حلاوتك يا مولانا

يااااه، ذكريات كتير قوى وحلوة قوى عدت فى بالى أول ما سمعت المقطع اللى لا يزيد على دقيقة وكام ثانية، افتكرتنا وإحنا بنجرى علشان نلحق نصلى فى حتة قريبة من المسجد، وافتكرتنا وإحنا بنلم بعض كل يوم علشان نروح نصلى التراويح، علشان اللى مش ناوى يروح يتشجع باللمة وييجى معانا، وافتكرتنا وإحنا فى الصلاة لما بنساعد الناس تلاقى مكان وتقدر تصلى وهى مرتاحة، وافتكرتنا وإحنا طالعين من الصلاة بنجرى نتسحر بسرعة عند "ألبان السويسرى".. أيامها، وده كان من كام سنة، كان بيجى فى بالى إن الراجل اللى بيجيبنا كلنا علشان حلاوة وعذوبة ورقة صوته ده أكيد ليه فى حساناتنا نصيب.

إفتكرت كل ده وزعلت واتقهرت وندمت، زعلت على إنى كنت باحب شيخ صوته حلو، من غير ما أعرف إن دماغه مش حلوة، وزعلت على كل الناس اللى لسه بتصلى وراه وهى عايشة الحالة اللى كنا إحنا عليها معاه، واتقهرت على شبابنا اللى بيسلموا أمخاخهم لأى حد يحشيها بأى حاجة، وندمت على كل الناس اللى حاولت فى وقت من الأوقات أقنعهم بحلاوة الصلاة وراء الشيخ حاتم فريد فى القائد إبراهيم على كورنيش أجمل مدينة فى الدنيا.

مش عارف هتحس بكل اللى أنا حسيته ده أو هيفرق معاك لما تسمع الشيخ حاتم وهو بيدعى مؤخراً فى صلاة التراويح هذا العام قائلاً "اللهم عليك بالعلمانيين والليبراليين" ولا مش هتفرق معاك الكلمة ؟، ومش عارف الشيخ حاتم نفسه إزاى جاله قلب يقول كده.. يا شيخ حاتم.. منك لله.. على كل الحاجات الحلوة اللى شوهتها.

يا شيخ حاتم..ارجوك إعمل حساب على الفيس بوك، وقتها هتستفيد وتتعلم درس كبير قوى ممكن تاخد منه فكرة تغير بيها طريقة تفكيرك اللى عمرى ما فكرت فيها وأنا ملهى فى حلاوة صوتك اللى ماشفتش منك أمارة غيره، ويمكن تدعى لمارك زوكربرج لما تلاقى وانت بتعمل حساب إن فيه خانتين منفصلتين، الأولى هى "religion" ومعناها الديانة أو الدين، والثانية هى "political views" ومعناها الاتجاهات السياسة، وساعتها ممكن تتعلم إن الدين حاجة، والسياسة حاجة تانية، العلوم السياسية منفصلة، حتى لو كنت عايز تطبق الشريعة الاسلامية، مين قالك إن الشريعة الاسلامية تتعارض مع العلمانية أو الليبرالية!، ومين اقنعك ووراك كل الحشود دى بتأمن على دعاك، تدعى على ناس يدينوا بدينك ولا يعادوه، يا شيخ حاتم ..روح منك لله.

أخيراً.. كلامى عن ومع الشيخ حاتم، لا يعنى إطلاقاً إنى ممكن أتكلم مع ياسر برهامى السلفى السكندرى اللى حرم الفيفا –اللعبة مش المنظمة- ..عشان للصبر وللأدب وللعقل وللجدال حدود.

حاشية: يارب: فى ناس بتكرهنا فى الدين وف رجل الدين، وتقربنا لسب الدين، وبيألفوا على مزاجهم يارب.. ارحمنا منهم، وسهلّنا.. وصعب عليهم وعلى كل اللى بيصعب الحياة على الناس والدين منه براء ..يارب.