتجاه الشارع الرئيسى، قطتها كانت ونيستها الوحيدة بعدما هاجر أولادها ونسوها.

مواعين

2011-04-17T21:47:00.000+02:00

الموضوع بسيط جداً، بساطته تشبه بساطة الغضب الذى ينتابك وأنت واقف تغسل المواعين على حوض منزلكم وقد تبقى لك خمس كبايات وكام معلقة كنت سايبهم للآخر، وفجأة قبل أن تمد يدك لتصبنهم، تجد الست الوالدة قد فتحت الثلاجة وأخرجت حلتين منها، نظرت فيهما وأفرغت ما بداخلهما فى الزبالة بعدما تأففت قليلاً ثم وضعتهما بجوارك على الرخامة فى إشارة أنهما إنضما للمطلوب منك غسله، أو كأنك كنت تشارك زوجتك فى يوم التنظيف بطى الملابس إستعداداً لوضعها فى أماكنها بالدولاب، وحين تبقى لك "شرابين تدخل فردهم فى بعضها"، إذ بك تجد الست حرمك قد أتحفتك بفم كامل كان يرقص مختالاً على الحبال، فرحمته من التشميسة وألقت به بجوارك على السرير وهى مبتسمة إبتسامة معناها " ودول كمان بقى يا حبيبى".

الغضب الصامت الذى ينتابك من مواقف مثل هذه يشبه تماماً الغضب الذى انتابنا حين إكتشفنا أن المشوار ما زال به خطوات لم نقطعها بعد، وأن الثورة التى حسبناها نجحت وبدأنا نستعد لجنى ثمارها، مازالت تواجه منعطفات خطيرة وتحديات صعبة وشخصيات تمرست على الاعيب السياسة وقذارتها بصورة أكسبتهم نفساً طويلاً لم نتعود أن نستخدمه، غير أننا بدأنا نجربه.

المشكلة فى هذا الغضب أنه يعمى عيوننا بعض الشىء، ومن ثم يدفعنا للـ"تلطيش" فى بعضنا البعض، وقد يدفعنا لتخوين بعضنا البعض، وهذا هو تحديداً ما يريده ذئاب السياسة القدامى، وفى الوقت ذاته هو ما يجب أن نتفاداه ونبتعد عنه بقوة مماثلة للقوة التى ثرنا بها.

أشخاص كثيرون كانوا مثلى مقتنعين بأن الثورة المضادة كلمة كبيرة خفنا منها – ولنا حق فى خوفنا هذا- فمنحناها حجماً أكبر من حجمها، كان هذا رأيى مع أحداث مثل موقعة الاستاد وصراعات السلفيين وحوارات الإخوان، لكننى أعترف بخطأى وأقر به، وأعلن أن الثورة المضادة موجودة بالفعل، وعميقة، بل أزيد على ذلك بأن من يمارسها محترفون، ودليلى على ذلك هو نجاحهم فى بلبلتنا وضرب صفوفنا فى يوم جمعة التطهير الشهير بـ"موقعة المشير".

وإن كان خطاب الرئيس السابق والمخلوع الذى القاه علينا وظهر فيه أنه لا يعلم حتى الآن أنه قد تم خلعه قد زاد اللغط وزاد الشك داخلنا، لكن رجائى الوحيد للجميع أن نتروى قبل أن نكيل الاتهامات لبعضنا البعض، وقبل أن نخون بعضنا البعض، وقبل أن نغضب من مواقف بعضنا البعض، فغضبنا على ومن شخص مثل الرئيس السابق شىء، وغضبنا على الثورة المضادة شىء، ولكن غضبنا على بعضنا شىء مختلف تماماً، يشبه غضبك من أمك وزوجتك، والذى تكتشف بعده أنهما تحبانك وأنك تبادلهما الحب، لكنهما فقط منحاك الفرصة لتزيد المجهود- المرهق من وجهة نظرك والذى لم تتعود عليه- الذى تبذله فى نظافة منزلك.

فى البدء كان الميدان

2011-04-11T18:44:00.002+02:00

يجب التوضيح قبل القراءة أن هذا المقال كُتب ونٌشر قبل أسبوع أو يزيد، وتحديداً قبل مليونية التطهير، وكلامى فيه عنا بدون تفرقة وبدون تخوين، وبدون تقسيم بدأ -مع الأسف- يتجلى بعد تلك الجمعة والسبت الذى تلاها، لهذا فكلامى فيه عنا مجتمعين، كما كنا، وكما ينبغى أن نعود وأن نكون..

حين كنا نقف فى ميدان التحرير فى الفترة ما قبل 11 فبراير كنا نتداول بيننا جملة شهيرة مفادها أنهم يراهنون على الوقت (طبعاً لا تحتاج أن أشرح لك من هم) فيما نراهن نحن على الشعب، كان هذا حالنا ونحن فى الميدان متحصنين ببعضنا البعض، نستمد قوتنا من إجتماعنا، نختلف فى الميدان ونتحاور فى الميدان ونرفض أراء بعضنا البعض فى الميدان ونحب بعضنا البعض فى الميدان ونذيب الفوارق التى تفصلنا فى الميدان ونتكاتف فى الميدان ونتفائل ونتشائم فى الميدان ونثور ونعيش ونحلم ونقرر وننفذ ونصمد ونقاوم ونصبر ونحلّق ونتنفس ونتأكد من صدقنا فى الميدان।।

اليوم مازال أبائنا المتحاورون وصناع القرار أو محاولى الوصول لقرار ولاعبى السياسة ومحلليها ومحرميها، مازالوا كلهم يتكلمون ويختلفون ويحاولون إيجاد دور لكل واحد منهم، مازال كل منهم يحاول رسم المستقبل على طريقته وبألوانه الخاصة، كل منهم ينشىء حزبه الخاص، كل منهم يعلن خطته للنهوض والبناء والتى يراها بالمناسبة الخطة الوحيدة الممكنة، كلهم يراهنون على أنفسهم بعدما استبعدوا الشعب من الصورة ظانين أنهم يتكلمون باسمه كل على حدة، واستبعدوا الوقت من الصورة ظانين أننا سننتظرهم حتى يتفقوا ويحصل كل منهم على مكان مميز بين أضلاع البرواز، لكنهم مع الأسف نسوا أو تناسوا أننا مازلنا قادرين على المراهنة على أشياء لا يملكونها، وأولها وأكبرها وأهمها الميدان.

الواضح فى هذا التوقيت أنهم صاروا يراهنون على المصريين الذين تضرروا بقدر ما من تعطل الأحوال، وصار صوتهم حالياً مسموعاً بصفتهم دعاة الاستقرار فى حين صار الرافضين لأى شىء دعاة فوضى، وما يزيد من قوة هذه الصورة هو موقف بعض المعترضين الذين صاروا يقولون لا لأى قرار وأى عرض وأى محاولة تفاوض دون أن يطرحوا حلولاً بديلة، ولكن هؤلاء ليسوا كل الجهة المستمرة فى العناد والتى لم ترض حتى الآن بما تحقق ومازالت ترى أن هناك إلتفافاً ما يحدث من طرف أو اطراف ما، وهذا هو دافعها الوحيد فى الاستمرار على موقفها الرافض "للاستقرار"، وهو دافعها الوحيد للدعوات المليونية ومحاولات "تفويق" وتوعية ك لمن يستطيعون سياسياً لنمارس جميعاً دوراً ما فى السياسة بدلاً من أن نصير كلنا مشاهدين لمجموعات تلعب مباريات السياسة بمفردها رغم أنها لم تفز حتى الآن فى أية مباراة قوية لو قارنت مبارياتها بمباراة الميدان-التنحى.

خلاصة القول" فى البدء كان الميدان" لهذا لا تستمروا فى إستعلائكم وعدم إنصاتكم حتى لا يعود أبناء الميدان لمهد بعثهم وموطن عزتهم وتعودوا أنتم للظرف الدقيق، والله الموفق والمستعان.

حاشية:

هى ليست محاولة للتحريض ولا محاولة للتخويف، هى محاولة لكتابة مقال يخلو تماماً من الكلمة التى يشوهها البعض حالياً ببعده عنها حتى وهو يدعى بأنه يتكلم باسمها "الثورة".

شكراً.. وكفاية

2011-04-06T17:36:00.000+02:00

أيها السادة، يا أبائنا الكرام ويا معلمينا العظام ويا كل من سبقنا فى العيش على أرض هذا الوطن الحبيب، اسمحوا لنا أن نشكركم، اسمحوا لنا أن نقبل أياديكم الطاهرة وجباهكم العالية، اسمحوا لنا أن نأخذ قبساً من نور الطيبة من عيونكم الهادئة، وأن نتعطر برائحة الخير من أحضانكم الرحبة، ثم أخيراً اسمحوا لنا أن نتمرد عليكم وعلى أبوتكم وأستاذيتكم وحياتكم وأسلوبكم وطيبتكم المفرطة وهدوءكم المبالغ فيه، ببساطة اسمحوا لنا أن نختلف عنكم ومعكم وأن نكون نحن كما نريد لا كما تريدون.

أيها السادة، نحن الجيل الذى اعتدتم أن تصفوه بالرعونة وأن تتهموه بالتسرع، نحن الجيل الذى طالما طالبتموه بأن يهدأ ويتخلى عن العصبية، نحن الجيل الذى حاولتم كثيراً أن تحسنوا لغة خطابه ومفردات كلامه، نحن الجيل الذى كنتم دوماً تمارسون الوصاية عليه وعلى خطواته وأحلامه ومشاريعه وأفكاره، ونحن الجيل الذى اكتفى من كل هذا وقرر التمرد على كل هذا.

نعم أيها السادة، نحن نشكركم كثيراً على كل ما فعلتموه لنا وفينا سلباً كان أو إيجاباً، لكننا بعد شكرنا نطلب منكم الآن أن تتركونا نمارس حياتنا بكل مافيها، نخبركم أنه حان الوقت كى نتحرر من سلطانكم علينا ونبدأ فى العيش كما نريد، وقبل أن تخوفونا كما اعتدتم من أننا سنخطىء، دعونا نذكركم بدرسكم الذى زرعتموه فينا، أن اخطائنا جزء منا، وخطايانا هى أول خطوة فى طريق هدايتنا، وثورتنا هى أول نقطة فى سيل استقرارنا، وتسرعنا هو فرصتنا الأخيرة للحاق بإيقاع عصرنا، وهنا تكمن القضية كلها، أنه عصرنا نحن، وبرغم معرفتنا بأن الفكرة فى حد ذاتها قد تؤذى مشاعركم، ولكن وجب أن نذكركم أن هذا عصرنا، أنتم عشتم عصركم كما أردتم، أخطأتم وتبتم، فكرتم ونفذتم أحياناً وفكرتم ولم تنفذوا أحايين، صنعتم واقعكم، لكن واقعكم صار ماضينا وإرثنا الذى نحمله، وحان الآن وقتنا وعصرنا وواقعنا، حان الوقت لنا كى نخطىء لنتعلم، كى نكفر لنؤمن، كى نخطى لنتوب، حان الوقت كى نلعب اللعبة بأسلوبنا، ويشرفنا أن ندعوكم لتشاركوننا فيها ولكن بقواعدنا، فمن يخش منكم علينا، نرجوه ألا يلومنا حين لا نقعد فى أماكننا حين يحذرنا، ومن يشفق علينا من خطورة ما سنقابله، نذكره بأنكم أنتم أنفسكم خضتم معارككم، ويؤسفنا أننا لم نراكم منتصرين فى كثير منها، لهذا دعونا نخوض معاركنا حتى لو كنا سنخسرها.

أيها السادة، لسنا ناكرى جميل، ولسنا نسىء الأدب، ولكننا نرجوكم أن تتفهموا أن الجيل الذى ربيتم، أو إعتقدتم أنكم ربيتم، أو كان مفترضاً منكم أن تربوا، هذا الجيل قد شب عن الطوق، وصار مسئولاً عن نفسه، لهذا يرجوكم أن تتفهموا أن تسرعه الآن فى محاولة الوصول لشىء، هو خوف من أن يلاقى مصيركم فى الصبر على كل شىء، وأن لغتنا المتربصة المهاجمة ومفرداتنا القوية المباغتة، هى مصل نقى به انفسنا من نتيجة تأدبكم الجم وتحفظكم وتعتعتكم مع كل من استحق الأدب، لأنكم مع كامل الأسف استعملتموه حتى مع كل من لا يستحق، لهذا حان الوقت كى تعترفوا بقدرتنا على الصراخ والحدة، بل وأن تحترموها.

انت المخ وأنا العضلات

2011-02-28T21:08:00.000+02:00

لأكثر من أسبوعين، كان وطناً لعدد كبير من المصريين، كان أرض الأحلام، كان دولة كاملة داخل الدولة، بالطبع هو ميدان التحرير الذى أصبح يستحق اسمه الآن أكثر، فحتى إذا لم يتغير اسمه إلى ميدان الثورة، أو ميدان الشهداء، فسيبقى مهد تحرير هذا البلد، وسيبقى الرمز لهذه الثورة التى منحت المصريين جميعاً واقعاً أفضل، ومنحتهم الفرصة كى يصنعوا بأيديهم مستقبلاً أجمل.

داخل دولة ميدان التحرير وطوال الأيام التى عاشوا فيها هناك ينتظرون إعلان انتصارهم، كان الموجودون من كل أطياف المجتمع، من كل طبقاته ومن كل عناصره، كانوا مزيجاً من البشر لو وضعته فى مكان مشابه، فى ظروف عادية لانتهى الأمر بكارثة نتيجة لصراعات الحضارات والطبقات والأفكار والمواقف السياسية والدينية، ولكن عندما ذاب كل هذا، وأصبح الهم والعقيدة والموقف والغاية والدافع مصر تغير الأمر بصورة أذهلت حتى الموجودين فى الميدان أنفسهم.

الشىء الأكثر إيجابية الذى تحقق فى الميدان هو شىء غير مادى، لن نستطيع أن نصوره أو نمسكه بأيدينا، لكنك إن كنت قد ذهبت إلي الميدان فبالتأكيد قد شعرت به، وهو القدرة على التعايش مع الآخر، القدرة على التعامل مع بشر من طبقات وفئات ما كان أحد يتخيل أن تلتقى أو أن يقوم بينها حوار، أطباء ومهندسون وممثلون ومخرجون وكتاب وشيوخ أزهر وقساوسة ومثقفون وعمال وطلبة جامعات وربات بيوت، وغيرهم كثيرون كانوا يتجاورون يومياً فى كل ركن من أركان الميدان، كنت ستشهد بينهم تناغماً وتوافقاً كنا قد افتقدناه بشدة، عند مدخل الميدان من ناحية كوبرى قصر النيل وعند إحدى نقاط التفتيش كنت ستصل لتقف أمام شاب سيبتسم لك وهو يأخذ منك بطاقتك الشخصية يعطيها لآخر واقف بجواره ليراجع بياناتها، بينما يبدأ هو فى تفتيشك والتأكد من عدم حملك لأسلحة، هذا المشهد الذى قد يبدو عادياً، هو مشهد ستعترف بروعته عندما تعرف أن الشاب الذى فتشك لا يعرف القراءة والكتابة، لكنه وبسبب حياته فى العشوائيات يعرف جيداً كيف يخرج أى أسلحة مختبئة مع شخص ما، وأنه هو الذى اقترح على الشاب المثقف الواقف بجواره أن يقتسما العملية الأمنية، فيراجع المثقف البيانات ليتأكد منها ويتحاور مع صاحبها إن شك فى شىء، بينما يتأكد صاحب الخبرة من الأمان بيديه المدربتين، الشاب الأمى كان صاحب الاقتراح عندما قال لصاحبه -الذى لم يقابله سوى على تلك البوابة ومنذ ربع ساعة- وكأنه يشرح له بمفهومية ولاد البلد " إنت المخ وأنا العضلات".

هذا المثال الذى قد لا يراه البعض شيئاً ذا قيمة، هو فى الحقيقة دليل على حالة الانصهار التى وصل إليها أبناء الميدان، ففى أي ظروف أخرى كان ابن العشوائيات سيتقبل أن يقف بجانبه هذا المثقف بل ويصادقه، وفى أي ظروف أخرى كان سيقبل أن يعترف بجهله وأن يبدى المصلحة العامة على مصلحته الشخصية، فيطلب أن يفعل ما يبرع فيه، وليفعل صاحبه الجزء الآخر،وفى أي ظروف أخرى كان أحدهما سيعترف أن الآخر يكمله، وأنهما يحتاجان لبعضهما البعض.

هذه هى الحالة التى كان الناس عليها فى الميدان أثناء اعتصامهم، وصل الأمر بهم لأن اعترف كل منهم وبكل تواضع بقدراته وبنواقصه، حدث ذلك عندما وضع كل منهم المصلحة العامة فوق مصلحته الشخصية، لينتج وقتها ما أسماه مثقفونا بعد ذلك بـ"الضمير الجمعى"، حيث أصبح للمصريين ضمير واحد يحركهم وهدف واحد ينشدونه، وهذا الضمير الجمعى هو الأمل الباقى لنا فى مرحلة البناء فيما بعد التطهير، هذا الضمير هو الوحيد القادر على النهوض بمصر، إذا اعترف كل منا بقدراته واستخدمها، وساعد غيره على استخدام قدراته.

الثورة بتاعتك

2011-02-21T21:46:00.001+02:00

< يا كل من شاركت فى الثورة واعتقدت بعدها أن دورك انتهى، وجلست لتجتر الذكريات وتشرب الأنخاب وتمارس اللاشىء، اعلم أن هناك أناساً يفكرون ويحلمون الآن لمستقبل أفضل لهذا الوطن، فإن لم تشاركهم الحلم والتفكير، أرجوك ألا تحزن بعد قليل حين لا تجد مكاناً لأفكارك وأحلامك الخاصة بين سطور المستقبل، شاركهم الآن فأنت جزء من المستقبل.

< خلاص يا جدعان، المرحلة الأولى خلصت بكل ما كان فيها وكل من كان فيها، آلام المخاض عدت والجنين أصبح طفلاً صغيراً فى اللفة له اسم وتاريخ ميلاد وشهادة ميلاد، الطفل حالياً موجود فى الحضّانة، حالته مستقرة نسبياً لكن محتاج لحاجات ضرورية علشان يبدأ حياته بصحة كويسة، ومحتاج لشوية حاجات علشان مستقبله يكون مضمون ونقدر نضمن له احتياجاته الأساسية فى مرحلة الطفولة.. اللى بعدها يقدر يقف على رجليه ويشد حيله ويكون مسئول عن نفسه، والحاجات اللى طفلنا ده محتاجها مش صعبة، دى حاجات عند كل واحد فينا، وهى الفيتامينات اللى هتقويه وهى اللبن اللى هيغذيه، الطفل الجميل ده محتاج أفكار وأحلام، من كل واحد فينا وأرجوك ما تبخلش بيهم، وما تقولش إن دورك انتهى ودلوقتى بدأ دور الناس اللى بترسم السياسات، لأنك بكده تكون بترجعنا للى ثرنا عليه، الناس اللى بتفكر وبترسم السياسات مش أحسن منك فى حاجة، مش زيادة عنك إيد ولا رجل ولا عين، وأرجوك اتأكد إنك ممكن يكون عندك فكرة أو معلومة أو حلم مش موجودين عندهم كلهم مجتمعين، أرجوك بعد كل اللى شفناه من بهدلة فى الشوارع وكل اللى اتصدينا له من عنف وقهر وشتيمة وتجريح، أرجوك اتأكد إن انت أهم واحد فى الدنيا، وصدقنى إنت أهم واحد فى الدنيا، وما تقوليش أنا هركز مع نفسى ومع بيتى ومع شغلى علشان أنجح وكل واحد يركز مع نفسه وينجح، لأن ساعتها هنكون مجتمع كله ناس ناجحين لكن مش مع بعض، هتبقى كل حاجة سليمة.. بس لوحدها، وبكده نكون هدمنا أهم حاجة حلوة وصلنا لها فى ثورتنا، وهى إن كلنا إيد واحدة بجد، كنا بنفكر فى مصلحة ابننا، وفى نفس الوقت فى مصلحتنا الشخصية، لأن ده مش بعيد عن ده، وصدقنى فكرتك وحلمك ممكن يفرقوا فى مستقبل مصر كلها، وأرجوك ما تقوليش مش هاقدر أوصلهم لحد، لو عايز توصلهم بجد هتوصلهم، إنت أسقطت نظام «أيوه أنت اللى أسقطته» ولازم تكون قادر إنك تعمل غيره، ولو مش بتحلم ومش بتفكر ما كنتش قدرت على اللى فات، وعشان إنت فعلاً قدرت، أنا متأكد إنك فعلاً تقدر على اللى مستنينا.

< أسهل حاجة إنك تقول على أى واحد خاين، بس بعد ما تقول عليه كده هتستفيد إيه؟ بجد ولا حاجة، لو إنت شايف أى واحد من الناس اللى كانوا بيصادروا على حقنا فى الحلم وبيتهمونا بتهم كتير، وزعلان أكتر إنه دلوقتى بيتلون وبيقول إن هو كان الداعم الأساسى للثورة، وإنت متأكد إنه كذاب، سيبك منه، هو ما يستاهلش، هو قدام نفسه قبل ما يكون قدامنا عارف إنه كداب وما عندوش مبدأ، وواحد زى ده ما يستاهلش تشغل بالك بيه وتخليه ياخد مساحة من تفكيرك وياخد طاقة منك لأنها للأسف هتكون طاقة سلبية، وفر الطاقة دى وخليها إيجابية تصنع حاجة للبلد بيها، واحترم الناس اللى كانت مختلفة معانا لكن دافعهم كان الخوف على البلد، لأنهم زينا بالظبط، بس الفرق كان من طريقة التفكير، أما الناس اللى كانت خايفة على مصالحها الشخصية وعلاقاتها، ما يستاهلوش منك أكتر من كلمة «اتكسفوا على دمكم» وبعدها سيبهم وامشى، البلد مستنياك يا معلم.

عَلَم

2011-02-20T01:57:00.001+02:00

ياااه، يا مين يلايمنى دلوقتى على آلة الزمن، كان يبقى عمل فيا جميلة أشيلها له طول العمر، أصل الأزمة يا صديقى إن النهارده بالنسبة لك الخميس، لكن بالنسبة لى أنا النهارده الاثنين، ماتخافش أنا مش بهزر ولا مسطول ولا بتفلسف عليك، وهاشرحلك.

الجرنال اللى فى إيدك ده بينزل السوق يوم الخميس، لكن إحنا بنقفل العدد يوم الأثنين، يعنى حالياً الساعة 12:30 ليلاً، يعنى فعلياً يوم الثلاثاء بدأ من نصف ساعة، والأزمة فى الفرق الزمنى بين النهارده بتاعك والنهارده بتاعى تتمثل فى إنى باكتب عن الأحداث اللى حصلت لحد يوم الأثنين، ويروح منى الثلاثاء والأربعاء، طبعاً بتحايل على ده عادةً بكتابة مقال غير مرتبط بحدث، أو كتابة آخر مرتبط بحدث تم فى النصف الأول من الأسبوع لكن أنا ضامن استمرار تأثيره حتى نهاىة الأسبوع.

نيجى بقى لمربط الفرس، وهو أنا ليه مصدعك بكل ذلك الشرح المرة دى بالذات.. أقولك، بكره الصبح «بالنسبة لى» هيكون الثلاثاء 25 يناير، وهو اليوم اللى معروف من زمان إنه عيد الشرطة، «التى كانت قديماً فى خدمة الشعب، قبل أن يضم وزير الداخلية الشعب إليها ليخدما الوطن»، ولكنه هذا العام أصبح يوماً يطالب عدد من أبناء مصر فيه بالنزول للشارع فى مظاهرة جماهيرية مصرية سلمية هدفها التغيير «تلك الكلمة التى أصبحت مطاطة بدرجة فجة»، وفى الوقت ذاته هو اليوم الذى دعا فيه عدد آخر من أبناء مصر برضه - يقفون على رصيف الحياة المقابل لذلك الذى يقف عليه الأبناء السابق ذكرهم -، للنزول للشارع لإعلان تجديد الولاء ورفض التغيير وطمأنة السيد الرئيس على حبه فى قلوبهم، وأعتقد أنه كان طبيعياً بعد تلك الدعوتين أن ينتظر الجميع تواجداً مكثفاً لرجال الشرطة المصرية فى نهر الشارع بين رصيفى مصر، وإن كان البعض يعرف مسبقاً بدرجة تكاد تصل لليقين فى صف مَنْ مِن أبناء مصر سيقف رجال الشرطة الذين هم وياللمصادفة أبناء مصر زيهم زى أصحاب الرصيفين.

عودة لآلة الزمن ويومى ويومك، وأنت تقرأ هذا الكلام ربما تكون حدثت فى يوم الثلاثاء «الماضى بالنسبة لك، المقبل بالنسبة لى»، أحداثاً تغير شيئاً من المشهد السياسى فى بلدنا «التى أصبحت مشتتة بين أبنائها»، وهو التغيير الذى ربما يكون سلبياً من وجهة نظر فريق فى حين يكون إيجابياً من وجهة نظر فريق مقابل، والمشكلة الحقيقية هى أن تقهقر أى فريق أو هزيمته ستكون انتصاراً للآخر، وبقاء الوضع على ما هو عليه فى ظل ما أراه الآن ترفاً لا نملكه بعيداً عن كوننا لا نتوقعه، لكل ذلك كنت أبحث عن صديق يقرضنى آلة زمنه لأتمرد على زمنى وأثنينى وخميسك وأعبر مسافة يوم واحد لأعرف كيف أوجه كلامى.

الآن الفرصة سانحة لمن لا يعرفنى وبعض من يعرفوننى لأن يعتقدوا أنى أخشى إعلان موقفى خوفاً من أن أكون فى الفريق الخاسر، أو إننى أنتظر لأرى الموجة التى ستغلب لأركبها، ولكن حتى لا تضيع وقتك الثمين فى محاولة إثبات تلك الشكوك أود أن أعلمك أنى من أبناء الرصيف الأول «أيوه بتوع التغيير»، وإن كنت سأكسب بعض العداوات الجديدة حين أخبر أصحاب هذا الرصيف أنى لست واثقاً من نزولى معهم فى مسابقة «الشارع لمين؟»، وربما أٍقضى ذلك الثلاثاء فى المنزل لأصحو من نومى وأستعير من المبدع محمد خير «استاتيوسه» على الفيس بوك وأقول يا ريتنى كنت معاهم، وإن كنت حقيقة أخشى أن أصحو لأجد رصيفاً غارقاً فى اللون الأحمر والرصيف المقابل يغطيه السواد، لأن ساعتها سيكمل النسر الواقف بينهما علم مصر، لتتحول البلد فى النهاية إلى علم.. لا يجد من يرفع له يده ويحييه فى طابور الصباح عندما تشق شمس الأحلام السحاب الغميق.

حاشية:استشهد ضباط الشرطة وهم يدافعون عن وطنهم ضد المحتل .. فصار عيداً للشرطة.. فطوبى للشهداء، وطوبى للفقراء.

كتبت فى 24 يناير 2011، ونشرت فى 27 يناير 2011، فى جريدة عين

مواجهة

2011-01-10T03:57:00.000+02:00

لااعتقد إنه بيفهم
أو عنده رؤية أو وجهة نظر
لكنى مضطر اسمعه
ولأنى مقتنع إنه مش بيسمع
باقوله حاضر
ومش باحاول اقنعه
لذلك ما اندهشتش ..
من كرهنا المتبادل
لأنى مقتنع..
إن كل واحد بيحب اللى بيدلعه
وانا كل باب بينى وبينه
وانا باقفله
تعمدت ارزعه

تصدقى ؟!

2011-01-09T04:14:00.000+02:00

قلبى انجرح بالشوق
طيبته بالمغنى
ولما داق الخوف
طمنته بعنيكى

...وتصدقى
إطمـّـن

وحَشة

2011-01-09T04:10:00.002+02:00

واحشنى
وحشة الصدر لشهقة ساعة الغرق

لنسمة تروى العرق
...لضحكة حتى لو مجروحة
لكلمة اترمت مبحوحة على رصيف الصمت
طلع صوتها الضعيف
الواهن
الواهى
الباقى رغم انشغال الخلق ف الخلق
رغم ابتعاد العباد فى طرق ومعايش
طلع صوتها الأخير م الحلق
بيقول .. أنا عايش

عطشــان

2011-01-09T03:59:00.001+02:00

ممكن قبل ما تمشى

تسيبى قلم الكحل

وقلم الروج ..

أنا عارف إنك مش ممكن

هتسيبى رموشك

ولا نظرة عينك

حتى البوسة اللى هتروينى بيها

قبل ما تخرجى م الباب

- وإن طالت –

هرجع أعطش بعديها..

مش عارف أنا هعمل إيه

بحاجاتك واقلام مكياجك

لكن يمكن أرتاح

لما الاقى معايا – ف غيابك –

حاجات مشتاقة تشوفك ..

أو تلمس وشك ..

وتبوسك.

فيينا.. عندما تصنع الحياة

2010-11-22T02:40:00.000+02:00

ستلهث، لن تتوقف عن الركض على سطور تلك الرواية «قليلة الصفحات بالمناسبة» وخلف أفكارها، لكن لهاثك سيكون عقلياً أكثر وأنت تحاول أن تتوقع شطحات الشخصية الرئيسية فى الحكاية «فيينا»، ستبقى تمدك فى كل منعطف حكى بكثير من الدهشة بقدرتها على صناعة الحياة وعيش الحياة واستقبال الحياة وقدرتها على الحياة.

المأزق الحقيقى حين تعرض لكتاب، هو الفصل بين الكاتب وشخصياته، وهذا المأزق يضيع مع بعض الكتاب بموهبة كاتبة مثل سحر، فهى تصدر لنا شخصية طاغية، مقتحمة، تحكى عن نفسها، متجددة وأخيراً لا منطقيتها منطقية، فكل ما أقدمت عليه «فيينا» تمنحه منطقاً ما، يبدو صحيحاً لدرجة ما، ثم ما تلبث أن تزيل عنه منطقيته مستعينة برسائل تخفيها ولا تجهربها فتوقعك فى حيرة ما، وهل هناك ما هو أمتع من كل ذلك فى رواية ما.

قصة حياة سريعة وعريضة ومتدفقة عاشتها فيينا، لكنها لم ترغب فى أن تعيشها فقط، بل صنعتها وانتقت الكثير من تفاصيلها، بداية من حياتها مع أسرتها الصغيرة، الأب والأم والشقيق الذى يستمر كمرفأ لموجات الحكى حتى نهاية الرواية، مروراً بحكايات الدراسة الصغيرة والتمردات الصغيرة والمراهقة وصولاً لزواجها من «بظاظا» الذى تتصاعد بعده حدة تمرداتها، وتستمر بعد ذلك فى وضع التمرد أساساً للحياة، تمرد به الكثير من البحث عن الذات، عن الهدف، عن المنطق، لكنه تمرد يبعث على التفكير بقدر ما يدعو للدهشة.

«سأرسم نجمة على جبين فيينا» رواية أصدرتها دار الشروق لسحر مندور المولودة عام 1977 لأم لبنانية وأب مصرى والتى تعمل صحفية فى السفير اللبنانية.

رواية عن أنثى لبنانية تمر عبر العديد من نقاط الاختلاف الفكرى اللبنانى بنفسها، لكنها تركز على الاختلافات الشخصية بداخلها فتضع حكاية يمكنك ببساطة أن تقول عنها رائعة، ثم تشعر أنك لم توفها حقها، ولم توجز كل سحرها واختلافها، وكل قدرتها على رؤية الدنيا من منظور ما - ربما تختلف معه - لكنك قطعاً ستتعلم أن تحترمه.

اعترافات الرواية

2010-10-25T04:07:00.003+02:00

إن كانت رواية أحداثها مختلقة من خيال الكاتب، فهو كاتب خصب الخيال غزير الموهبة عميق التجارب وصاحب أسلوب متدفق، لا تملك إلا أن تسلمه مفاتيح روحك حين تقرأ له، وإن كانت اعترافات لأحداث ووقائع حقيقية، فهو صادق لدرجة مبهرة وبسيط لدرجة «تعقد»، ومتصالح مع ذاته لدرجة تدعو للتأمل، وحكاء بارع تتمنى دوماً الوقوع فى براثن حكيه، وإن كانت مزيجاً من هذا وذاك، فهو كل هذا وكل ذلك.

هذا هو انطباعك الأول الذى ستخرج به من سطور «كل أحذيتي ضيقة»الصادرة عن دار ميريت، والتى صُنفت على غلافها بأنها «اعترافات»، فى حين يوضح غلافها الداخلى أنها «رواية» للكاتب عادل أسعد الميرى، والذى يأخذنا فى رحلة حياة مع البطل «ناجى نجيب المنياوى»، رحلة نبدأها مع أسئلة الطفل الصغير حول الاختلاف بينه «هو المسيحى» وبين زملائه فى الفصل من المسلمين، ليأخذنا بعدها فى سلسلة من الاكتشافات المذهلة لحقيقة أشياء تبدو بديهية فى حياتنا، عبر حياة غنية للمراهق الذى يدخل كلية الطب بناء على رغبة أبيه، لكنه يتمرد بعدها على مهنته ويلجأ للموسيقى التى ما يلبث أن يهرب منها للإرشاد السياحى، الذى ينقله بدوره للتدريس.

خلال هذه الرحلة يرسم الأستاذ عادل ملامح شخصيات ربما قابلها أحدنا فى حياته العادية، لكنه يرسمها بحروف كاتب شاهد من الدنيا الكثير الذى يمكنه من رسم تفصيلات صغيرة ربما لا تلحظها عيوننا من فرط التعود على الحياة، كما يرصد ملامح من شخصيته يكشفها ويكتشفها بصورة تبعث على الدهشة من مقدار التصالح مع النفس الذى يتكلم به، وفى نهاية هذه الرحلة ربما تستطيع أن تفهم المغزى وراء عنوان الرواية «العميق جداً».

وقتها وحين تعرف أن عادل الميرى نفسه مر بحياة حقيقية مارس فيها الطب وعمل بالموسيقى والإرشاد السياحى والتدريس، لن تملك إلا أن تندهش من كم التجارب التى خاضها هذا الرجل، ومنحته كل هذه التفاصيل التى كانت لتضيع لو لم يكن يملك هذا الأسلوب المتفرد فى الكتابة.

صدر للكاتب قبل هذه الرواية عدة عناوين منها «تسكع» و«تأملات جوال فى المدن والأحوال»، لكن من يقرأ له للمرة الأولى سيندهش من أن كاتباً بهذه الموهبة لم ينل بعد حظه من الشهرة، وساعتها ستتساءل.. هل حذاء الشهرة أيضاً ضيق عليك يا «ميرى»؟

اقرأ كتابك

2010-10-11T02:05:00.002+02:00

حين يكون الحديث عن الكتب، فمن الطبيعى أن تجد من يسألك عن أهم الكتب التى قرأتها فى حياتك، وقتها تبدأ فى ممارسة الدعبسة متجولاً فى شوارع ذاكرتك ومقلباً فى رفوف دماغك عن كلمات ما زالت محتفظة بضوئها رغم مرور سنوات على اللحظة التى قابلتها فيها، وتبدأ فى الجرى على سطور فهرس عقلك باحثاً عن عناوين لكتب معلقة فى براويز الخلود على جدران ذاتك، كل هذا الجرى وهذه الدعبسة للوصول لإجابة عن السؤال.

ولكن حين تكون هوايتك الأسمى هى قراءة البشر ومطالعة صفحات وجوههم ومتابعة سطور أرواحهم وفهم كلماتهم وتقليب أوراق نفوسهم، وقتها ستحتار وأنت تبحث فى مكتبة عمرك عن أسماء أشخاص يمتلكون العناوين الأكثر إثارة وتأثيراً فى رحلتك.

الجميل فى رحلتك وأنت تبحث فى كتب البشر أنك ستجد كتباً شاركت فى كتابة سطورها ولو بكلمات قليلة، وستجد بشراً تركت أنت فى أرواحهم وفى عقولهم حروفاً معدودة، وقتها يتأرجح شعورك بين الفخر والندم والمسئولية، ستفرح لكل الكلمات الجيدة التى تركتها واستفاد منها أحد ما، وستندم على كلمات أطلقتها ولوثت جزءاً من براءة أحد ما، وربما تندم على فرصة مرت دون أن تنقش فيها كلماتك، وفى الحالات كلها ستشعر بالمسئولية لاشتراكك فى الكتابة، فكل الكتاب مسئولون ولو بدرجات.

تعلم أن تكون أنانياً، هذه نصيحتى لك، وعملاً بها، ابدأ فى التفتيش فى كتابك الخاص، ابحث عن آخرين منحتهم صفحات روحك لكنهم - بقصد أو بدون- تركوها بيضاء، بعضهم ضن عليك بالمعرفة، والبعض خشى عليك منها، ابحث عن سطورك الخاصة التى استطعت أن تسطرها بنفسك لنفسك تشرح فيها - لك وللآخرين- حكمة الحياة كما فهمتها، أو حتى طالع الأجزاء التى خلدت فيها محاولاتك الخاصة للفهم.

تعلم أن تكون أكثر أنانية، هذه نصيحتى الأهم لو كنت تدرى، حاول أن تجعل نفسك - كتابك- متجدداً، حاول أن يكون لك أكثر من طبعة وكل واحدة منها مزيدة ومنقحة، لكل منها مقدمة جديدة، وكل منها تحتفى ببشر أكثر حقيقية، وكل منها تحكى عن روح أكثر قلقاً بحثاً عن الراحة، كل منها فيه أسئلة أصعب لفهم الأسرار، كل منها فيه حكايات أمتع، ومشاعر أعمق، ودموع أصدق، وضحكات أعلى، كل منها فيه أنت.. كما تحب أن تكون.. وكما تحب أن تقرأ.

مصر بتخسر زيتون

2010-09-30T18:11:00.006+03:00

طبعاً مافيش حد منكم يعرف إن محمد زيتون صاحبى، وده لأن غالباً مافيش حد منكم يعرف محمد زيتون أصلاً، ده لو كان حد منكم يعرفنى، المهم وما علينا، زيتون من قرابة سنة ونصف اضطر إنه يستجيب لكل الضغوط ويسافر للعمل بإحدى دول النفط الشقيقة جداً، ولما نقول إن زيتون اضطر يبقى لازم تعرفوا إنه كان قبلها رافض تماماً لفكرة السفر للعمل بالخارج، وده بسبب إنه كان مصدق إن مصر فيها كل اللى هو محتاجه، وكان واحد من أشد المعادين لظاهرة الخلجنة، وكان بيكره لهجة البلد اللي سافر لها تحديداً بصورة مرعبة، وكان شايف إن بلدنا لسه فيها أمل، وإن حالتنا الاقتصادية والمجتمعية والثقافية من الممكن أن تنصلح، ده كمان كان بيفكر في وسيلة للارتقاء بالحال.
بقي أن أذكر أن زيتون كان وما زال قارئ نهم وفاهم ومتذوق وأقدر بكل ثقة أقول عليه مثقف، ولما كان واحد مننا بيقرا كتاب جديد كنا بنتناقش فيه مع بعض، وكان - قبل سفره - أول شخص أعرض عليه أى شىء جديد أكتبه.
المهم لتانى مرة، زيتون قبل ما يسافر أصر على إنه يخصص يوم كامل لجولة شراء كتب يستعين بها علي إحساس الغربة، وهي الجولة اللي طلعنا منها بمجموعة منتقاة من الكتب، حاولنا نبعد فيها قدر المستطاع عن الروايات التي لن يجد وقتاً لقراءتها بصورة يومية تحافظ على تسلسل الأحداث فى رأسه، وإن كان ده ما منعش العم خيرى شلبى من إنه يضم اسمه لقائمة الكتاب الذين سافروا مع زيتون. وصل زيتون لمطار الدولة النفطية الشقيقة، وهناك حاول أفراد الأمن مصادرة أحد الكتب التي حملها معه، وكانت محاولة المصادرة من نصيب كتاب (ماذا حدث للمصريين؟!) للمفكر الكبير جلال أمين، طبعاً زيتون استقتل على الكتاب ومارضيش يمشى غير والكتاب معاه، لكنه أول ما اشتري خط تليفون اتصل بيا وحكالى الواقعة وسألنى سؤاله الباقى فى ذهنى حتي الآن ((الكتاب بيسأل عن اللى حصل للمصريين، وهم ولاد الـ ... دول مالهم؟ طيب لو كان بيسأل عن اللى حصل لهم كانوا عملوا فيا إيه؟!)). طبعاً الضحك اللي ضحكناه يوميها ما يجيش أى حاجة جنب الضحك اللي ضحكناه وهو مسافر تانى مرة راجع من الإجازة لما حاولوا في نفس المطار يصادروا كتاب (حبة هوا) للمتفرد وليد طاهر. لحد دلوقتى مش عارفين زيتون وهو مسافر السبت المقبل هيكون نصيب المصادرة لكتاب إيه من الكتب اللي هو ناوى ياخدها معاه؟! كل الحكاية دى مش مهمة، المهم إن زيتون كان بيتكلم جد، وكان مرعوب وهو بيقولى من يومين إنه في السنة ونصف غياب دى لاحظ إن مجتمعنا بينهار، وإنه ممكن يفكر جدياً في عدم الرجوع لمصر، قالها وهو حزين.. علشان مصر بتخسر واحد كمان.

دراما الهروب.. عن الغياب والعودة والحزن والفرح

2010-09-29T17:29:00.004+03:00

مبتدأ..

«شفافين».. هكذا يحولنا الحزن، ينقينا ويجعلنا أطهر وأقرب لفطرتنا الإنسانية، يمسح كل شوائب المشاعر العابرة المزيفة المستهلكة وينتصر للإنسان الحقيقي في داخلنا، يهذبه ويربت علي أكتافه المتعبة ويعيد غسل روحه فتظهر حقيقتها مرة أخري بعدما كادت تختفي تحت وطأة الزيف اليومي، وسطوة الحبل الخفي الذي يربطنا في ساقية الحياة فتأخذنا لندور فيها بغير أن ندري أننا ندور في مكاننا ولا نتقدم رغم خطواتنا الكثيرة، ليأتي الحزن علي غير انتظار منا وبغير ترتيب ليزيل الغمامة التي تغطي أعيننا ويمنحنا الفرصة لنري حقيقة ما نحن عليه علّـنا نتذكر ما كنا نريد أن نكونه.

قطع غير منتظر..

المدة تقترب من ستة أشهر، لم أكتب أي شيء.. أي شيء علي الإطلاق، كنت في دوامة طاحنة منعتني من التمتع بشعور الاستقرار، دخلت في مرحلة جديدة في الحياة، أصبح تفكيري مادياً بعد أن اصطدمت بمادية الحياة، وبعدما كنت أرفض أن أتحول إلي رقم، صرت أتكلم فقط بالأرقام وأحصي ما في جيبي قبل أن أحلم بأي شيء، لم يكن لدي وقت للتفكير في الكتابة، وحين كانت تداهمني رغبتي في الإمساك بالقلم ومنحه متعة مضاجعة الورق للاستمتاع بولادة الأفكار وخلق الكلمات، كانت عزيمتي أضعف من أن أخلق ولو لحظة أستعيد فيها حقيقتي فكنت أستسهل وأنغمس فيما أنا فيه فأنسي ما أنا عليه، وأعيش.. أو أظن أني أعيش.
حوالي ستة أشهر وعدد من القريبين مني يطلبون مني أن أكتب، ليس لأني سأغير العالم حين أكتب، بل لأنهم يعرفون أني أستعيد توازني النفسي حين أمسك قلمي وأخرج مكنون روحي مداداً يهتك بياض الصفحة الخالية المستفزة، والحقيقة أني كنت أتألم حين يطلب مني أحد أن أكتب، فاحتياجي لمتعة الكتابة كان أكثر وأشد وأقوي من احتياجهم، لكني كنت أشعر أني صرت مزيفاً بدرجة تمنعني من تدنيس الكتابة وفعلها الطاهر، بل كنت أخشي الكتابة خوفاً من أن تفضح كلماتي وأفكاري ما صرت عليه، فالكتابة الحقيقية لا تكذب ولا تستطيع أن تكذب، وإن فعلت صارت مزيفة مثل الكثير في حياتنا.

عودة غير منطقية للسياق..

حين نزل وترك المسرح معلناً انتهاء الحفل وجدتني علي حين غرة عارياً أمام نفسي، كنت أفتش في داخلي عن تعريف لما أنا عليه، هل هو انهزام أم انتصار، شعور بالتعاسة أم بالسعادة، رضا أم سخط، حيرتي كانت تنتشر في جنباتي وأنا أفتش عن توصيف لشعوري الحقيقي، واكتشفت أني عايشت هذا الشعور وداهمني هذا الإحساس من قبل، فصرت أفتش في ذاكرة مشاعري و" أدعبس " فيها بحثاً عن اسم لهذا الطعم المتأرجح بين المرارة واللذة في حلقي، فألقاني بحثي إلي حقيقة أن منير حين غني هذه المرة كان شفافاً وحقيقياً وصادقاً للدرجة التي جعلتني أستعيد متعة الشعور بـ"عبقرية الحزن"، وتأكدت من هذا بدرجة تأكدي من أن تربيتي علي كتفه وشدتي علي كفه وقبلتي علي جبينه قد وصلوه وشعر بهم رغم أننا لم نلتق، لكنها المساحة التي أوجدها هو بصدقه ليعبر فيها الغناء ممزوجاً بالكبرياء والحزن من قلبه لقلوبنا، هي نفسها المساحة التي استقبل فيها ضمتنا له وقبلتنا علي جبينه وتربيتنا علي روحه.

استطراد..

منذ فترة لست أستطيع تحديدها لم أمر بهذا المأزق النفسي وبهذه اللحظة الممتعة، لم أشعر بإنسانيتي.. وفجأة ( يبدو أنني أصبحت كثير الفجآت ) أفقت علي دموعي وأنا أشاهد آخر مشاهد الأسطوري ( شون بين ) في فيلم (I am Sam) ، فاندهشت - استعادتي للقدرة علي الاندهاش شيء يستحق الإحتفاء في حد ذاته - واكتشفت أني مازلت أملك ذلك الإنسان الذي اعتاد أن يكون بداخلي وكدت أن أنساه، ولست أعرف حقيقة هل كان (الملك) سبباً في استعادتي له أم أن فترة غيابه قد انتهت بصورة اعتيادية وشعر برغبته في العودة فاستغل فرصة وجود دراما جيدة وممتعة وتسلل معها ليستقر من جديد بين ضلوعي.

خاتمة مضطربة..

أكتب.. لم أكن أعرف أن مجرد فعلي هذا سيمنحني السعادة يوماً ما ويعيد لي الكثير من اتزاني النفسي، وها أنا بعد حوالي نصف سنة من الغياب أفعلها وأفرح وأكتب..ولعل هناك أناس سيفرحون لعودتي وهناك آخرون سيفرحون لفرحي.. فشكراً للجميع.. وأعتذر لمن يعرفون أني أقصدهم دون أن ينتظروا مني اعتذار.. وأهلاً بي مرة أخري.. الحمد لله علي السلامة.

تستمر

2010-05-12T20:44:00.003+03:00

جيفارا، وغاندى، وعمر المختار، وجميلة بوحريد، ومارتن لوثركينج، محمد على باشا، والملك فاروق، ومحمد نجيب، وجمال عبدالناصر، وأنور السادات، حسن البنا، وسيد قطب، هتلر، ومصطفى كمال أتاتورك، وتشرشل، وديجول، ومناحم بيجن، وإبراهام لنكولن، وجون كينيدى، ونهرو، وصدام حسين، وياسر عرفات، سعد زغلول، وأحمد عرابى، ومصطفى كامل، ومحمد فريد، والشهيد أحمد ياسين.

سيد درويش، والشيخ إمام عيسى، وسيد مكاوى، وأم كلثوم، ومحمد عبدالوهاب، وفريد الأطرش، ومحمد فوزى، وبليغ حمدى، وأحمد منيب، وعبدالحليم حافظ، ومحمد رشدى، ومحرم فؤاد، وداليدا، وبوب مارلى، وفرانك سيناترا، ومايكل جاكسون.

فؤاد حداد، وبيرم التونسى، وصلاح جاهين، وأمل دنقل، ونجيب سرور، وعبدالرحيم منصور، ونزار قبانى، ومحمود درويش، ونجيب محفوظ، وأنطوان تشيكوف، ويوسف السباعى، وطه حسين، وصالح مرسى، وناجى العلى، ومصطفى محمود.

أحمد زكى، وعادل أدهم، وزكى رستم، ويوسف وهبى، ومحمود المليجى، ويوسف شاهين، وصلاح منصور، وعبدالمنعم مدبولى، وعبدالله غيث، ومحمود مرسى، ويحيى شاهين، وسعاد حسنى، وعلاء ولى الدين، وأمينة رزق، وتوفيق الدقن، ونجيب الريحانى، وفريد شوقى، وأحمد مظهر، ومحمد رضا، وعبدالوارث عسر.

الشيخ محمد الغزالى، والشيخ الشعراوى، والنقشبندى، والشيخ كشك.

أبويا، وأمى، وخالتى نبيلة، وعمتى زينب، وعمى إبراهيم، وطنط سميحة، وأميرعبدالمجيد.

وأخيرًا الخواجة لامبو العجوز.

كلهم ماتوا.. واستمرت الحياة

حكمة العدد.. الحياة ما بتقفش على أفراد.. بس.. سلام

ولاد الكلب

2010-05-05T19:37:00.003+03:00

دمه خفيف، لسانه طويل، حشرى، ابن نكتة، ابن بلد، عاطفى، متدين، كذاب، «محوراتى»، عصبى، دمه حامى، حنون، تسهل إثارته، تسهل قيادته، راضى بقليله، مسالم، «زييط»، «أقرع ونزهى»، هجاص، ما بيشتكيش لحد ما يطق من جنابه، بيصبر على جار السو، الباب اللى تجيله منه الريح بيسده علشان يستريح، لو فى البلد اللى بتعبد الطور بيحش ويرميله، لو مالوش كبير بيشتريله كبير، لو شاف حد مالوش ضهر بيضربه على بطنه، لو له عند الكلب حاجة بيقوله يا سيدى، اللى يتجوز امه يبقى عمه، بيشغل قرآن وهو شغال ويسب الدين ويكروت الشغل، ما بيركعهاش ويقول إن ربك رب قلوب، بيسمع أغانى «زبالة» طول اليوم وآخر الليل يشتمها ويقول فين زمن الفن الجميل، ما بيقراش بس بيفتى فى كل حاجة، على كل لون «ياباطيسته»، عنيد وعنّدى، صبور لدرجة تخض، لو جاله الطوفان بياخد ابنه تحت رجليه، رغاى، بيحشش حتى لو مش لاقى يتعشى، يتريق على نفسه لو ما لاقاش حد يتريق عليه، بغزاله، يقتل القتيل ويمشى فى جنازته، بيحب اللى يدلعه، حمّال أسية، عينه زايغة، يعبى الشمس فى قزايز، يبيع الهوا، دمعته قريبة وقلبه رهيف، بىحب الفرفشة، لما يضحك من قلبه يقول اللهم أجعله خير، بينسى بسرعة، يوديك البحر ويجيبك عطشان، نفسه حلوة، اللى فى جيبه مش ليه، ما بيتعلمش من أخطائه، مش مذاكر تاريخ، بيسرق ومش عايز حد يسرقه، كلمة تجمعه وعصاية تجّريه، فاضى وبيعمل قاضى، يشتم ويجرى، بيجى فى الهايفة ويتصدر، ما بيلعبش حلو غير تحت الضغط، يعمل كل حاجة أحسن من الكتاب ما بيقول بس يبوظ التفنيشة، بيحب الزحمة بس بيشتكى منها، بياخد حقه بدراعه، يكدب الكدبة ويصدقها، عارف كل حاجة ومدكن، زى القطط بيحب خناقّه، بياكل وينكر، يبات مظلوم ولا يباتش ظالم، يدعى على ابنه ويكره اللى يقول آمين، تسمع كلامه تصدقه تشوف أموره تستعجب، النيل رواه والخير والسرطان والكوليرا والمجارى وفيروس سى والبلهارسيا ومخلفات المصانع جواه، اعتقد انكم لا تحتاجون منى أن أخبركم بأننى أتحدث عن الشعب المصرى الذى قال عنه الخال الأبنودى «الشعب المصرى لئيم جداً وماهوش مضمون» إيه مناسبة الكلام ده؟!، مافيش مناسبة بس افتكرته وقلت أمسى عليه.. مساء الفل يا شعب.

حاشية

«إحنا ولاد الكلب.. الشعب، إحنا بتوع الأجمل وطريقه الصعب» الأبنودى

«لو سألتك انت مصرى.. تقولى إيه؟!» نانسى عجرم

للتاريخ .. والجغرافيا

2010-05-01T20:53:00.001+03:00

- الثورة، تلك الكلمة الواسعة اللا محدودة العصية على التعريف، أسطورة رفض الواقع وفرض الحلم، حلم التغيير والانعتاق والتمرد وتحديد المصير وصناعة القدر، محاولة التمرد واستعادة المستلب، لقمة العيش وقطعة الموسيقى وصفحة الكتاب والصوت المصادر والحلم المخنوق والواقع المهان وخريطة الوطن الحزينة وحق الحياة «لكل من قالوا لا فى وجه من قالوا نعم»، ابتغاء الأفضل والأنقى والأطهر والأوضح والأجمل والأعدل والأكمل والأسهل والأنبل، تلك الكلمة التى سنقابل فى طريقنا إليها كل ما يدفعنا للتخلى عنها، كل الإهانات والاتهامات والوصمات التى تشوه فى صدورنا صورتها البيضاء النقية، الخضراء المشرقة، هى نفسها الكلمة التى ستبقى محافظة لنفسها على مكان فى أرواحنا يجعلنا كلما «تغفلقت» الطرق فى وجوهنا، تجعلنا «نبص قدامنا.. على شمس أحلامنا.. نلقاها بنشق السحاب الغميق».

- الوطن، هذا المستحيل على التعريف، المستحيل على النسيان، المستحيل على الغياب، المعشوق والمكروه فى آن ،القريب والبعيد فى آن، الطيب والشرس والقبيح فى آن، الساكن فى الصدور رغم كل محاولاتنا لإخراجه ولو فى بصقة، المسيطر على العقول رغم كل محاولاتنا لزرع هذه العقول فى غيره، هذا الذى نقدسه ونعشقه ونشتهيه، «ونحبه ونلعن أبوه بعشق زى الداء»، هذا الذى نفتقده ونحن فيه مثلما نفتقده فى بعدنا عنه، هذا الذى لا ولم ولن ينحصر فى راية ولا خريطة ولا حدود وبالتأكيد ولا أشخاص، هذا الوطن.. حزين.. ولو قالو لنا غير ذلك.

- الغباء، الآفة الكبرى فى حياتنا، هذا الداء الذى لن يجدى معه دواء، فسيبقى يعذب أصحابه حتى يلقى بهم إلي مزبلة التاريخ، هذا المرض الذى يضرب عقل بعض من يفترض فيهم الحكمة فيكشف زيف حقيقتهم ويوضح مدى ضياعهم وانسحاقهم وانحطاطهم وهو ما يؤدى بدوره لابتعاد الاصحاء عقلياً عنهم خشية انتقال العدوى، هذا المرض الذى ضرب بعض ابناء هذا البلد فى زمن سابق فألصقوا بالعظيم - نعم العظيم - نجيب سرور تهمة الجنون واودعوه مستشفى الأمراض العقلية بعدما فشلت كل محاولاتهم البوليسية عن ردعه وإيقاف سيل كلماته، ومرت الأيام ورحلوا جميعاً، فبقي نجيب حاضراً بكتاباته واشعاره ومسرحياته، بل وحتى "بأباحته" العبقرية وكان مصيرهم صفيحة زبالة الوطن، وهي نفس الصفيحة التى نأسف ونحن نرى بعض الأشخاص فى أيامنا هذه يجدّون السير فى اتجاهها بل ويبحثون لنفسهم عن مكان فى "قعرها" وليس على السطح، فيا كل من طالبوا باطلاق الرصاص على شباب هذا البلد الذين تجرأوا ورسموا على صدورهم " وردة وبيت وقلب وعلم"، ويا كل من فزعوا لقيام غيرهم ومطالبته بحقه فى الوقت الذى كانوا هم يستعدون لأكل هذا الحق، يا كل هؤلاء.. تأكدوا أن الصفيحة سيبقى بها دوماً مكان لكم.

- الكلمة إيد.. الكلمة رجل.. الكلمة باب.. الكلمة نجمة كهربية فى الضباب.. الكلمة كوبرى صلب فوق بحر العباب.. الجن يا أحباب ما يقدر يهدمه.. فاتكلموا.

وهو هنا ..ك

2010-04-22T14:45:00.001+02:00

أحياناً نقترب من تحقيق أحلامنا للدرجة التى نشعر معها بأننا لامسناها، نكاد نقبض عليها بأيدينا ونتنسم أنفاسها، ونملى عيوننا ببهجة رؤياها، وفى أحيان أخرى تضيع منا الأحلام.. تبتعد وتنأى بنفسها وتصر على أن تختفى وتتوارى عنا لتتركنا فى متاهاتنا البعيدة نبحث عن سراب ربما نهتدى به وله فنستعيد شوقنا للحياة وحرصنا عليها وأملنا فيها.. وبين هذه الأحيان وتلك تستمر أيامنا فى «السرسبة» من بين أصابعنا دون أن نقدر على منعها.
وسط سرسبة الأيام وبعترة الأحلام نسير فى دروبنا تصحبنا طبطبات المزيكا الربانى على أرواحنا المتعبة ويؤنس وحدتنا دفء حكايات الرفاق، تنير طريقنا ابتسامات أحبابنا وأصحاب الروح، نستند على أكتاف تجاورنا وتستند على أكتافنا أكتاف، نخسر فى سيرنا رفاقاً وتمنحنا الحياة غيرهم لمرات ومرات، تهزمنا دموعنا للحظات نشعر وكأنها نهاية العالم لتعلو بعدها جلجلات ضحكاتنا فى رسالة مفادها أن أجمل أيام حياتنا لم يأت بعد وسيأتي.
كل هذا وهو هناك.. فى مكانه البعيد.. أقرب إلينا مما نتصور، يهدهد أرواحنا ويحنو عليها، يبعث لها برسالاته التى لا تخطىء طريقها، يمنحنا كل ما نحتاجه وإن لم ندرك أننا نحتاجه، وحين يمنع عنا ما نظن أننا نحتاجه، يكون منتظراً منا أن ندرك أن ما نحتاجه فعلاً هو أن نشتاق لشىء ما ونبحث عنه ونجد فى سبيل الوصول إليه وأن نستعيد متعة الأحلام ومتعة تحقيقها.
دوماً هو هناك، والعجيب أن هناك هذه ليست بالبعد الذى نظنه، دوماً هو هناك والجميل أن هناك هذه جزء منها فينا، دوماً هو هناك فى عليائه ينظر إلى أخطائنا ويحزن لها وعليها بأكثر مما نحزن نحن أنفسنا، يفرح لمساحات الضوء التى تتفتح فى أرواحنا فتنيرها، ودوماً هو هنا.. ينتظرنا ويتقرب إلينا حتى ونحن - بجهل - ننأى ونعرض عنه، دوماً هو هنا منتظر لعودتنا فرح بها.
دوماً هو موجود، يجده البعض فى بيته كلما زاروه، والبعض الآخر يبحث عنه فى وجوه وقلوب الناس، لكن بعضنا تشغله أحلامه وربما يشغله غياب أحلامه عن تذكر وجوده، فنسير فى طرقنا، وقد خسرنا متعة تذكره حتى نقابله بغير انتظار منا فى آخر الأماكن التى توقعنا وجوده فيها، ولكن أينما كان المكان فمتعة لقائه والارتماء فى عمق حنانه وعفوه تهتز لها الروح طرباً، وتنتشى وتفرح فتلهج ألستنا بعد طول اشتياق.. «الله».. فنتوحد جميعاً فى لحن سماوى بديع يخرج معه صوت من عمق أرواحنا المتعبة الباحثة عن الحقيقة لينشد فى وسط نور ربانى يغمر كل ما فينا..
مولاى إنى ببابك قد بسطت يدي.. من لى ألوذ به إلاك يا سندي.

حاشية :
أجمل ما يمكن أن تكتبه، هو ما لم تنتظر كتابته، فكم جميلة هى الكتابة التى تخرج من أرواحنا لترغمنا أن نكتبها، وبعد انتهائنا منها.. نفرح.

علا

2010-04-18T12:35:00.000+02:00

«الشخص الواقع تحت تأثير غيبوبة هو شخص على قيد الحياة، لكنه ليس نائماً، موجة نشاط الدماغ لشخص فى غيبوبة تختلف كثيراً عن تلك لدى شخص نائم، يمكنك إيقاظ شخص من النوم، لكن لا يمكنك إيقاظ شخص من حالة غيبوبة، عادة لا تستغرق الغيبوبة أكثر من بضعة أسابيع، الكثير من الأفراد يستعيدون أداءهم البدنى والعقلى بشكل كامل عندما يخرجون من الغيبوبة».

صديقى أحمد صلاح أسمحلى أن أهديها معك هذه الكلمات.. إليها.. إلى علا.. تقومى بالسلامة.

مربع

2010-04-18T12:30:00.002+02:00

- الحزن، ذلك الذى أصبح «زى البرد.. زى الصداع»، ذلك الصديق الأقرب والزائر الدائم والرفيق الأبقي، ذلك الذى يفرض وجوده بمجرد أن تفكر فى كتابة شىء ما، ذلك الذى يلقى بظلاله فى الكثير من الأوقات والعديد من المناسبات، ذلك الذى يعرف طريقه إلى دهاليز الروح فلا يبرحها، ذلك الذى لا نعرف متى يأتى أو متى يرحل، ذلك القابع فى صمت وهدوء يتحين الفرصة للظهور واحتلال شوارع الإحساس وإعلان سيطرته عليها، ذلك الشفاف العميق الذى يكسو النفوس بطبقة حانية من الدموع التى تطهر الروح والبدن، ذلك الحزن الذى هو كل ذلك يملك من الصدق ومن الحقيقة ما يجعله يعلن انهزامه أمام ابتسامة فرحة تأتى دونما موعد ودونما انتظار تجعلنى أدرك كلما رأيتك بعد غياب إنى «لسه قادر فى الحزن أفرح».

- الغربة، تلك التى «جوانا أو برانا فينا» مؤلمة وموجعة وموحشة بالقدر الذى يجعلك تتعاطف مع شخص لا تعرفه ولا تجمعكما صداقة من أى نوع لمجرد أن تعرف أنه مثلك.. غريب.

- الموسيقى، هذه الصديقة الرقيقة التى تقبل أن تتشكل باللحن الذى تريده فى اللحظة التى تحتاجه فيها، هذه الرفيقة التى تعزفها أصابع العمر على أوتار الروح فيتمايل معها عود البدن متألماً أو منتشياً ومستمتعاً فى الحالتين فتتأكد وقتها أنك ما زلت حياً تنبض عروقك بـ«سحر المغنى».

- القراءة، هذا النهر الأخير الصالحة مياهه للشرب، هذا النهر الذى مازال محتفظاً بنقاوة مياهه وطهارتها وعذوبتها رغم محاولات تعكيرها، هو الحصن الأخير الذى تختبئ فيه أرواحنا وعقولنا من قسوة الواقع وإيلامه وصخبه وملله وعنفه وعبثه وتخبطه وتشوهه، هذا النهر هو أملك الباقى فى أن «تفتح شبابيك الحلم وتفتح طريق لبكرة».

وحشتنى

2010-03-14T01:02:00.001+02:00

وحشتنى
قلت اعدى اسلم عليا ، ماكنتش أعرف إنى مش هالاقينى ، سبتلى ورقة مكتوب فيها ( وحشتنى ) لما رجعت لقيتها ، بس ماعرفتش مين اللى سايبها ، مع إنى حاسس إنى شفت الخط ده قبل كده ، بس واضح إن الإيد اللى كتبت كانت بترتعش ، بنفس وضوح الدمعة اللى ف العين اللى بتقرا ، سبتها ونزلت أدور على حد اقعد معاه ، مالقيتش غير واحد يشبهلى ، قعدت شوية واتخنقت ، روحت لقيت البيت زهق من الوحدة وراح يدور على حد يونّسه ، ومكانه كان فيه ورقة صغيرة مكتوب فيها بخط انا كنت عارفه كويس .. ( و حـ شـ تـ نـ ى )

احترس من لعبة الست

2010-01-01T16:05:00.002+02:00

صديقة جديدة عرفتها منذ شهور ، متقلبة المزاج كانت ، وأنا بطبعى أعشق النساء اللاتى تتقلب أمزجتهن ، اعتبرهن مغامرةً وتحدياً ولغزاً يجب حله بعقلانية وذكاء ، صديقتى حادة الطباع هوائية – ومن من النساء ليست كذلك ؟! – وسريعة التغير ، بعد فترة قصيرة من صدفة لقائنا اهدتنى باقة ورد بغير مناسبة – ومن من النساء تحتاج مناسبة كى تهديك شيئاً ما؟! – وبغير انتظار ، غير أنها على الرغم من ذلك لم تحاول أن تعبر الخط الوهمى الواهى الفاصل بين الصداقة وماعداها ، بل حافظت على مسافة البعد القريبة ومساحة القرب البعيدة وحافظت على حسن صداقتها كما تحافظ على حسنها وبهائها ، فاكتفيت أنا من جانبى بوجودها فى محيطى أو وجودى فى محيطها ، ونالنى من ذلك شىء من راحة البال واكتسبت مع الوقت شيئاً من الاطمئنان لها وبها .

حين ظهرت بغير سابق إنذار أنياب النمرة الرابضة بداخلها لم اندهش كثيراً – فمن من النساء لا تمتلك مثل هذه الأنياب بداخلها؟! – ولم اتوجع مما طالنى منها ، بل تركتها تخرج ما فى جعبتها وتفرغ سحبها على شواطئ صبرى علّها تهدأ وترجع لحالها الذى اعتدته منها واعتدتها عليه ، وهو الصبر الذى آتى ثماره حين عادت لسابق عهدها فجأة وبنفس السرعة التى تحولت بها أول الأمر ، بعد هذا التحول كنت قد اعتدت تقلباتها وصرت اتوقعها قبيل حدوثها.

لكنها كانت تمتلك الكثير الذى تقدر أن تدهشنى به – ومن من النساء ليست كذلك ؟! – طوال معرفتى بها ، فهدهدتنى حين انتظرت عواصفها وعنفتنى حين توقعتها حانية ، ضمتنى فى اللحظة التى تنبأت فيها برحيلها ، وبعدها نأت بجانبها واعرضت حين حسبتها دانية ، وبقينا على هذه الحال طوال مسيرنا صعوداً وهبوطا .

ككل النساء حكت لى عن آخرين وشغلتنى بأخبارهم حتى لهتنى عن نفسى وجعلتنى اتابع احوالهم وكأن هذه الأحوال تؤثر فىّ وما هى كذلك ، ثم عادت لتشعرنى أنى محور الكون وكل احداثه تمر من تحت انفى ، واقداره تصنعها نزواتى وافكارى ، داعبت رجولتى وعنفوانى حتى أوصلتنى للشعور بأن العالم بين راحتىّ اقلبه كيفما شئت – ومن من النساء لا تقدر على هذا ؟! – ثم القتنى بعدها مباشرة بغير هدنة أو هدأة إلى هوة النسيان وغيابات جب الصمت واجترار السكوت .

بدلت خلال معرفتى بها من الثياب ما جعلنى أتوه عن شخصيتها الأصلية وانساها وانسى الهيئة التى قابلتها عليها ، لكنها – واحقاقاً للحق – منحتنى وألبستنى من الثياب ما جعلنى اكاد انسى شخصيتى أنا الحقيقية ، دورتنى ودوختنى ولهت بى ومعى ، نضجت وشاخت وتصابت وأحزنت وأضحكت وأشرقت وأظلمت وظلمت وأنصفت ، كل هذا وأنا معها لا أجد لى منها ملاذاً ولا مهربا .

وأخيراً تأنقت وتألقت وارتدت احلى ما لديها لتدارى آثار الكبر التى بدأت تهزمها ومرت علىّ فى زفة منيرية الصوت والموسيقى لتعلمنى برحيلها ولتعرفنى فى الوقت ذاته بصديقة جديدة ستتركها لتصاحبنى إذ هى راحلة بعد أن ذبل ورقها وغاب رحيقها فاتخذت قرارها – منفردة – بالذهاب خوفاً من أن أسألها أنا الرحيل ، تركت لى صديقتها شبيهتها خليفتها زاهية الأوراق فواحة العطر المحتفظة بصباها مازالت ، رافعة رأسها بزهو وتفاؤل توحى وتشى بالكثير وتنذر بالكثير – ككل النساء – فاتحة احضانها لاستقبالى دون أن أرى ماتخبئ خلف ظهرها ودون أن أبصر اشواكها التى أعلم أنها موجودة حتماً بين الأغصان شأنها فى ذلك شأن سابقتها وسابقاتهما " حكم الزهور زى الستات .. لكل نوع معنى ومغنى " لكن وعلى الرغم من تعدد الأنواع وتبدل الغناء فأنا قد صرت على يقين بأن " كلهن سواء فكلهن نساء " وأعرف ايضاً أن صديقتى الجديدة راحلة لا محالة ومفارقة هى الأخرى .. بعد إثنا عشر شهراً .. ككل سنة

حكاية عشاء لفردين .. لهما ثالث

2009-12-18T19:23:00.003+02:00

قرار تحضير العشاء فى ليلة شتوية ليس قراراً سهلاً على الاطلاق ، عليك إن اتخذته أن تتخلى عن دفء الأغطية الرابضة فوق فراشك ، وتتخلى ايضاً عن الدفء الشعورى الذى تتحصن به غرفتك الصغيرة بتفاصيلها الحميمية ، تترك كل هذا وراءك وتأخذ طريقك إلى المطبخ الذى قلما تدخله لقلة نزواتك الطبيخية خاصة مع حلول الشتاء ، هاتف من صديق يعلمك بقدومه يجعلك تزيد مكونات العشاء التى تحضرها لتكفى شخصين وسط فرحتك بإنضمام احد ما لمائدة طعامك التى كنت تتركها دوماً قبل أن تنهى وجبتك تحت وطأة الملل ، فرحتك بالصحبة تجعلك تجهز قائمة اغانى على جهاز الكمبيوتر بعد تعلية صوته ليصلك فى المطبخ مع مراعاة اغلاق باب الحمام حتى لا يزعج الصوت العالى الجيران عبر المنوّر ، كالعادة تبدأ مع " إية يا بلاد يا غريبة " التى تصاحب فيها الملك بصوتك وحركاتك وانت تفتح ابواب النملية والثلاجة لتخرج مكونات العشاء وكأنك تفتح تفتح أبواب قلبك لتخرج منها اوجاع الغربة القاهرية متخلصاً منها فى طريق إخلاصك للمدينة التى ( عداداتها قدنا ميت ألف مرة ) بوصف الخال الأبنودى العظيم ، بداية تقطيعك للخضروات وفتح علبتى الفول وفقش البيض فى وعاء غويط تصبح مثالية مع زين محمود وهو ( يبكى ويضحك لا حزنا ولا فرحا ) ، لتبكى حبات الخيار والطماطم والفلفل والبصل حين تقابل نقاط الزيت والخل فى طبق السلاطة من حميمية اللقاء ويتقلبون فى احضان بعضهم البعض فى الوقت الذى يضحك فيه صفار البيض فى الوعاء قبل أن يعطس حين يكتشف لذعة الفلفل الأسمر .

حين يبدأ العم احمد منيب فى تغزله واحتفائه بـ( أم العيال العشرية) تقفز ذكريات منزل كان يجمعك بالعائلة إلى ذهنك ممزوجة بأحلام مستقبلية عن أم عيالك التى تتمناها عشرية بالكيفية التى صهرها منيب فى صوته الحنون وكأنه صوت أبيك صباح العيد يوقظك بحنوّ يفوق المعتاد ، رحابة صوت احمد منيب هى المكان المثالى لإستقبال صوت جرس الباب ولقاء صديقك الأسمر بجذوره النوبية الذى يعتبر الأغنية بمثابة عزف نشيد وطنى احتفالاً منك بوصوله ومعه " نصف كيلو كنافة بالكريمة " فى واجب يحدث فى أول الشهر وفى حالات روقان المزاج القليلة الحضور ، ويكمل الكمبيوتر مراسم الاستقبال حين يصدح صوت محمد الحلو فى الفضاء بين الغرفة والمطبخ بتتر زيزينيا القادم من مكان بعيد فى روحك السكندرية ( وعمار يا اسكندرية ) وكأنها نشيدك الوطنى يعقب نشيده الوطنى بينما تؤمن قطعة الحشيش المعتبرة التى اصطحبها صديقك ضرب الإحدى وعشرين طلقة المطلوبة فى المراسم واستعراض حرس الشرف وتؤمن ايضاً الانتهاء من تجهيز العشاء سوياً بسرعة دون احساس بطول الوقت الذى استغرقتوه فى التجهيز .

تجهيزكم لمائدة العشاء فى البلكونة لم يكن إلا تلبية لدعوة الملك الأسطورية التى أقّر فيها أن ( شبابيك الدنيا دى كلها شبابيك ) فتخرجان لتناول طعامكما وانتما تطالعان شبابيك البشر المحيطين بكم فى عالم اجبرته برودة الجو على الإختفاء داخل كهوفهم بينما ساعدتكم حرارة الصدور و الأرواح على الخروج للإستمتاع بهذه الليلة.

الخلفية الغنائية دوماً تمنح الطعام فرصة ليزيد متعتنا ، وتمنحنا الفرصة لإيجاد ارضية مشتركة تقف عليها افكارنا برغم ندرة الحديث المتبادل بيننا لإنهماكنا فى الأكل بشهية تحضر دومأ فى وجود الرفقة الجيدة ، ابتسامة لعوب لم احتار كثيراً فى تفسير معناها الساخر – بغير نقاط على السين – وادركت مغزاها حين ظهرت على وجه الصديق فى اللحظة التى سمع فيها صوت سعاد ماسى فى ( مسك الليل ) ، ابتسامة اعرف أنه لن يتعداها بالكلام فهو يدرك قيمة صوت سعاد فى حياتى ، لكنه يضطر لإن يبدأ الحديث حين يسمع صوت الشاب خالد وهو يتغنى ( لله يا جزائر ) فيصر الصديق على العكننة وهو يتسائل : لسه بتسمع الجزائريين ولاد الـ ..... دول ؟
ولا يقتنع بردك وأنت تقول : يا ابنى الفن والأدب والمزيكا ارقى وأنقى من الخربأة والخذوقة اللى شغالة دى .. دى نقرة و دى نقرة ، ينعتنى بأنى ماعنديش مبدأ وهو يضحك قبل أن تصرح حنان ماضى فى ذات اللحظة بأن ( مافيش فى الأغانى كده و مش كده يفرقنا عن بعض بالشكل ده ) فى ترنيمة مصرية فؤاد نجمية لها طعم كوبا الشاى بالنعناع اللذان يستقران فى كفينا فى هذه اللحظة .

قبل نزوله يطلب منى – كعادته – مدداً من الكتب ليزيل صدأ روحه ( بنص تعبيره ) ويروى عطشه لشىء جديد ، يمتعض قليلاً وأنا اناوله " ذاكرة الجسد " لأحلام مستغانمى ويردد : برضة جزائرية !! انت إيه يابنى .. جاسوس ؟! ، فأرد مقتضباً : إقراه الأول يا لطخ وبعدين احكم ، وامنحه مع الكتاب ديوان " وجوه على الشط " لربما تلون ريشة الخال عبد الرحمن الأبنودى الساحر والساحرة ( الخال و الريشة ) بعضاً من خواء روحه ، ينزل صديقى بعد وداع سريع على الباب لأعود انا للغرفة بعدما غسلت الأطباق واعدت المطبخ لسيرته الأولى ، اطفئ الأنوار مكتفياً بضوء الأباجورة الذى يلقى بظلاله على علم مصر المحتفظ بمكانه منذ عامين أعلى السرير، ومحمد منير ينهى الليلة بعظمة الملوك .. لايهمنى اسمك ، لا يهمنى عنوانك ، لا يهمنى لونك ولا ميلادك ، مكانك .. يهمنى الانسان .. اطفئ الكمبيوتر واشكره .. اندفس فى بطاطينى .. وانام.

الحاجات اللى مش بتموت فى الشتا ... الارابيسك والحنين .. واحنا

2009-11-17T08:10:00.001+02:00

هل هى لحظات الهدوء النسبى التى تزورنا وتمنحنا الشجن الذى يحفر علاماته الواضحة بأرواحنا بنفس الإبداع الذى يرسم به ملامح الحنين المميزة على وجوهنا .. هل هى تلك اللحظات التى ينبغى علينا أن نتوقف عن الإندهاش ونعلن معها أننا نستقبل الشتاء ؟! ، لا ليس اكتئاباَ هذا الذى يفرض سطوته على ايامنا ويهدهد ارواحنا ويضمها لصدره الدافئ فيدفئها رغم برودة نستشعرها خارجنا ، وليست كآبة تلك الحالة التى يرهف معها حسنا وتخفت الأضواء بداخلنا لتصبح هادئة كشمعات تحترق فى رقة وسط غرفة العمر لتعبقها برائحة الذكريات وتلقى ظلالاً للسنين على حوائط الأيام ، ليس انهزاماً هذا التأمل فى تفاصيل ربما لا تلفت انظارنا فى المعتاد ، ولا هو خوف هذا الترقب الذى تصير عليه نفوسنا وكأنها فى انتظار حبيب ما ، موعد ما ، نبأ ما ، حكاية ما يقصها علينا عجوز طيب شاب شعره وابيضت لحيته وترك الزمن علاماته على اخاديد وجهه لكنه لم يقدر على نزعه من ابتسامته الهادئة ولم يسلبه صوته العميق الذى يحتوينا وهو يقص علينا قصته المعتادة بعد أن يبدل فى تفاصيلها قليلاً كل عام خوفاً علينا من الملل أو عدم الاندهاش فيروى بها نبتة فى وجداننا اسمها الحنين.

حنين .. هذا هو طعم الشتاء .. هل سيفيدنى البحث عن مفردات اخرى ومعان اقرب أم يكفى أن اجمل كل ذلك فى المشهد الأكثر إيجازاً وإفصاحاً وروعة ، المشهد الذى يمشى فيه صلاح السعدنى متلبساً روح حسن ارابيسك ، يمشى فى حارة مصرية تكاد تكون مظلمة لا ينيرها إلا الحنين ، حارة ضبابية وكأن جدرانها تحتضنه وتلفظه فى الآن ذاته لتخرج ملامحه لحظتها موجوعة بالحنين ، مهمومة به ومحترقة فى محرابه ويخرج زفيره من صدره محملاً بمكنونات روحه واضحاً فى الصوره لا تدرى إن كان واضحاً لإشتعال روحة وبرودة ما يحيطه أم أنه يخرج نفساً اقتنصه من سيجارة ترافقه وحدته وهو يعبر وسط الحارة التى تتابع عبوره لها بعيونك التى تتابع تتر المسلسل .. ارابيسك.

نعم .. هذه هى حياتنا كلها .. ارابيسك .. عاشق ومعشوق يتداخلان فيذوب كل منهما فى الآخر ليصنعا كلاً جديداً تحتوى تفاصيله تفاصيلهما ، يكمل كل منهما الآخر فتكتمل نواقصهما ، ينفرطا ويتجمعا فى احضان بعضهما البعض فيتوحدا فى قبلة تمنح العمر بعداً جديداً أرحب من المكان و أبقى من الزمان .

هذه هى حياتنا .. ارابيسك .. نمر بيوم كئيب وسط اسبوع حافل فى شهر سعيد يتوسط عاماً مدهشاً اتى فى مرحلة عمرية متقلبة كانت واحدة من مراحل عمر ساخر فى تفاصيله اجتهدنا فى إكماله لنكمل بنهايته دورنا فى سيناريو حياة مجهول لنا رغم أنه مكتوب قبلما نشرع فى تمثيله ، كل هذا ما هو إلا ردهة نعبرها إلى رحلة أخرى مبهمة ، حياتنا فيها قطعة خشبية منحوته بمهارة ، مطلية وأنيقة وصامته كعاشق يبحث عن معشوق يكمله ليكونا ويكونّا جزءاً صحيحاً فى قطعة فنية بديعة متفردة .. قطعة ارابيسك .

نعم .. نكتشف روعة الارابيسك حين يدق الشتاء الأبواب فنفتح له ارواحنا قدر استطاعتنا ليمنحنا كعادته لحظات الهدوء النسبى التى نسميها شجن ، شجن يغسل ارواحنا وينقيها ، شجن يحنى ايادينا ويتركنا نفتش فى تفاصيل الحياة العابرة بنظرات أكثر عمقاً واصابع أكثر رقة وعيون أكثر لهفة وقلوب أكثر نشوة وحزن أكثر نبلاً ، هى لحظات الهدوء النسبى التى نتذكر فيها أن ( حاجات كتير بتموت ف ليل الشتا .. لكن حاجات اكتر بترفض تموت ).

خطاب للرئيس فى ذكرى (اللى راح وانقضى )

2009-10-08T01:12:00.004+02:00

"وربما جاء يوم نجلس فيه معاً .. لا لكى نتفاخر ونتباهى ولكن لكى نتذكر وندرس ونعلم أولادنا جيلاً بعد جيل قصة الكفاح ومشاقه ومرارة الهزيمة والامها وحلاوة النصر وآماله ."

سيدى الرئيس .. طبت أينما كنت وطابت كل اوقاتك ، ولأن الحوادث كبيرة ولأن التطورات متلاحقة ولأن القرارات مصيرية فإنى أريد أن أدخل مباشرة فيما سوف اتحدث فيه مع سيادتك فى خطابى الذى ابعثه لك من مصر التى تبعد بضعاً وثلاثين سنة عن مصر التى القيت انت فيها خطابك أمام مجلس الشعب بعد نصر اكتوبر.

اكتوبر .. أعرف ما تدفعه هذه الكلمة الى رأسك وصدرك من معانى وصور وحكايات ، لكنها سيدى تدفع الى رؤوس وصدور جيل ولد وعاش وترعرع فى مصر دون أن يراك سوى فى ساعتين اخرجهما محمد خان وتجسدت أنت فيهما فى احمد زكى ، هذا الجيل الذى انتمى إليه حين يسمع كلمة اكتوبر فهو يتذكر قطعاً العبور الصعب ساعة الظهيرة، العبور شبه المستحيل على محور اليأس والرجاء الى المدينة الجديدة خارج القاهرة .. مدينة 6 اكتوبر.

نعم سيدى ، فقرار الحرب و قصة الكفاح ومشاقه ومرارة الهزيمة والامها وحلاوة النصر وآماله لم يبق منها سوى مدينة تعد امتداداً للمدينة الأم ، مدينة لم تعانى بعد من كل تشوهات المدينة الكبيرة وإن كانت ستعانى منها قريباً ، مدينة اصبح العبور لها بنفس صعوبة عبور أولادك عام 73 ، وإن كان أولادك عبروا مانع قناة السويس واجتازوا وهم خط بارليف الحصين وانجزوا مهمتهم فى ست ساعات ، فنحن اليوم نحتاج الى ساعات مثلها للعبور الى 6 اكتوبرنا ، فالمانع اطول والطريق ابعد - خاصة بعد تركيب كاميرات التصوير الجديدة – وقطعاً سيدى اكتوبرنا تختلف تماماً عن اكتويركم .

سيدى .. اكتوبر والعبور والسلام إن كانت ككلمات تمثل لك علامات فارقة فى حياتك وحياة الوطن ، فهى عندنا وعلى يد من خلفك ومن اكملوا مسيرتك هى معان تختلف عن معانيك ومقاصد تختلف عن مقاصدك ، كلها ليست أكثر من مدن متاخمة للعاصمة تنام بجوارها وينام فيها بشر لا يذكرون لك ولا عنك ولا منك ولا عن اسامى مدنهم شيئاً مما تعرفه انت من المعانى.

أما انت نفسك بكل ما كنته وبكل ما كان فيك وفى شخصيتك وفى تفكيرك وخيالك فقد ابتعدت قليلاً إلى ارض ( جعلوها عنوة تتبع محافظتك الأم ) وبنوا فيها مدينة لتبقى كل ايام تاريخنا مدناً تعانى فى حاضرنا .. مدينتك سيدى كل سكانها ومن يذهبون اليها لا يحملون لها سوى القدر من الحب الذى يمكن أن يحمله انسان لمدينة يتصدرها مجمع للسجون هو اشهر ما فيها .

سيدى الرئيس رجوتك الا تغضب أو تحزن مما سبق ، فالجيل الذى انتظرت يوماً أن يجلس ليتعلم ويتذكر ويدرس ما فعلتموه ما عاد يملك من النصر والهزيمة دروساً ولا يعرف لهم تاريخاً حقيقياً ، وإن كان اولادك على يديك قد سطروا دروساً تعلم منها العالم فى معركة المصير ، فأولادك هؤلاء لا نعرف نحن منهم الان سوى الاستاذ محمود ياسين فى الرصاصة لا تزال فى جيبى ومعه زمرة من الاساتذة فى افلام أخرى ، وإن كان العالم منذ سنين بعيدة اطلق عليك بطل الحرب والسلام ، فالحرب والسلام الان أصبح لهما بطل جديد صارت معه المعركة لا تتعدى طلعة جوية فتحت باب الحرية ولا شىء سوى ذلك .

سيدى إن كان خطابى هذا قد منحك عدداً من علامات الاستفهام والتعجب لم تفهم معها الكثير مما نحن فيه الان ولم تعرف علاقتنا بتاريخنا وتاريخك ونصرنا ونصرك ، فاعلم أن هذا هو الواقع بكل مافيه أو بالأحرى بكل ما ليس فيه، فالنصر لم يبق منه سوى يوم العطلة وخطاب الرئيس ( مش انت يا ريس) ودفعة الأفلام المكررة ولقاءات مع ابطال – اعتقد شخصياً أنهم لم يملكوا ادواراً حقيقية فى المعركة - ومانشيتات صحف تعاد كما هى كل عام وحكايات ملفقة ندرسها فى مناهج تاريخنا ( المتفصل) .

أيها الحكيم ، أيها الحبيب رغم كل ما فيك ( ايوه الحبيب .. فى حاجة ؟! ) ، ايها الرئيس القائد المحنك الثعلب الماكر الماهر، رجوتك مرة اخرى لا تغضب ولا تحزن .. اشعل غليونك الأثير واستمتع أينما كنت بحب من يحبونك ويذكرونك ، اجلس بجلبابك تحت شمس وطنك الذى تحبه والذى يختلف عن وطننا ، واقرأ كما كنت تحب فما تقرأه أنت غير ما نقرأه .. واخيراً .. لا تشغل نفسك بأمر أولادك .. فأولادك .. لم يعودوا أولاد أحد.. فنحن الان لا نتعدى كوننا .. أبناء الصمت .

طبت سيدى وحفظك الله.

وداونى بالتى كانت هى الداء ..

2009-09-02T23:13:00.000+02:00

أن تجلس على مكتبك واضعاً امامك رزمة من الورق – أبيض أو مسطر حسب دماغك – بجوارها قلم أو اثنين مما تفضل مستعيناً بكوبة من الشاى أو فنجان من القهوة – والنسكافية مايقولش لأ – متحصناً بعلبة سجائرك – لو كنت مدخناً – مجهزاً أجواء الكتابة من اضاءة حميمية مع خلفية موسيقية تمنح المشهد بعداً جديداً ، وبعد كل هذا تبدأ فى البحث عن شىء تكتبه لتجد أنك تلهث وراء مئات الأفكار المبعثرة فى رأسك بدون أن تقدر على الامساك بإحداها .

هى دى بالظبط حالة الكتابة تحت ضغط ، اللى هى إنك تكون بتكتب مش عشان انت حابب تكتب ولا فيه حاجة جواك بتخبط على ضلوعك استئذاناً فى الخروج ، لأ يا معلم .. إنك تكون بتكتب علشان لازم ومضطر تكتب ، علشان بقى الجرنال بيتقفل خلاص ولازم تكتب مقالتك ولا فى حدث معين فى مجالك لازم تكتب مواكباً له إحتفاءاً به ولا مطلوب منك شغل فى توقيت معين ولا عايز اسمك ينزل فى حتة ما والناس تقراه ، يعنى م الآخر إنك تكون بتكتب ونيتك مش صافية للكتابة الخالصة المنزهة من كل غرض – حتى لو كان شريف – وكونك بتكتب وهناك شبهة إضطرار جواك بتضغط عليك وتحسسك إن كتابتك دى فيها حتة مش حقيقية ومش صادقة .

فى هذه الحالة اسمحلى ابشرك .. أنت لست محترفاً بعد .. ودى مش شتيمة على فكرة ، لكن قصدى إنك لم تحترف الكتابة ولا تمتهنها – من المهنة وليس من المهانة – ولا تعمل فى مكان دورك فيه أن تكتب ، بل إنك من النوع الذى يكتب حين يداهمه شعور الكتابة ، حين يحتاجها ، حين تفيض الكلمات من إناء روحك الممتلىء فتستقبلها على الورق ، لذلك تشعر بنوع من الضغط حين تكتب إضطراراً – إن لم يكن إجبارا - وكأن هناك عبء على كاهلك يشوه الكتابة فى عينك ويزيفها فى صدرك ويمنحها طعماً مرا .

لو مررت بهذه الحالة أرجوك أن تتحداها ، لاتجعلها تدفعك للتوقف ، لا تستسلم لها وتترك القلم ، بل اكتب ، اكتب أى شىء ، اكتب حتى فى شىء بعيد عما أنت مضطر للكتابة فيه وعنه ، فالكتابة فى حد ذاتها تبقى علاجاً ناجعاً لأوجاع الروح ، فعل الكتابة دون غيره يمنحك سمواً فوق احساسك بالإنسحاق تحت وطأة ضغط ما ، الكتابة مقدسة.. فاكتب .. مثلما اكتب أنا الآن .

الملك

2009-08-10T01:32:00.001+03:00

صفحة الملك
عين العدد 311

شخبطة ع الحيطة

اتنيل ...."حوار شخصى"

ببساطة كده

ماتكدَبش نفسك

لا يا شيخ

كلنا مجاريح

عرس الديمقراطية

1

حتحتة الأسبوع

خليها تاكله

إغضبى يا دنيا

تاريخ الرسم

أكبر منك بيوم

عِش أنت

تعيش انت

ماتعجزش

حلاوتك يا مولانا

ناس فى أسبوع

مخمضة

تكيلم .. تكيلم

للذكرى

لا تكن فسفس

صوت الجيل

بلاش معاندة

تكتكة زراير

نقط سياسة

إنزل بقى

شعبين

كلام الناس

بكرة الوطن

إمبابة

عن الكتابة والبشر

خيوط

مواعين

فى البدء كان الميدان

شكراً.. وكفاية

انت المخ وأنا العضلات

الثورة بتاعتك

عَلَم

مواجهة

تصدقى ؟!

قلبى انجرح بالشوقطيبته بالمغنىولما داق الخوفطمنته بعنيكى...وتصدقىإطمـّـن

وحَشة

واحشنىوحشة الصدر لشهقة ساعة الغرق

عطشــان

فيينا.. عندما تصنع الحياة

اعترافات الرواية

اقرأ كتابك

مصر بتخسر زيتون

دراما الهروب.. عن الغياب والعودة والحزن والفرح

تستمر

ولاد الكلب

للتاريخ .. والجغرافيا

وهو هنا ..ك

علا

مربع

وحشتنى

احترس من لعبة الست

حكاية عشاء لفردين .. لهما ثالث

الحاجات اللى مش بتموت فى الشتا ... الارابيسك والحنين .. واحنا

خطاب للرئيس فى ذكرى (اللى راح وانقضى )

وداونى بالتى كانت هى الداء ..

الملك

قلبى انجرح بالشوق
طيبته بالمغنى
ولما داق الخوف
طمنته بعنيكى

...وتصدقى
إطمـّـن

واحشنى
وحشة الصدر لشهقة ساعة الغرق